പ്രധാനമന്ത്രി നരേന്ദ്രമോദിയുടെ താലിമാല പരാമര്ശത്തിനെതിരേ രൂക്ഷ വിമര്ശനവുമായി കോണ്ഗ്രസ് നേതാവ് പ്രിയങ്ക ഗാന്ധി. രാജ്യം 55 വര്ഷം കോണ്ഗ്രസ് ഭരിച്ചിട്ട് ആര്ക്കെങ്കിലും സ്വത്തുവകകളോ അവരുടെ താലിമാലകളോ നഷ്ടപ്പെട്ടിട്ടുണ്ടോയെന്ന് പ്രിയങ്ക ഗാന്ധി ബെംഗളൂരുവില് ചോദിച്ചു.
എന്റെ അമ്മ അവരുടെ താലിമാല ഈ രാജ്യത്തിന് വേണ്ടിയാണ് ത്യജിച്ചത്. യുദ്ധകാലത്ത് എന്റെ മുത്തശ്ശി അവരുടെ സ്വര്ണാഭരണങ്ങള് രാജ്യത്തിന് വേണ്ടിയാണ് നല്കിയതെന്നും പ്രിയങ്ക പറഞ്ഞു. ബിജെപിക്ക് സ്ത്രീകളുടെ പോരാട്ടം മനസ്സിലാക്കാന് കഴിയില്ല എന്നതാണ് സത്യമെന്നും അവര് കൂട്ടിച്ചേര്ത്തു.
കഴിഞ്ഞ ദിവസങ്ങളില് നമ്മള് മോദിയില് നിന്ന് കേട്ടത് വികസനത്തെ കുറിച്ചോ, ജനങ്ങളുടെ പുരോഗതിയെ കുറിച്ചോ ആയിരുന്നില്ല. പകരം വിദ്വേഷ പരാമര്ശങ്ങളായിരുന്നു. ഇത്തവണ 400 സീറ്റ് തികയ്ക്കുമെന്നും ഭരണഘടന മാറ്റുമെന്നുമാണ് മോദി പറഞ്ഞുകൊണ്ടിരിക്കുന്നത്. ഇത്തരക്കാരെയാണോ നമുക്ക് വേണ്ടതെന്ന് ചിന്തിക്കണമെന്നും പ്രിയങ്ക പറഞ്ഞു.
കഴിഞ്ഞ ദിവസം രാജസ്ഥാനിലെ തിരഞ്ഞെടുപ്പ് യോഗത്തില് മോദി നടത്തിയ വിഭാഗീയ പരാമര്ശത്തിന് മറുപടി പറയുകയായിരുന്നു പ്രിയങ്ക ഗാന്ധി. 'കോണ്ഗ്രസ് അവരുടെ പ്രകടനപത്രികയില് പറയുന്നതനുസരിച്ച് നമ്മുടെ അമ്മമാരുടെയും പെങ്ങന്മാരുടെയും കൈവശമുള്ള സ്വര്ണ്ണം അവരെടുത്ത് കൂടുതല് കുട്ടികള് ഉള്ളവര്ക്കും നുഴഞ്ഞു കയറിയവര്ക്കുമായിരിക്കും വിതരണം ചെയ്യുക.
മന്മോഹന് സിംഗ് സര്ക്കാരാണ് രാജ്യത്തിന്റെ സമ്പത്തിനു മുകളില് ഏറ്റവും കൂടുതല് അവകാശമുള്ളത് മുസ്ലിങ്ങള്ക്കാണെന്ന് പറഞ്ഞത്. ഈ അര്ബന് നക്സല് ചിന്താഗതികള് നമ്മുടെ അമ്മമാരുടെയും പെങ്ങന്മാരുടെയും താലിമാലകള് പോലും ബാക്കിവയ്ക്കില്ല' എന്നും മോദി പറഞ്ഞിരുന്നു.