ഷൂട്ടിംഗ് ലൊക്കേഷനില് വച്ച് മോശമായി പെരുമാറിയെന്ന് തനിക്കെതിരെ മീടു ആരോപണം ഉന്നയിച്ച ദിവ്യ ഗോപിനാഥിനോട് ക്ഷമ ചോദിച്ച് നടന് അലന്സിയര് ലോപ്പസ്. കൊച്ചി ടൈംസിലൂടെ പരസ്യമായാണ് അലന്സിയര് ദിവ്യയോട് ക്ഷമാപണം നടത്തിയിരിക്കുന്നത്. പരസ്യമായി ക്ഷമ ചോദിക്കണമെന്ന് ദിവ്യ മുമ്പ് ആവശ്യപ്പെട്ടത് പ്രകാരമാണ് അലന്സിയര് ക്ഷമ ചോദിച്ചിരിക്കുന്നത്.
തന്റെ മോശമായ പ്രവൃത്തി ദിവ്യയെ ഏറെ വേദനിപ്പിച്ചതായി തിരിച്ചറിഞ്ഞു. അതിനാല് താന് വ്യക്തിപരമായി മുമ്പ് ദിവ്യയോട് ക്ഷമ ചോദിച്ചിരുന്നുവെന്ന് അദ്ദേഹം പറയുന്നു. എന്നാല് പരസ്യമായി ക്ഷമ പറയണമെന്ന് ദിവ്യ കൊച്ചി ടൈംസിലൂടെ ആവശ്യപ്പെട്ടതനുസരിച്ചാണ് ഇത്തരത്തില് അലന്സിയര് ക്ഷമാപണം നടത്തിയിരിക്കുന്നത്.
ദിവ്യയോട് മാത്രമല്ല തന്റെ പ്രവൃത്തികള് മൂലം അഭിമാനക്ഷമേറ്റ എല്ലാ സഹപ്രവര്ത്തകരോടും ക്ഷമ ചോദിക്കുന്നതായാണ് അലന്സിയര് കൊച്ചി ടൈംസിന് നല്കിയ അഭിമുഖത്തില് പറഞ്ഞിരിക്കുന്നത്. താനൊരു വിശുദ്ധനല്ലെന്നും തെറ്റുകള് പറ്റുന്ന സാധാരണക്കാരനായ മനുഷ്യനാണെന്നും അതിനാല് ചെയ്തതെറ്റ് അംഗീകരിക്കുകയും ചെയ്തുപോയ നീചപ്രവൃത്തിയില് പശ്ചാത്തപിക്കുകയും ചെയ്യുന്നുവെന്നും അദ്ദേഹം വ്യക്തമാക്കുന്നുണ്ട്.
2018 ഒക്ടോബറില് ബ്ലോഗ് പോസ്റ്റിലൂടെയാണ് പേര് വെളിപ്പെടുത്താതെ ആദ്യം ദിവ്യ ഗുരതര ലൈംഗിക ആരോപണം നടത്തിയത്. പിന്നീടാണ് അലന്സിയറിന്റെ പേര് പരസ്യമാക്കിയത്. അദ്ദേഹത്തെ പരിചയപ്പെടുന്നതിന് മുമ്പ് ബഹുമാനമായിരുന്നുവെന്നും പക്ഷേ സ്വന്തം വൈകൃതം മറച്ചുപിടിക്കാനാണ് സമൂഹമധ്യത്തില് പുരോഗമനപരമായ കാഴ്ചപ്പാടുകളുമായി അദ്ദേഹം പ്രത്യക്ഷപ്പെട്ടിരുന്നതെന്ന് പിന്നീട് മനസ്സിലായെന്നും ദിവ്യ പറഞ്ഞിരുന്നു. അലന്സിയറിനെതിരെ താര സംഘടന 'അമ്മ'യ്ക്കും വനിതകളുടെ സംഘടനയായ ഡബ്ലൂസിസിക്കും പരാതി നല്കിയിരുന്നു.