രാജ്യം ഇന്ന് 73ാമത് സ്വാതന്ത്ര ദിനാഘോഷത്തിലാണ്. പ്രധാനമന്ത്രി നരേന്ദ്രമോദി ചെങ്കോട്ടയില് പതാക ഉയര്ത്തി ആഘോഷങ്ങള്ക്ക് തുടക്കം കുറിച്ചു. ഇന്ത്യയിലെ പല ഭാഗത്തുമുള്ളവര് വെള്ളപ്പൊക്ക ദുരിതം അനുഭവിക്കുന്ന വേദന പങ്കുവച്ചാണ് മോദി വാക്കുകള് ആരംഭിച്ചത്. എത്രയും പെട്ടെന്ന് പ്രതിസന്ധി അവസാനിക്കട്ടെയെന്നും എല്ലാ സഹായവും നല്കുമെന്നും അദ്ദേഹം പറഞ്ഞു.
ആര്ട്ടിക്കിള് 370 റദ്ദാക്കിയതിലൂടെ കശ്മീര് ജനതയുടെ ഏറെക്കാലമായുള്ള ആഗ്രഹമാണ് സഫലീകരിച്ചതെന്ന് രാജ്യത്തെ അഭിസംബോധന ചെയ്തുകൊണ്ട് പ്രധാനമന്ത്രി പറഞ്ഞു. സര്ക്കാര് നല്കിയ എല്ലാ വാഗ്ദാനങ്ങളും പാലിക്കുമെന്നും അദ്ദേഹം കൂട്ടിച്ചേര്ത്തു. പാര്ശ്വവത്കരിക്കപ്പെട്ടവരുടെ ഉന്നമനമാണ് സര്ക്കാരിന്റെ ലക്ഷ്യം. എല്ലാവര്ക്കും ആരോഗ്യമെന്ന ലക്ഷ്യത്തിലേക്ക് ശ്രദ്ധ കേന്ദ്രീകരിക്കേണ്ടതുണ്ടെന്നും നരേന്ദ്രമോദി പറഞ്ഞു.
മുത്തലാഖ് നിരോധിച്ചത് രാഷ്ട്രീയ തീരുമാനമായിരുന്നില്ലെന്നും ആ തീരുമാനം മുസ്ലീം സ്ത്രീകളുടെ ശാക്തീകരണത്തിന് സഹായിക്കുമെന്നും പ്രധാനമന്ത്രി പറഞ്ഞു. ഒരു രാജ്യം ഒരു തെരഞ്ഞെടുപ്പ് എന്നതാണ് സര്ക്കാരിന്റെ അടുത്ത ലക്ഷ്യമെന്നും മോദി കൂട്ടിച്ചേര്ത്തു. ഇന്ത്യന് ജനതയാണ് 2019 തെരഞ്ഞെടുപ്പില് മത്സരിച്ചത്, മോദിയല്ല. രാജ്യത്തിനായി വീരമൃത്യുവരിച്ച സൈനികരെ ഈ നിമിഷം ആദരിക്കുകയാണെന്നും പ്രധാനമന്ത്രി പറഞ്ഞു.
രാജ്യത്തെല്ലാവര്ക്കും കുടിവെള്ളം ലഭ്യമാക്കുന്നതിനായി ജല് ജീവന് മിഷന് നടപ്പാക്കും.അടിസ്ഥാന സൗകര്യ വികസനത്തിനായി നൂറ് ലക്ഷം കോടി രൂപയാണ് സര്ക്കാര് നീക്കിവച്ചിരിക്കുന്നതെന്നും പ്രധാനമന്ത്രി പറഞ്ഞു.