ഇന്ഡിഗോ വിമാന യാത്രാ പ്രതിസന്ധിയില് സി ഇ ഒ പീറ്റര് എല്ബേഴ്സ് കുറ്റസമ്മതം നടത്തി. കണക്കുകൂട്ടലുകള് പിഴച്ചെന്നാണ് ഇന്ഡിഗോ സി ഇ ഒയുടെ കുറ്റസമ്മതം.
വ്യോമയാന മന്ത്രിയും ഉദ്യോഗസ്ഥരുമായുള്ള കൂടിക്കാഴ്ചയിലാണ് ഇന്ഡിഗോ സി ഇ ഒ കുറ്റ സമ്മതം നടത്തിയത്. പുതിയ ഫ്ലൈറ്റ് ഡ്യൂട്ടി ടൈം ലിമിറ്റേഷന്സ് (എഫ് ഡി ടിഎല്) ചട്ടങ്ങള് നടപ്പാക്കുന്നതില് വീഴ്ച സംഭവിച്ചുവെന്ന് സി ഇ ഒ പീറ്റര് എല്ബേഴ്സ് സമ്മതിച്ചതായാണ് റിപ്പോര്ട്ട്. പുതിയ സമയക്രമത്തിനനുസരിച്ച് ജീവനക്കാരെ നിയമിച്ചില്ലെന്നും സര്വീസുകള് കൂട്ടിയത് പ്രതിസന്ധിയുടെ ആക്കം കൂട്ടിയെന്നും അദ്ദേഹം വിശദീകരിച്ചതായാണ് വിവരം.
കുറ്റസമ്മതത്തിന് പിന്നാലെയാണ് ഡി ജി സി എ കാരണം കാണിക്കല് നോട്ടീസ് നല്കിയത്. സി ഇ ഒ പീറ്റര് എല്ബേഴ്സിനെതിരെ കടുത്ത നടപടി ഉറപ്പാണെന്നാണ് വ്യോമയാന മന്ത്രാലയത്തില് നിന്നും പുറത്തുവരുന്ന വാര്ത്ത. ഡി ജി സി എ അന്വേഷണ സംഘത്തിന്റെ റിപ്പോര്ട്ട് കിട്ടിയാലുടന് നടപടിയുണ്ടാകും. ഇന്ഡിഗോക്ക് നല്കിയ ഇളവുകള് ഫെബ്രുവരി 10 വരെ മാത്രമാണെന്ന് വ്യോമയാന മന്ത്രാലയം വ്യക്തമാക്കിയിട്ടുണ്ട്. അതേസമയം ഇന്ന് കൂടുതല് സര്വീസുകള് നടത്തുമെന്ന് ഇന്ഡിഗോ കമ്പനി അറിയിച്ചു.
