ചെങ്കോട്ട സ്‌ഫോടനത്തില്‍ പ്രതിയായ ഡോ ഷഹീന്റെ മുറിയില്‍ നിന്ന് 18 ലക്ഷം രൂപ കണ്ടെത്തി. തെളിവെടുപ്പിനിടെയാണ് എന്‍ഐഎ സംഘം പണം കണ്ടെത്തിയത്. ഷഹീന്റെയും മുസമ്മിലിന്റെയും വിവാഹ ചടങ്ങില്‍ പങ്കെടുത്തവരെ കണ്ടെത്താനും എന്‍ഐഎ നടപടി തുടങ്ങി. 12 പേരാണ് ചടങ്ങിന് എത്തിയത്. അതേസമയം, അന്വേഷണ സംഘം കസ്റ്റഡിയിലെടുത്ത ഡോ ആദിലിനെയും ഇന്ന് ഫരീദാബാദില്‍ എത്തിക്കും. അതിനിടെ, അല്‍ ഫലാഹ് സര്‍വകലാശാല ചെയര്‍മാന്‍ ഭൂമി തട്ടിപ്പ് നടത്തിയെന്നും ഇഡി കണ്ടെത്തി. മരിച്ചവരുടെ പേരിലടക്കം വ്യാജ രേഖയുണ്ടാക്കിയാണ് ഭൂമി കുംഭകോണം നടത്തിയെന്നാണ് ഇഡിയുടെ കണ്ടെത്തല്‍.
അതേസമയം, ചെങ്കോട്ട സ്‌ഫോടനത്തില്‍ അന്വേഷണം വ്യാപിപ്പിക്കുകയാണ് എന്‍ഐഎ. ചാവേറായ ഉമറിന് മറ്റ് ആശുപത്രികളിലെ ചിലരുമായും ബന്ധമുണ്ടായിരുന്നു. അന്വേഷണ ഏജന്‍സികള്‍ ദില്ലിയിലെ ആശുപത്രികളില്‍ നിന്നും വിവരങ്ങള്‍ തേടി. അല്‍ ഫലാഹ് സര്‍വ്വകലാശാലയിലെ 50ലധികം ജീവനക്കാരെ ഇതിനകം ചോദ്യം ചെയ്തതായാണ് വിവരം.
