പ്രസ്റ്റണ് ; ഗ്രേറ്റ് ബ്രിട്ടണ് സീറോ മലബാര് രൂപത ആവിഷ്കരിച്ച പഞ്ചവത്സര അജപാലന പദ്ധതിയിലെ ആദ്യവര്ഷമായി ആചരിച്ചുവരികയായിരുന്ന കുട്ടികളുടെ വര്ഷത്തിന്റെ ഔദ്യോഗിക സമാപനം ഡിസംബര് 1ാം തീയതി ബര്മ്മിങ്ഹാമിലെ ബഥേല് കണ്വെന്ഷന് സെന്ററില് വച്ചു നടക്കുമെന്ന് രൂപതാധ്യക്ഷന് മാര് ജോസഫ് സ്രാമ്പിക്കല് അറിയിച്ചു. സീറോ മലബാര് സഭയുടെ പിതാവും തലവനുമായ കര്ദ്ദിനാള് മാര് ജോര്ജ്ജ് ആലഞ്ചേരി മുഖ്യാതിഥിയായി ചടങ്ങുകളില് പങ്കെടുക്കും
എല്ലാ വി. കുര്ബ്ബാന കേന്ദ്രങ്ങളില് നിന്നുമുള്ള 7 മുതല് 12 വരെ ക്ലാസുകളില് പഠിക്കുന്ന കുട്ടികളും മതാധ്യാപകരും ചടങ്ങുകലില് മുഖ്യ പങ്കാളികളായിരിക്കും. വിദ്യാര്ത്ഥികള് നേതൃത്വം നല്കുന്ന ഗായക സംഘം വി കുര്ബാനയില് ഗാനങ്ങള് ആലപിക്കും. ഡേവിഡ് വെല്സ്, ഒലാ സ്റ്റെയിന് തുടങ്ങിയവരുടെ പ്രഭാഷണങ്ങളും രൂപതാ ബൈബിള് കലോത്സവ വിജയികളുടെ കലാ പ്രകടനങ്ങളും ചടങ്ങുകള്ക്ക് കൊഴുപ്പേകും.
അന്നേ ദിവസം വേദ പാഠവും വി. കുര്ബാനയും നടക്കുന്ന സ്ഥലങ്ങളിലെ തിരുകര്മ്മങ്ങള് മാറ്റിവയ്ക്കാനും രൂപത ഒരുക്കുന്ന ഈ ദിവസങ്ങളില് പങ്കുചേരാനും രൂപതാധ്യക്ഷന് നിര്ദ്ദേശിച്ചിട്ടുണ്ട്.
കുട്ടികളുടെ വര്ഷത്തിന്റെ ഔദ്യോഗിക സമാപനത്തോടൊപ്പം യുവജന വര്ഷത്തിന്റെ ഔപചാരിക ഉത്ഘാടനവും കര്ദ്ദിനാള് മാര് ജോര്ജ്ജ് ആലഞ്ചേരി നിര്വ്വഹിക്കും. ബര്മ്മിങ്ഹാം ബഥേല് കണ്വെന്ഷന് സെന്ററില് വച്ചാണ് ചടങ്ങുകള് നടക്കുന്നത്. എല്ലാ വി. കുര്ബ്ബാന കേന്ദ്രങ്ങളില് നിന്നും സാധിക്കുന്നത്ര കുട്ടികളും വിശ്വാസ പരിശീലകരും മാതാപിതാക്കളും ചടങ്ങുകളില് പങ്കെടുക്കണമെന്ന് രൂപതാധ്യക്ഷന് മാര് ജോസഫ് സ്രാമ്പിക്കല് അഭ്യര്ത്ഥിച്ചു.