Breaking Now

എസ്എസ്എല്‍സി വിജയശതമാനം വര്‍ദ്ധിപ്പിക്കാന്‍ ചട്ടം ലംഘിച്ച് നീക്കം

എസ്എസ്എല്‍സി പരീക്ഷയില്‍ ശരാശരി വിദ്യാര്‍ത്ഥികളെ സവിശേഷ ശ്രദ്ധാവിഭാഗത്തില്‍ ഉള്‍പ്പെടുത്തി വിജയ ശതമാനം ഉയര്‍ത്താന്‍ സ്‌കൂള്‍ അധികൃതരുടെ നീക്കം.

സംസ്ഥാനത്ത് ഐഇഡി വിഭാഗത്തില്‍ പരീക്ഷ എഴുതുന്ന എസ്എസ്എല്‍സി വിദ്യാര്‍ത്ഥികളുടെ എണ്ണത്തില്‍ വന്‍ വര്‍ദ്ധനയാണ് ഉണ്ടായത്. പ്രത്യേക വിഭാഗത്തില്‍ പരീക്ഷ എഴുതാന്‍ വിസമ്മതിച്ച വിദ്യാര്‍ത്ഥിയെ സ്‌കൂള്‍ അധികൃതര്‍ പുറത്താക്കിയതായി വിദ്യാഭ്യാസ വകുപ്പിന് പരാതി ലഭിച്ചു.

വിജയശതമാനം ഉയര്‍ത്താനുള്ള സ്‌കൂളുകളുടെ ശ്രമമാണ് ഇതിനു പിന്നിലെന്നാണ് ആരോപണം. കാഴ്ച, കേള്‍വി പ്രശ്‌നമുള്ളവരെയും പഠന വൈകല്യമുള്ളവരെയുമാണ് സവിശേഷ ശ്രദ്ധാവിഭാഗത്തില്‍ ഉള്‍പ്പെടുത്തി പരീക്ഷയെഴുതാന്‍ അനുവദിക്കുക.

എറണാകുളം ഉദയംപേരൂര്‍ സ്‌കൂളിലെ സിബിന്‍ എന്ന വിദ്യാര്‍ത്ഥിക്ക് ഇത്തവണ എസ്എസ്എല്‍സി പരീക്ഷയെഴുതാന്‍ കഴിഞ്ഞില്ല. ഐഇഡി വിഭാഗത്തില്‍ പരീക്ഷയെഴുതണമെന്ന സ്‌കൂള്‍ അധികൃതരുടെ ആവശ്യം അംഗീകരിക്കാത്തതിനെ തുടര്‍ന്ന് പരീക്ഷയെഴുതാന്‍ സ്‌കൂള്‍ അധികൃതര്‍ അനുവദിച്ചില്ലെന്ന് സിബിന്‍ പറഞ്ഞു. ഐഇഡി വിഭാഗത്തില്‍ പെടുത്താന്‍ തനിക്ക് മാനസിക ശാരീരിക ബുദ്ധിമുട്ടുകള്‍ ഇല്ലെന്നും സിബിന്‍ വ്യക്തമാക്കി. വിദ്യാര്‍ത്ഥി നല്‍കിയ പരാതിയില്‍ വിദ്യാഭ്യാസ വകുപ്പ് അന്വേഷണം തുടരുകയാണ്.

സിബിന്റെ വെളിപ്പെടുത്തലാണ് സവിശേഷശ്രദ്ധാ വിഭാഗത്തില്‍ പരീക്ഷാ ആനുകൂല്യങ്ങളിലെ ക്രമക്കേടിനെ സംബന്ധിച്ച കൂടുതല്‍ അന്വേഷണത്തിലേക്ക് നയിച്ചത്. ഈ വിഭാഗത്തില്‍ പരീക്ഷയെഴുതുന്ന വിദ്യാര്‍ത്ഥികളുടെ എണ്ണത്തില്‍ വന്‍വര്‍ധനയാണുള്ളത്. സംസ്ഥാനത്ത് 2004ല്‍ 141 പേര്‍ ഈ വിഭാഗത്തില്‍ പരീക്ഷയെഴുതിയപ്പോള്‍ 2011ല്‍ 7400 ആയി ഉയര്‍ന്നു. 2012ല്‍ 9224 പേര്‍ ഈ വിഭാഗത്തില്‍ പരീക്ഷയെഴുതി. 2013ല്‍ വിദ്യാര്‍ത്ഥികളുടെ എണ്ണം 12,345 ആയി ഉയര്‍ന്നു. എറണാകുളം വിദ്യാഭ്യാസ ജില്ലയില്‍ മാത്രം 915 പേരാണ് ഐഇഡി വിഭാഗത്തില്‍ പരീക്ഷയെഴുതുന്നത്.

പരീക്ഷാ ആനുകൂല്യം നേടുന്നവരുടെ കണക്കില്‍ അസ്വാഭാവികതയുണ്ടെന്ന് വിദ്യാഭ്യാസ വകുപ്പിലെ ഉദ്യോഗസ്ഥരും പരോക്ഷമായി സമ്മതിക്കുന്നു. സവിശേഷശ്രദ്ധയ്ക്ക് അര്‍ഹരായ വിദ്യാര്‍ത്ഥികള്‍ക്ക് കൂടുതല്‍ സമയവും സഹായിയെയും ലഭിക്കും. സ്‌കൂള്‍ അധികൃതരുടെയും ക്ലിനിക്കല്‍ സൈക്കോളജിസ്റ്റിന്റെയും സാക്ഷ്യപത്രം മാത്രം മതി ആനുകൂല്യം ലഭിക്കാന്‍. വിദ്യാഭ്യാസ വകുപ്പിന്റെ അനുമതി ലഭിച്ചില്ലെങ്കില്‍ കോടതിയില്‍ പോയി ആനുകൂല്യം സമ്പാദിക്കാം. ഈ ആനുകൂല്യം ഉപയോഗിച്ച് വിജയ ശതമാനം ഉയര്‍ത്താനാണ് ശ്രമം.




കൂടുതല്‍വാര്‍ത്തകള്‍.