പ്രധാനമന്ത്രി നരേന്ദ്ര മോദിയുടെ ഹെലികോപ്റ്റര്‍ പരിശോധിച്ച ഉദ്യോഗസ്ഥനെ തെരഞ്ഞെടുപ്പ് കമ്മീഷന്‍ സസ്‌പെന്‍ഡ് ചെയ്തു. ഒഡീഷയിലെ സാമ്പല്‍പുരില്‍ വച്ച് ചട്ടലംഘനം പരിശോധിക്കാന്‍ വേണ്ടി കോപ്റ്റര്‍ പരിശോധിച്ച ഉദ്യോഗസ്ഥന്റെ നടപടി തെറ്റാണെന്ന് കാണിച്ചാണ് ഇയാള്‍ക്ക് സസ്‌പെന്‍ഷന്‍ നല്‍കിയത്.
1996 ബാച്ച് കര്‍ണാടക കേഡറിലെ ഐഎഎസ് ഉദ്യോഗസ്ഥന്‍ മൊഹമ്മദ് മൊഹ്‌സിന്‍ ആണ് അച്ചടക്ക നടപടിക്ക് വിധേയനായത്. എസ്പിജി സുരക്ഷയുള്ളവര്‍ക്ക് നല്‍കേണ്ട പരിഗണനയും പാലിക്കേണ്ട നിര്‍ദേശങ്ങളും പിന്തുടര്‍ന്നില്ല എന്ന് കാണിച്ചാണ് ഇയാള്‍ക്ക് സസ്‌പെന്‍ഷന്‍ നല്‍കിയതെന്നാണ് റിപ്പോര്‍ട്ട്.
ചൊവ്വാഴ്ച്ചയായിരുന്നു സംഭവം. ജില്ല കളക്ടര്‍, പോലീസ് ഡിഐജി എന്നിവര്‍ നല്‍കിയ റിപ്പോര്‍ട്ടിന്റെ അടിസ്ഥാനത്തിലാണ് നടപടിയെടുത്തത്. പെട്ടന്നുണ്ടായ പരിശോധനയെ തുടര്‍ന്ന് 15 മിനുറ്റോളം പ്രധാനമന്ത്രിക്ക് കാത്തുനില്‍ക്കേണ്ടി വന്നതായി റിപ്പോര്‍ട്ടില്‍ പറയുന്നു. ഒഡീഷ മുഖ്യമന്ത്രി നവീന്‍ പട്‌നായിക്ക്, കേന്ദ്രമന്ത്രി ധര്‍മ്മേന്ദ്ര പ്രധാന്‍ എന്നിവരുടെ ഹെലികോപ്റ്ററുകളും സമാനമായി പരിശോധിച്ചിരുന്നു.
