സാധാരണമായി ഉപയോഗിക്കുന്ന ബ്ലൂടൂത്തിലെ വീഴ്ച മുതലാക്കി ഹാക്കര്‍മാര്‍ വിവരങ്ങള്‍ ചോര്‍ത്തുന്നതായി റിപ്പോര്‍ട്ട്. ഇതുവഴി ഡിവൈസുകള്‍ തമ്മില്‍ കൈമാറുന്ന ഡാറ്റ സൈബര്‍ ക്രിമിനലുകള്‍ നിരീക്ഷിക്കുന്നതായാണ് കണ്ടെത്തല്‍. ബ്രോഡ്‌കോം, ക്വാല്‍കോം, ഇന്റല്‍, ആപ്പിള്‍ ഡിവൈസുകളെയാണ് ഇത് ബാധിച്ചിട്ടുള്ളതെന്നാണ് വിവരം.
ചില ആന്‍ഡ്രോയ്ഡ് ഹാന്‍ഡ്‌സെറ്റുകളും ഈ അപകടത്തില്‍ പെട്ടിട്ടുണ്ടെന്നാണ് റിപ്പോര്‍ട്ട്. ബ്ലൂടൂത്ത് വയര്‍ലെസ് ടെക്‌നോളജി നല്‍കിയ റിപ്പോര്‍ട്ട് പ്രകാരം രണ്ട് ബ്ലൂടൂത്ത് ഫീച്ചറുകള്‍ക്കാണ് പ്രശ്‌നമുള്ളത്. സെക്യുര്‍ സിംപിള്‍ പെയറിംഗ്, എല്‍ഇ സെക്യുര്‍ കണക്ഷന്‍സ് എന്നിവയാണത്.
ഡിവൈസുകള്‍ പെയര്‍ ചെയ്യുമ്പോള്‍ പബ്ലിക് കീ നല്‍കണം. എന്നാല്‍ ചില കമ്പനികള്‍ ഈ കീ നല്‍കാതെ പെയര്‍ ചെയ്യാന്‍ സംവിധാനം നല്‍കുന്നു. ഇതിലാണ് മൂന്നാമതൊരു വ്യക്തി കടന്നുകയറുന്നത്. ബ്ലൂടൂത്ത് റേഞ്ചില്‍ മാത്രമാണ് ഹാക്കിംഗ് വിജയകരമാകുക. ക്വാല്‍കോം, ആപ്പിള്‍ ഡിവൈസ് ഉപയോഗിക്കുന്നവര്‍ സോഫ്റ്റ്‌വെയര്‍ അപ്‌ഡേറ്റ് നല്‍കണമെന്നാണ് നിര്‍ദ്ദേശം.
