ബലാത്സംഗം- പോക്സോ കേസുകളില് അന്വേഷണവും വിചാരണയും അതിവേഗം പൂര്ത്തിയാക്കണമെന്ന് ആവശ്യപ്പെട്ട് എല്ലാ സംസ്ഥാന മുഖ്യമന്ത്രിമാര്ക്കും ഹൈക്കോടതി ചീഫ് ജസ്റ്റിസുമാര്ക്കും കത്തയക്കുമെന്ന് കേന്ദ്ര നിയമ മന്ത്രി രവിശങ്കര് പ്രസാദ്.
കേസ് അന്വേഷണം രണ്ട് മാസത്തിനകം പൂര്ത്തിയാക്കണമെന്നും വിചാരണ ആറുമാസത്തിനകം പൂര്ത്തിയാക്കണമെന്നും അഭ്യര്ഥിച്ചുകൊണ്ടാണ് കത്തയക്കുന്നത്. സ്ത്രീകള്ക്കെതിരെയുള്ള കുറ്റകൃത്യങ്ങളും ബലാത്സംഗവും നിര്ഭാഗ്യകരവും അത്യന്തം അപലപലനീയമാണെന്നും അദ്ദേഹം കൂട്ടിച്ചേര്ത്തു.
ഹൈദരാബാദ്, ഉന്നാവ് സംഭവങ്ങളില് രാജ്യവ്യാപക പ്രതിഷേധം ഉയരുന്നതിനിടെയാണ് കേന്ദ്ര നിയമ മന്ത്രിയുടെ പ്രസ്താവന. ഇന്ത്യന് ശിക്ഷാ നിയമത്തിലും ക്രിമിനല് നടപടി ചട്ടത്തിലും എന്ഡിഎ സര്ക്കാര് ഭേദഗതി വരുത്തുമെന്ന് കേന്ദ്ര ആഭ്യന്തരമന്ത്രി അമിത് ഷാ നേരത്തെ വ്യക്തമാക്കിയിരുന്നു.