ബ്രിട്ടീഷ് രാജകുടുംബത്തിന് ഇത് വിവാഹങ്ങളുടെ സീസണ് ആണെന്ന് തോന്നുന്നു. ഹാരി രാജകുമാരന് മെയ് മാസത്തില് വിവാഹിതനാകാന് ഒരുങ്ങുമ്പോള് കുടുംബത്തില് ഒരു രാജകുമാരി കൂടി വിവാഹനിശ്ചയം പൂര്ത്തിയാക്കി. എലിസബത്ത് രാജ്ഞിയുടെ പേരക്കുട്ടി യൂജീന് രാജകുമാരിയാണ് ഈ വര്ഷം വിവാഹത്തിന് ഒരുങ്ങുന്നത്.
ദീര്ഘകാല കാമുകനായ ജാക്ക് ബ്രൂക്സ്ബാങ്കിനെയാണ് യൂജീന് രാജകുമാരി വരനായി സ്വീകരിക്കുക. രാജകസേരയിലേക്കുള്ള നിരയില് എട്ടാമത്തെ ആളാണ് ഈ 27-കാരി. യോര്ക്ക് ഡ്യൂക്ക് ആന്ഡ്രൂ രാജകുമാരന്റെ രണ്ടാമത്തെ മകളാണ് യൂജീന്.
യൂജീന് രാജകുമാരിയും, ജാക്ക് ബ്രൂക്സ്ബാങ്കും തമ്മിലുള്ള എന്ഗേജ്മെന്റ് വിവരം അറിയിക്കുന്നതില് യോര്ക്ക് ഡ്യൂക്കും, ഡച്ചസും അതീവ സന്തോഷത്തിലാണെന്ന് ബക്കിംഗ്ഹാം കൊട്ടാരം വാര്ത്താക്കുറിപ്പില് അറിയിച്ചു. നിക്കാരാഗ്വയില് വെച്ച് ഈ മാസം ആദ്യമായിരുന്നു വിവാഹനിശ്ചയം.
വിന്ഡ്സറിലെ സെന്റ്. ജോര്ജ്ജ് ചാപ്പലില് ശരത്കാലത്താണ് വിവാഹം. ഹാരി രാജകുമാരനും, മെഗാന് മാര്ക്കിളും മെയ് മാസത്തില് ഇവിടെ വെച്ചാണ് വിവാഹിതരാകാന് ഒരുങ്ങുന്നത്.