തുഷാര്‍ വെള്ളാപ്പള്ളി എന്‍ഡിഎയുടെ ലോക്‌സഭാ സ്ഥാനാര്‍ത്ഥിയാകുന്നതുമായി ബന്ധപ്പെട്ട വിഷയത്തില്‍ നിലപാടില്‍ നിന്ന് മലക്കം മറിഞ്ഞ് വെള്ളാപ്പള്ളി നടേശന്‍. തൂഷാര്‍ മത്സരിക്കുന്നതിന് താനെതിരല്ലെന്ന് വെള്ളാപ്പള്ളി പറഞ്ഞു. തുഷാറിന് ശക്തമായ സംഘടനാ സംസ്‌കാരമുണ്ടെന്നും അദ്ദേഹം വ്യക്തമാക്കി.
എസ്എന്‍ഡിപിക്ക് ഒരു പാര്‍ട്ടിയോടും പ്രത്യേക സ്‌നേഹമോ വിദ്വേഷമോ ഇല്ല. തുഷാറിന്റെ കാര്യത്തില്‍ ശരിദൂര നിലപാടായിരിക്കും എസ്എന്‍ഡിപി സ്വീകരിക്കുകയെന്നും വെള്ളാപ്പള്ളി കൂട്ടിച്ചേര്‍ത്തു. എന്‍ഡിഎയുടെ ലോക്‌സഭാ സ്ഥാനാര്‍ത്ഥിയായി മത്സരിക്കുന്നതിനാല്‍ എസ്എന്‍ഡിപിയിലെ ഭാരവാഹിത്വം രാജി വെക്കേണ്ടി വരുമോ എന്നത് സംബന്ധിച്ച് ഇപ്പോള്‍ പറയാന്‍ പറ്റില്ലെന്നും വെള്ളാപ്പള്ളി വ്യക്തമാക്കി.
തുഷാര്‍ വെള്ളാപ്പള്ളി എന്‍ഡിഎയുടെ ഭാഗമാകുന്നത് സംബന്ധിച്ച് വെള്ളാപ്പള്ളി നേരത്തേ വലിയ എതിര്‍പ്പ് ഉന്നയിച്ചിരുന്നു. പാര്‍ലമെന്റ് തെരഞ്ഞെടുപ്പില്‍ തൂഷാര്‍ സ്ഥാനാര്‍ഥിയാകുന്നതിനെയും വെള്ളാപ്പള്ളി എതിര്‍ത്തിരുന്നു. തുഷാര്‍ സ്ഥാനാര്‍ത്ഥിയാവുകയാണെങ്കില്‍ എസ്എന്‍ഡിപിയില്‍ നിന്ന് പുറത്താക്കുമെന്ന് ഉള്‍പ്പെടെ വെള്ളാപ്പള്ളി നടേശന്‍ നേരത്തേ പ്രസ്താവിച്ചിരുന്നു.
