വനിതാ കൂട്ടായ്മയുടെ ആരോപണങ്ങള്‍ നൂറു ശതമാനം കഴമ്പുള്ളതാണെന്ന് നിര്‍മ്മാതാവും സിനി എക്‌സിബിറ്റേഴ്‌സ് അസോസിയേഷന്‍ അധ്യക്ഷനുമായ ലിബര്‍ട്ടി ബഷീര്‍ പറയുന്നു. താന്‍ വനിതാ കൂട്ടായ്മയ്‌ക്കൊപ്പമാണെന്നും അദ്ദേഹം വ്യക്തമാക്കുന്നു.
വനിതാ കൂട്ടായ്മയ്ക്കായി ധൈര്യം കാണിച്ചവരെ അഭിനന്ദിക്കണം. ചാനലില്‍ വരുന്ന നാലഞ്ച് പേര്‍ മാത്രമേ ഇവരുടെ ഒപ്പം ഉള്ളൂ എന്ന് വിചാരിക്കരുത്. നല്ലൊരു വിഭാഗം ഇവര്‍ക്ക് പിന്തുണയുണ്ട്. മഞ്ജുവാര്യര്‍ എന്തുകൊണ്ട് ഇതില്‍ പങ്കെടുത്തില്ലെന്ന് ചോദിക്കുന്നവരുണ്ട്. അതിന് പിന്നില്‍ കാരണമുണ്ട്. അവര്‍ മോഹന്‍ലാലിന്റെ ചിത്രത്തില്‍ അഭിനയിക്കുന്നതാണ്. അവര്‍ സിനിമയില്‍ സജീവമാണ്. അതുകൊണ്ട് അവര്‍ നിശബ്ദരായിരിക്കുന്നത്. പക്ഷെ മനസ് കൊണ്ട് മഞ്ജു ആ കുട്ടിയ്‌ക്കൊപ്പമാണ്. മഞ്ജുവാര്യര്‍ ഇവരെ വിട്ടുപോകില്ല. കാരണം ആ കുട്ടിയ്ക്ക് വേണ്ടിയാണ് മഞ്ജുവാര്യര്‍ എല്ലാം സഹിച്ചത്. ഈ കുട്ടിയ്ക്ക് വേണ്ടിയാണ് വനിതാ കൂട്ടായ്മ ഉണ്ടായത്. അവര്‍ നിശബ്ദരായി ഇരിക്കുന്നുവെന്ന് കരുതി മിണ്ടുന്നില്ലെന്ന് വിചാരിക്കണ്ട. അവര്‍ അമ്മയില്‍ നിന്നും രാജിവയ്ക്കില്ല, അതിനുള്ളില്‍ നിന്ന് തന്നെ പോരാടുമെന്നും ലിബര്‍ട്ടി ബഷീര്‍ പറയുന്നു .
ഇന്ത്യന്‍ സിനിമയില്‍ കേരളത്തില്‍ മാത്രമേ ഇത്ര വൃത്തികേട് കാണൂവെന്നും ലിബര്‍ട്ടി ബഷീര്‍ പറയുന്നു. നടന്മാര്‍ക്കെതിരെ ഇവിടെ ആരോപണം ഉയരുകയാണ്. മുകേഷ്, അലന്‍സിയര്‍... അങ്ങനെ മറ്റ് ഭാഷകളില്‍ ആരോപണം ഉയര്‍ത്തിയവര്‍ക്കൊപ്പമാണ് സിനിമാ ലോകം. ഇവിടെ അങ്ങനെയല്ല. ആര്‍ട്ടിസ്റ്റുകളോടുള്ള ആരാധനയാണിവിടെ. അവിടെ സ്ത്രീയും പുരുഷനും ഒറ്റക്കെട്ടായി നില്‍ക്കും. കേരളത്തില്‍ വിചിത്രമാണെന്നും ലിബര്‍ട്ടി ബഷീര്‍ പറയുന്നു .
