നിരവ് മോദി-പഞ്ചാബ് നാഷണല്‍ ബാങ്ക് ശതകോടി തട്ടിപ്പ് ആയുധമാക്കി കേന്ദ്ര സര്‍ക്കാരിനെതിരെ രൂക്ഷ വിമര്‍ശനവുമായി കോണ്‍ഗ്രസ് രംഗത്ത്. പ്രധാനമന്ത്രി നരേന്ദ്ര മോദിയ്ക്കും, ധനകാര്യ മന്ത്രി അരുണ്‍ ജെറ്റ്‌ലിക്കും നേരെയാണ് പ്രതിപക്ഷത്തിന്റെ വിരല്‍ചൂണ്ടല്‍. രാജ്യത്തെ കൊള്ളയടിക്കുന്നത് ഇരുവരും അറിഞ്ഞിരുന്നുവെന്നാണ് 11000 കോടിയുടെ പിഎന്‍ബി വെട്ടിപ്പില്‍ കോണ്‍ഗ്രസിന്റെ ആരോപണം.
പിഎന്‍ബി വെട്ടിപ്പില്‍ അന്വേഷണത്തിന് പ്രധാനമന്ത്രി മോദി തയ്യാറാണോയെന്ന് കോണ്‍ഗ്രസ് നേതാവ് കപില്‍ സിബല്‍ ചോദിച്ചു. ഔദ്യോഗിക യാത്രകളില്‍ ആരെല്ലാമാണ് കൂടെ യാത്ര ചെയ്യുന്നതെന്ന് വ്യക്തമാക്കാന്‍ എന്ത് കൊണ്ടാണ് പ്രധാനമന്ത്രി തയ്യാറാകാത്തത്. ഇതാണോ ബിസിനസ്സ് ചെയ്യാനുള്ള എളുപ്പം?, സിബല്‍ ചോദിക്കുന്നു.
പ്രധാനമന്ത്രിയുടെ ഔദ്യോഗിക യാത്രകളില്‍ ചില കോര്‍പ്പറേറ്റുകള്‍ കൂടെ ഉണ്ടാകാറുണ്ട്. പ്രധാനമന്ത്രി പദത്തില്‍ മോദി എത്തിയ ശേഷം നിരവ് മോദിയുടെ സ്വത്ത് എത്ര വര്‍ദ്ധിച്ചു, എത്ര ലോണ്‍ എടുത്തു എന്നാണ് തന്റെ ചോദ്യമെന്നും കപില്‍ സിബല്‍ പറയുന്നു. ഇവര്‍ക്കെല്ലാം ലോണ്‍ കൂടുതലും സ്വത്ത് കുറവുമായിരിക്കും. നമ്മുടെ പണം ഉപയോഗിച്ച് സ്വത്ത് വാങ്ങിക്കൂട്ടിയ ശേഷം ലോണ്‍ അടയ്ക്കാതെ രാജ്യം വിടുന്നതാണ് നടക്കുന്നത്, സിബല്‍ ആരോപിച്ചു.
