സ്‌കൂള്‍ വിദ്യാര്‍ഥിനിയെ ഫെയ്‌സ്ബുക്ക് സുഹൃത്ത് നാലു ദിവസം മുറിയില്‍ അടച്ചിട്ട് പീഡിപ്പിച്ചു. രാജസ്ഥാനിലെ കോട്ടയിലാണ് സംഭവം. കോട്ടയിലെ സ്വകാര്യ സ്‌കൂളില്‍ പ്ലസ് വണ്‍ വിദ്യാര്‍ഥിനിയായ പതിനാറുകാരിയെയാണ് ഫെയ്‌സ്ബുക്ക് സുഹൃത്ത് ബലാത്സംഗം ചെയ്തത്. സംഭവത്തില്‍ പ്രതികളായ പങ്കജ് ധോബി(22), ദിനേശ് ലോധ(25) എന്നിവരെ പൊലീസ് അറസ്റ്റ് ചെയ്തു അതിവേഗ കോടതിയില്‍ ഹാജരാക്കി. മെയ് 15 വരെ പ്രതികളെ ജുഡീഷ്യല്‍ കസ്റ്റഡിയില്‍ വിടാന്‍ കോടതി ഉത്തരവിട്ടു.
ബിരുദ വിദ്യാര്‍ഥിയായ പങ്കജ് ധോബി ഫെയ്‌സ്ബുക്കിലൂടെയാണ് പെണ്‍കുട്ടിയെ പരിചയപ്പെട്ടത്. ഇരുവരും ഫോണില്‍ സംസാരിക്കാറുണ്ടായിരുന്നു. ഏപ്രില്‍ 24ന് സ്‌കൂളിലേക്ക് പോകും വഴി പെണ്‍കുട്ടിയെ കണ്ടുമുട്ടിയ ഇയാള്‍ സ്‌കൂളില്‍ കൊണ്ടുവിടാമെന്ന് പറഞ്ഞ് പെണ്‍കുട്ടിയെ ബൈക്കില്‍ കയറ്റുകയായിരുന്നു. നഗരത്തില്‍ ചുറ്റിക്കറങ്ങിയ ശേഷം പങ്കജ് പെണ്‍കുട്ടിയെ മുറിയിലേക്ക് കൂട്ടിക്കൊണ്ടു പോയി. പങ്കജിന്റെ നിര്‍ദേശ പ്രകാരം സുഹൃത്തായ ദിനേശ് ഒരുക്കിയ ഹോട്ടല്‍ മുറിയിലാണ് പെണ്‍കുട്ടി പീഡിപ്പിക്കപ്പെട്ടത്.
ശനിയാഴ്ച്ച രാത്രിയോടെ കുട്ടി മുറിയില്‍ നിന്ന് രക്ഷപ്പെട്ട് വീട്ടിലെത്തി. തുടര്‍ന്നാണ് പോലീസില്‍ വിവരമറിയിക്കുന്നതും പ്രതികളെ അറസ്റ്റ് ചെയ്തതും. കുറ്റകൃത്യത്തില്‍ കൂടുതല്‍ പേര്‍ പങ്കാളികളായിട്ടുണ്ടെന്നാണ് പൊലീസിന്റെ നിഗമനം.
