കന്യാസ്ത്രീയെ ബലാല്സംഗം ചെയ്ത കേസില് ജലന്ധര് ബിഷപ്പ് ഫ്രാങ്കോ മുളയ്ക്കല് ഇന്ന് ഹൈക്കോടതിയില് മുന്കൂര് ജാമ്യാപേക്ഷ നല്കും. ഹര്ജിയില് തീരുമാനമാകും വരെ അറസ്റ്റ് പാടില്ലെന്ന് ആവശ്യപ്പെടാനാണ് ബിഷപ്പിന്റെ ഇതിനിടെ കന്യാസ്ത്രീയുടെ സഹോദരി നടത്തുന്ന നിരാഹാര സമരം രണ്ടാംദിവസത്തിലേക്ക് കടന്നു. അറസ്റ്റിന് സാധ്യതയുണ്ടെന്ന നിയമോപദേശത്തിന്റെ പശ്ചാലത്തലത്തിലാണ് ബിഷപ്പ് ഫ്രാങ്കോ മുളയ്ക്കല് മുന്കൂര് ജാമ്യാപേക്ഷ നല്കുന്നത്. രാവിലെ ഹര്ജി സമര്പ്പിച്ച് ഉച്ചയ്ക്ക് ശേഷം ബെഞ്ചില് കൊണ്ടുവരാനാണ് നീക്കം. ചോദ്യം ചെയ്യലിനായി അന്വേഷണ ഉദ്യോഗസ്ഥന് മുമ്പാകെ നാളെ ഹാജരാകാനാണ് ബിഷപ്പിന് നോട്ടീസ് നല്കിയിരിക്കുന്നത്.
ജാമ്യ ഹര്ജിയില് കോടതിയില് സര്ക്കാര് സ്വീകരിക്കുന്ന നിലപാടും നിര്ണായമാകും.
കന്യാസ്ത്രിയുടെ മൊഴികളില് വൈരുദ്ധ്യങ്ങളുണ്ട്, ഇക്കാര്യം പൊലീസ് തന്നെ കോടതിയെ അറിയിച്ചിട്ടുണ്ട്, ആരോപണത്തിന് പിന്നില് ഗൂഡാലോചനയുണ്ട് എന്നീ വാദങ്ങളാണ് ഹര്ജിയില് ഉന്നയിച്ചിരിക്കുന്നത്. കന്യാസ്ത്രികള് അടക്കം കൊച്ചിയില് തുടരുന്ന സമരം സര്ക്കാരിന് മേലുളള സമ്മര്ദ്ദതന്ത്രമാണെന്നും പൊലീസ് അതിന് വഴിപ്പെടുമെന്ന് ഭയമുണ്ടെന്നും കോടതിയില് നല്കുന്ന ഹര്ജിയില് വ്യക്തമാക്കും.
കോടതി നടപടികള്ക്ക് ശേഷമേ അന്വേഷണ സംഘത്തിന് മുന്നില് ഹാജരാകുന്ന കാര്യത്തില് ബിഷപ്പ് ഫ്രാങ്കോ മുളയ്ക്കല് അന്തിമ തീരുമാനമെടുക്കൂ. ബിഷപ്പ് ഫ്രാങ്കോയെ അറസ്റ്റ് ചെയ്യാതെ കൊച്ചിയിലെ സമരത്തില് നിന്ന് പിന്മാറില്ലെന്ന് സമരസമിതി അറിയിച്ചിട്ടുണ്ട്. ബിഷപ്പ് കേരളത്തിലേക്ക് എത്തുന്ന സാഹചര്യത്തില് പ്രതിഷേധം കൂടുതല് ശക്തമാക്കാനുളള നീക്കങ്ങളും സമരസമിതി തുടങ്ങിയിട്ടുണ്ട്.