ഇടതു സര്ക്കാരുമായി ഇടഞ്ഞുനില്ക്കുന്ന മുന് ചലച്ചിത്ര അക്കാദമി ചെയര്മാനും നടനുമായ പ്രേം കുമാറിനെ കോണ്ഗ്രസിലേക്ക് കൊണ്ടു വരാനുള്ള നീക്കവുമായി നേതാക്കള്. നടന് പ്രേം കുമാറുമായി കോണ്ഗ്രസ് നേതാക്കള് ചര്ച്ച നടത്തുകയാണെന്നാണ് പുറത്തുവരുന്ന വിവരം. എന്നാല് ചര്ച്ചയുടെ വിശദാംശങ്ങള് പുറത്തുവന്നിട്ടില്ല. ചലച്ചിത്ര അക്കാദമി ചെയര്മാന് സ്ഥാനത്ത് നിന്ന് മാറ്റിയത് മുതല് അതൃപ്തനാണ് പ്രേംകുമാര്. ഇതില് സര്ക്കാരിനെതിരെ കഴിഞ്ഞ ദിവസം പ്രേം കുമാര് തുറന്നടിച്ചിരുന്നു. സച്ചിദാനന്ദനെതിരെ നടപടിയെടുക്കാത്ത സര്ക്കാര്, തനിക്കെതിരെ ഏകപക്ഷീയമായ നടപടിയെടുത്തുവെന്നായിരുന്നു പ്രേംകുമാറിന്റെ വിമര്ശനം.
തുടര്ഭരണം പാടില്ലെന്ന് പറഞ്ഞ് സര്ക്കാരിനെ രൂക്ഷമായി വിമര്ശിച്ച കെ സച്ചിദാനന്ദനെ സാഹിത്യ അക്കാദമി അധ്യക്ഷ സ്ഥാനത്ത് നിന്ന് മാറ്റാത്തതിനെ ചോദ്യം ചെയ്തുകൊണ്ടാണ് പ്രേംകുമാറിന്റെ വിമര്ശനം. തന്നോട് സര്ക്കാര് കാണിച്ചത് നീതിനിഷേധമാണെന്നും ചലച്ചിത്ര അക്കാദമി ചെയര്മാന് സ്ഥാനത്ത് നിന്ന് മാറ്റിയതില് സര്ക്കാര് മാന്യത കാണിച്ചില്ലെന്നും പ്രേംകുമാര് തുറന്നടിച്ചു. യാത്രയയപ്പ് നല്കാന് പോലും തയ്യാറായില്ലെന്നും എന്തിനാണ് പുറത്താക്കിയതെന്ന് അറിയിക്കുക പോലും ചെയ്തില്ലെന്നും പ്രേംകുമാര് പറഞ്ഞിരുന്നു.
ആശാവര്ക്കര്മാരുടെ സമരത്തെ അനുകൂലിച്ചതിനെതുടര്ന്നാണ് അധ്യക്ഷ സ്ഥാനത്ത് നിന്ന് മാറ്റിയതെന്ന വിവരം മാധ്യമങ്ങളിലൂടെയാണ് അറിഞ്ഞത്. ആശാസമരത്തെ അനുകൂലിച്ച് പറഞ്ഞത് സദുദ്ദേശപരമായ അഭിപ്രായമാണ്. എന്നാല്, ഇപ്പോള് സച്ചിദാനന്ദനോട് കാണിക്കുന്നതല്ല തന്നോട് കാണിക്കുന്നതെന്നും ഗുരുതര പരാമര്ശം നടത്തിയിട്ടും സച്ചിദാനന്ദന് സാഹിത്യ അക്കാദമി അധ്യക്ഷ സ്ഥാനത്ത് തന്നെ തുടരുകയാണെന്നും പ്രേംകുമാര് തുറന്നടിച്ചിരുന്നു.
