ബജറ്റിനുള്ള ഒരുക്കത്തിനിടെ രാജ്യത്തിന്റെ ഖജനാവില്‍ വന്‍ ധനക്കമ്മി നേരിടുന്നതായാണ് റേച്ചല്‍ റീവ്‌സ് പറഞ്ഞുപോന്നിരുന്നത്. ഇതിന്റെ ഭാഗമായി അസാധാരണ പത്രസമ്മേളനം പോലും അവര്‍ വിളിച്ചുചേര്‍ത്തു. കടുത്ത നടപടികള്‍ സ്വീകരിക്കാതെ രാജ്യത്തെ രക്ഷിക്കാന്‍ കഴിയില്ലെന്ന വിശ്വാസത്തിലേക്ക് നയിച്ച അത്തരം പ്രസ്താവനകള്‍ യഥാര്‍ത്ഥത്തില്‍ ശുദ്ധ നുണയായിരുന്നുവെന്നാണ് ഇപ്പോള്‍ വ്യക്തമാകുന്നത്.
പൊതുഖജനാവില്‍ യാതൊരു വിടവും നേരിടുന്നില്ലെന്ന് മാസങ്ങള്‍ക്ക് മുന്‍പ് തന്നെ ചാന്‍സലറെ അറിയിച്ചിരുന്നതായി സാമ്പത്തിക വാച്ച്‌ഡോഗ് തന്നെ വെളിപ്പെടുത്തിയതോടെയാണ് റീവ്‌സ് നുണകള്‍ ആവര്‍ത്തിച്ച് ആശങ്കകള്‍ മനഃപ്പൂര്‍വ്വം സൃഷ്ടിച്ചതാണെന്ന് തിരിച്ചറിയുന്നത്. രാജ്യത്തോട് നുണ പറഞ്ഞ ചാന്‍സലര്‍ രാജിവെയ്ക്കണമെന്ന ആവശ്യവും ഇതോടെ ഉയരുകയാണ്. ബുധനാഴ്ച ബജറ്റ് പ്രഖ്യാപനങ്ങള്‍ നടത്തുന്നത് വരെയും രാജ്യത്തിന്റെ സാമ്പത്തിക മേഖല തകിടം മറിഞ്ഞെന്ന നിലയിലാണ് മുന്നറിയിപ്പുകള്‍ ആവര്‍ത്തിച്ചത്. 
പത്രസമ്മേളനത്തില്‍ ഇന്‍കം ടാക്‌സ് വര്‍ദ്ധനവിന് സാധ്യതയുണ്ടെന്നും റീവ്‌സ് വാദിച്ചിരുന്നു. എന്നാല്‍ ഇതെല്ലാം ബെനഫിറ്റുകള്‍ ഒഴുക്കാനുള്ള പദ്ധതികളുടെ ഭാഗമായിരുന്നുവെന്നാണ് ഇപ്പോള്‍ വ്യക്തമാകുന്നത്. ഓഫീസ് ഫോര്‍ ബജറ്റ് റെസ്‌പോണ്‍സിബിലിറ്റിയുടെ വെളിപ്പെടുത്തല്‍ വന്നതോടെ ചാന്‍സലര്‍ പൊതുജനങ്ങളോട് നുണ പറഞ്ഞതായി വ്യക്തമായെന്ന് കണ്‍സര്‍വേറ്റീവ് നേതാവ് കെമി ബാഡെനോക് പറഞ്ഞു. റീവ്‌സിനെ പുറത്താക്കണമെന്നും അവര്‍ ആവശ്യപ്പെട്ടു.
'മാസങ്ങളോളമാണ് നികുതി വര്‍ദ്ധനവിനെ ന്യായീകരിക്കാന്‍ റീവ്‌സ് പൊതുജനങ്ങളോട് നുണ പറഞ്ഞത്. ബജറ്റ് യഥാര്‍ത്ഥത്തില്‍ സ്ഥിരതയ്ക്ക് വേണ്ടിയല്ല രാഷ്ട്രീയത്തെ കുറിച്ചുള്ളതായിരുന്നു. സ്വയരക്ഷയ്ക്കായി ലേബര്‍ എംപിമാര്‍ക്കുള്ള കൈക്കൂലിയാണ് ഇത്. നാണക്കേട്', ബാഡെനോക് വിമര്‍ശിച്ചു. 30 ബില്ല്യണ്‍ പൗണ്ടിന്റെ കമ്മി നേരിടുന്നതായുള്ള അഭ്യൂഹങ്ങള്‍ ശമിപ്പിക്കാന്‍ ഒരു വാക്ക് പോലും ചാന്‍സലറോ, ട്രഷറിയോ ഉരിയാടിയതുമില്ല. ഇന്നലെ ഒബിആര്‍ റീവ്‌സിന് സെപ്റ്റംബര്‍ 17ന് അയച്ച കത്ത് പ്രസിദ്ധീകരിച്ചതോടെയാണ് ഉത്പാദനക്ഷമത കുറയ്ക്കുന്നതിന് പിന്നില്‍ നികുതി വരുമാനത്തിന്റെ വര്‍ദ്ധനവാണെന്ന് വ്യക്തമായത്.
