Breaking Now

അഭിനന്ദിക്കാന്‍ ചെന്ന തന്നെ സംവിധായകന്‍ കുടുംബത്തിന് മുന്നില്‍ പരിഹസിച്ചതായി ഇന്ദ്രന്‍സ്

അഭിനന്ദിക്കാന്‍ ചെന്നപ്പോള്‍ സംവിധായകന്‍ പരിഹസിച്ചെന്ന് വെളിപ്പെടുത്തി മുതിര്‍ന്ന മലയാള നടന്‍ ഇന്ദ്രന്‍സ്. ഒരു അവാര്‍ഡ് ദാനച്ചടങ്ങില്‍ പങ്കെടുക്കുന്നതിനായി പോയപ്പോള്‍ ഒരു പ്രമുഖ സംവിധായകനെ അഭിനന്ദിച്ചു. അപ്പോള്‍ തിരിച്ച് അദ്ദേഹത്തില്‍ ലഭിച്ചത് ക്രൂര പരിഹാസമായിരുന്നുന്നാണ് ഇന്ദ്രന്‍സ് വെളിപ്പെടുത്തിയത്.ഒരു സുഹൃത്തിന്റെ ക്ഷണം സ്വീകരിച്ചാണ് അവാര്‍ഡ്ദാന ചടങ്ങില്‍ പങ്കെടുക്കാനായി പോയത്. കുടുംബസമേതമായിരുന്നു അവിടെ പോയത്. സ്ഥലത്ത് പുരസ്‌കാരം സ്വീകരിക്കുന്നതിനായി ഒരു പ്രമുഖ സംവിധായകനും എത്തിയിരുന്നു. 

അദ്ദേഹത്തെ അഭിനന്ദിക്കുന്നതിനായി അടുത്ത് ചെന്നപ്പോള്‍ തിരിഞ്ഞ് നിന്ന് ഓ, നിങ്ങള്‍ അടൂരിന്റെ പടത്തില്‍ അഭിനയിക്കുന്നുവെന്ന് കേട്ടല്ലോ. അടൂര്‍ നിലവാരം താഴ്ത്തിയോ, അതോ നിങ്ങള്‍ ആ നിലവാരത്തിലേക്ക് എത്തിയോ എന്ന് പറഞ്ഞ് പരിഹാസച്ചുവയോടെ ചിരിക്കുകയായിരുന്നു. കുടുംബാംഗങ്ങള്‍ ആ സമയത്ത് എനിക്കൊപ്പം ഉണ്ടായിരുന്നു. ജീവിതത്തില്‍ ഏറ്റവും വിഷമമുണ്ടാക്കിയ സംഭവങ്ങളില്‍ ഒന്നാണ് അതെന്ന് ഓര്‍ത്തുകൊണ്ടാണ് അദ്ദേഹം ഇക്കാര്യം പറഞ്ഞത്. 

ഇന്ദ്രന്‍സാണ് ഡോക്ടര്‍ ബിജുവിന്റെ വെയില്‍മരങ്ങള്‍ എന്ന ചിത്രത്തില്‍ മുഖ്യ കഥാപാത്രത്തെ അവതരിപ്പിക്കുന്നത്. ചിത്രം ഷാങ്ഹായ് അന്താരാഷ്ട്ര ചലച്ചിത്ര മേളയില്‍ പ്രദര്‍ശിപ്പിക്കപ്പെടുന്ന 14 സിനിമകളില്‍ ഒന്നായി മാറിയിട്ടുണ്ട്. ഇതില്‍ താരത്തിന് സന്തോഷമുണ്ടെങ്കിലും ഒരു ചെറിയ ടെന്‍ഷനുണ്ടെന്ന് വ്യക്തമാക്കുകയാണ് ഇന്ദ്രന്‍സ്. ചടങ്ങിലേക്ക് എത്തുമ്പോള്‍ സ്യൂട്ട് ധരിക്കണമെന്നാണ് സംഘാടകര്‍ അറിയിച്ചിരിക്കുന്നത്. സംസാരിക്കേണ്ടി വരുമെന്ന് അറിയാമെങ്കിലും അങ്ങനെ ഒരു കാര്യം താന്‍ പ്രതീക്ഷിച്ചില്ലെന്നും ഇന്ദ്രന്‍സ് അഭിമുഖത്തില്‍ പറഞ്ഞു. 

 




കൂടുതല്‍വാര്‍ത്തകള്‍.