യുകെയുടെ അനധികൃത ഇമിഗ്രേഷന്‍ കണക്കുകള്‍ ആരെയും ഞെട്ടിക്കാന്‍ പോന്നതാണ്. ഇത് നിയന്ത്രിക്കാതെ കൈവിട്ട് കൊടുത്താല്‍ കാര്യങ്ങള്‍ പ്രതിസന്ധിയിലെത്തുമെന്ന് ലേബര്‍ ഗവണ്‍മെന്റിന് ബോധ്യമുണ്ട്. പ്രത്യേകിച്ച് റിഫോം യുകെ ഈ വിഷയത്തില്‍ ഊന്നിയാണ് മുന്നേറി വരുന്നത്. ഇതിന് തടയിടാന്‍ പഴയകാല നയങ്ങള്‍ മറന്ന് നീങ്ങേണ്ടി വരുമെന്ന് തിരിച്ചറിഞ്ഞ ലേബര്‍ ഹോം സെക്രട്ടറി അനധികൃത കുടിയേറ്റക്കാരെ നിയന്ത്രിക്കാനുള്ള സുപ്രധാന നയങ്ങള്‍ പ്രഖ്യാപിച്ചു.
ജൂണ്‍ വരെയുള്ള സമയം കൊണ്ട് അനധികൃതമായി പ്രവേശിക്കുന്നവരുടെ എണ്ണത്തില്‍ 27% വര്‍ദ്ധനവ് ഉണ്ടായെന്നത് ഞെട്ടിക്കുകയാണെന്ന് ഷബാന മഹ്മൂദ് പറഞ്ഞു. ഹോം സെക്രട്ടറിയുടെ പ്രഖ്യാപനങ്ങളില്‍ സുപ്രധാന വിഷയങ്ങള്‍ ഇവയാണ്:
1) കുടുംബങ്ങളെ കുട്ടികള്‍ ഉള്‍പ്പെടെ നീക്കം ചെയ്യുക. ഇതിനായി 3000 പൗണ്ട് വരെ ധനസഹായം നല്‍കും, തയ്യാറാകാത്തവര്‍ക്കെതിരെ ബലപ്രയോഗം ഉണ്ടാകും
2) അഭയാര്‍ത്ഥിത്വം നേടുന്നവര്‍ക്ക് പെര്‍മനന്റ് റസിഡന്‍സിക്ക് 20 വര്‍ഷം കാത്തിരിക്കണം
3) അഭയാര്‍ത്ഥി അപേക്ഷകര്‍ക്ക് സാമ്പത്തിക പിന്തുണ നല്‍കാനുള്ള നിയമപരമായ ബാധ്യത ഒഴിവാക്കും. ജോലി ചെയ്യാന്‍ കഴിയുമെങ്കിലും യാതൊരു പിന്തുണയും നല്‍കില്ല
4) അഭയാര്‍ത്ഥി അപേക്ഷ തളളണോ എന്ന് തിരിച്ചറിയാന്‍ പുതിയ അപ്പീല്‍സ് ബോഡി
5) ഇമിഗ്രേഷന്‍ കേസുകളില്‍ യൂറോപ്യന്‍ കണ്‍വെന്‍ഷന്‍ ഓണ്‍ ഹ്യൂമന്‍ റൈറ്റ്‌സ് വ്യാഖ്യാനിക്കുന്നത് പരിഷ്‌കരിക്കും
6) നാടുകടത്തുന്നവരെ സ്വീകരിക്കാത്ത രാജ്യങ്ങള്‍ക്ക് വിസാ നിരോധനം
7) പുതിയ നിയമപരവും, സുരക്ഷിതവുമായ അഭയാര്‍ത്ഥി റൂട്ടുകള്‍ സൃഷ്ടിക്കും
തങ്ങളുടെ പദ്ധതികളാണ് ഷബാന മഹ്മൂദ് നടപ്പാക്കുന്നതെന്ന് റിഫോം യുകെ നേതാവ് നിഗല്‍ ഫരാഗ് പ്രതികരിച്ചു. അതേസമയം കണ്‍സര്‍വേറ്റീവ് നേതാവ് കെമി ബാഡെനോക് പദ്ധതികളെ സ്വാഗതം ചെയ്തു. എന്നാല്‍ ലേബര്‍ പാര്‍ട്ടിയിലെ ഇടത് വിഭാഗം എംപിമാര്‍ അഭയാര്‍ത്ഥികള്‍ക്ക് എതിരായ നയങ്ങളെ രൂക്ഷമായ ഭാഷയില്‍ വിമര്‍ശിക്കുകയാണ്. നയങ്ങള്‍ ക്രൂരവും, മനുഷ്യത്വരഹിതവുമാണെന്നാണ് ലേബര്‍ എംപിമാരുടെ വിമര്‍ശനം.
