പാവപ്പെട്ടവര്‍ക്ക് ഭക്ഷണം നല്‍കാം, അതുമല്ലെങ്കിലും വെള്ളം, ആരോഗ്യസംരക്ഷണം, കയറിക്കിടക്കാന്‍ ഒരു കൂര, സമാധാനമായി ജീവിക്കാന്‍ ഒരു തൊഴില്‍ എന്നിങ്ങനെ ഒരുപാട് കാര്യങ്ങള്‍ പാവങ്ങള്‍ക്കായി പ്രദാനം ചെയ്യാനുണ്ട്. അധികാരത്തില്‍ എത്തുന്ന സര്‍ക്കാരിന്റെ പ്രധാന ദൗത്യവും ഇതുതന്നെയാണ്. എന്നാല്‍ ഇതൊന്നും പോരാഞ്ഞ് പാവപ്പെട്ട സ്ത്രീകളുടെ ശരീരസൗന്ദര്യം നിലനിര്‍ത്താന്‍ സര്‍ക്കാര്‍ യത്‌നിച്ചാലോ?
തമിഴ്‌നാട്ടിലെ ആരോഗ്യ വകുപ്പാണ് ഈ വ്യത്യസ്തമായ ദൗത്യവുമായി രംഗത്തിറങ്ങുന്നത്. പാവപ്പെട്ട കുടുംബങ്ങളിലെ സ്ത്രീകള്‍ക്ക് സൗജന്യമായി ബ്രസ്റ്റ് ഇംപ്ലാന്റുകള്‍ വെച്ച് സൗന്ദര്യം പുനഃസ്ഥാപിക്കാനുള്ള സൗകര്യമാണ് സര്‍ക്കാര്‍ ലഭ്യമാക്കുന്നത്. ഇതിനായി സര്‍ക്കാര്‍ സ്റ്റാന്‍ലി മെഡിക്കല്‍ കോളേജില്‍ സൗജന്യ കോസ്‌മെറ്റിക് സര്‍ജറി ക്ലിനിക്കിനാണ് തുടക്കം കുറിച്ചിരിക്കുന്നത്.
ഈ ചികിത്സ ഉടന്‍ ലഭ്യമാക്കിയില്ലെങ്കില്‍ പാവപ്പെട്ട സ്ത്രീകള്‍ അപകടകരമായ വഴികള്‍ തേടുന്നുവെന്നാണ് സംസ്ഥാന ആരോഗ്യമന്ത്രി സി വിജയ ഭാസ്‌കര്‍ അവകാശപ്പെടുന്നത്. അതല്ലെങ്കില്‍ വലിയ ലോണ്‍ ഇതിനായി ഈ പാവങ്ങള്‍ എടുക്കുമത്രേ. പാവങ്ങള്‍ക്ക് സൗന്ദര്യവര്‍ദ്ധക ചികിത്സ ലഭിച്ചാല്‍ എന്താ കൊള്ളില്ലേയെന്നും ഭാസ്‌കര്‍ ചോദിക്കുന്നു.
നിലവില്‍ ഇതിനുള്ള ഫണ്ട് സര്‍ക്കാര്‍ ഖജനാവില്‍ നിന്നും ചെലവാക്കും. യുണൈറ്റഡ് ഇന്ത്യ പോലുള്ള ആരോഗ്യ ഇന്‍ഷുറന്‍സ് കമ്പനികളുമായി ചേര്‍ന്ന് കവറേജ് നല്‍കാനും ആലോചനയുണ്ട്. ക്യാന്‍സര്‍ രോഗികള്‍ മുതല്‍ സ്തനവലുപ്പം കൂടിയവരും, ആത്മവിശ്വാസത്തിന് വേണ്ടി പ്ലാസ്റ്റിക് സര്‍ജറി ചെയ്യാന്‍ ആഗ്രഹിക്കുന്നവരുമായ സ്ത്രീകള്‍ എത്തുന്നുവെന്ന് കണ്ടതോടെയാണ് സര്‍ക്കാര്‍ ഈ പദ്ധതി നടപ്പാക്കുന്നത്.
