പുതിയ ഹോം ലോണുകള് എടുക്കുന്ന ബ്രിട്ടീഷുകാര്ക്ക് ട്രംപിന്റെ വക എട്ടിന്റെ പണി! അമേരിക്ക ഭരിക്കുന്ന ട്രംപിന് ബ്രിട്ടനില് ഹോം ലോണ് നിരക്ക് നിശ്ചയിക്കുന്നതില് എന്താണ് കാര്യമെന്ന് സംശയം വേണ്ട, ഇറാന് യുദ്ധം തന്നെ കാരണം. ട്രംപ് തുടക്കമിട്ട ഇറാന് യുദ്ധം മൂലം ബ്രിട്ടനില് പുതിയ ഹോം ലോണുകള് എടുക്കുന്നവര്ക്ക് 800 പൗണ്ട് അധിക തിരിച്ചടവാണ് വര്ഷം സഹിക്കേണ്ടി വരുന്നത്.
ഇറാന് യുദ്ധത്തിന്റെ പശ്ചാത്തലത്തില് നേരിടുന്ന 'ട്രംപ്ഫ്ളേഷനാണ്' യുകെ മോര്ട്ട്ഗേജ് നിരക്കുകളെ ഉയര്ത്തുന്നതില് പ്രധാന പങ്ക് വഹിക്കുന്നതെന്ന് മണിഫാക്ട്സ് ചൂണ്ടിക്കാണിച്ചു. യുദ്ധം മൂലം പൊട്ടിപ്പുറപ്പെട്ട അനിശ്ചിതാവസ്ഥയുടെ പശ്ചാത്തലത്തില് ഏകദേശം 700 മോര്ട്ട്ഗേജ് ഡീലുകള് രണ്ടാഴ്ചയ്ക്കിടെ പിന്വലിക്കപ്പെട്ടെന്നാണ് കണക്ക്.
'ശരാശരി വാര്ഷിക മോര്ട്ട്ഗേജ് ബില്ലില് രണ്ടാഴ്ച കൊണ്ട് 800 പൗണ്ടാണ് മിഡില് ഈസ്റ്റ് യുദ്ധം കൂട്ടിച്ചേര്ത്തത്. ഒരു ഫിക്സഡ് റേറ്റ് ഡീല് എടുക്കാന് ആഗ്രഹിക്കുന്നവര്ക്ക് ഇത് ഒട്ടും ആഗ്രഹിക്കാത്ത വാര്ത്തയാണ്', മണിഫാക്ട്സ് കണ്സ്യൂമര് ഫിനാന്സ് ഹെഡ് ആഡം ഫ്രെഞ്ച് പറഞ്ഞു.
മാര്ച്ച് തുടക്കം 4.83 ശതമാനമായിരുന്ന ശരാശരി രണ്ട് വര്ഷത്തെ ഫിക്സഡ് റേറ്റുകള് ഇപ്പോള് 5.28 ശതമാനമായി. 2025 ഏപ്രിലിന് ശേഷമുള്ള ഏറ്റവും ഉയര്ന്ന നിലയാണിത്. അഞ്ച് വര്ഷത്തെ ഫിക്സഡ് ഡീലുകള് 4.95 ശതമാനത്തില് നിന്നും 5.32 ശതമാനവുമായി. 2025 ഫെബ്രുവരിക്ക് ശേഷമുള്ള ഉയര്ന്ന നിരക്കാണിതെന്ന് ഫ്രെഞ്ച് ചൂണ്ടിക്കാണിച്ചു.
25 വര്ഷക്കാലത്തേക്ക് 250,000 പൗണ്ട് മോര്ട്ട്ഗേജ് ഉള്ള വ്യക്തിക്ക് രണ്ട് വര്ഷത്തെ ഫിക്സഡ് നിരക്കില് 788 പൗണ്ടും, അഞ്ച് വര്ഷത്തെ ഡീലില് 651 പൗണ്ടും വര്ദ്ധിക്കുന്നതാണ് ഈ മാറ്റങ്ങള്. വീട് വാങ്ങുന്നവര്ക്കും, റീമോര്ട്ട്ഗേജ് ചെയ്യാന് ഒരുങ്ങുന്നവര്ക്കും ഈ ചെലവ് ഉയരുന്നത് തിരിച്ചടിയാണ്. 2026-ല് 1.8 മില്ല്യണ് ഫിക്സഡ് റേറ്റ് ഡീലുകള് അവസാനിക്കുമെന്നാണ് കണക്ക്.
