ഒരു വര്‍ഷം കൂടി മുഖ്യമന്ത്രിയായി തുടരാനും 2027ല്‍ സ്ഥാനം ഒഴിയാനുമുള്ള ഫോര്‍മുല ഡി കെ ശിവകുമാറിന് മുന്നില്‍ സിദ്ധരാമയ്യ അവതരിപ്പിക്കുമെന്ന് റിപ്പോര്‍ട്ട്. മുഖ്യമന്ത്രി പദവിയില്‍ എട്ട് വര്‍ഷമെന്ന റെക്കോര്‍ഡ് പൂര്‍ത്തീകരിക്കാന്‍ അനുവദിക്കണമെന്നും സിദ്ധരാമയ്യ ഡി കെ ശിവകുമാറിനോട് ആവശ്യപ്പെടും. 2028ല്‍ നടക്കുന്ന നിയമസഭാ തെരഞ്ഞെടുപ്പില്‍ ഡി കെ ശിവകുമാറിനെ മുഖ്യമന്ത്രി സ്ഥാനാര്‍ത്ഥിയായി ഉയര്‍ത്തിക്കാണിക്കാമെന്ന വാഗ്ദാനവും സിദ്ധരാമയ്യ മുന്നോട്ട് വയ്ക്കും. ഡി കെ ശിവകുമാറിന് ഇപ്പോഴുണ്ടായിരിക്കുന്ന അസംതൃപ്തി പരിഹരിക്കാന്‍ ഡി കെ പക്ഷത്തെ കൂടുതല്‍ എംഎല്‍എമാര്‍ക്ക് മന്ത്രിസ്ഥാനം കൊടുക്കാനും സിദ്ധരാമയ്യ തയ്യാറാകുമെന്നാണ് റിപ്പോര്‍ട്ട്.
ഹൈക്കമാന്‍ഡിന്റെ നിര്‍ദ്ദേശാനുസരണം ഇന്ന് രാവിലെ സിദ്ധരാമയ്യയും ഡി കെ ശിവകുമാറും കൂടിക്കാഴ്ച നടത്തും. പ്രഭാതഭക്ഷണയോഗത്തിനായി ഡി കെ ശിവകുമാര്‍ മുഖ്യമന്ത്രിയുടെ ഔദ്യോഗിക വസതിയിലേയ്ക്ക് എത്തും. 'ഹൈക്കമാന്‍ഡ് ഡി കെ ശിവകുമാറിനെ വിളിച്ചിരുന്നു. അവര്‍ എന്നെയും ബന്ധപ്പെട്ടിരുന്നു. ഇരുവരോടും നേരിട്ട് സംസാരിക്കാനാണ് പറഞ്ഞത്. അതിനാലാണ് ഞാന്‍ അദ്ദേഹത്തെ പ്രാതലിന് ക്ഷണിച്ചിരിക്കുന്നത്. ഞങ്ങള്‍ എല്ലാ കാര്യങ്ങളും ചര്‍ച്ച ചെയ്യും' എന്നായിരുന്നു കൂടിക്കാഴ്ചയെക്കുറിച്ചുള്ള സിദ്ധരാമയ്യയുടെ പ്രതികരണം
