ബാങ്ക് ഓഫ് ഇംഗ്ലണ്ട് പലിശ നിരക്കുകള്‍ വര്‍ദ്ധിപ്പിക്കുമെന്ന ഉറപ്പില്‍ ബ്രിട്ടനില്‍ മോര്‍ട്ട്‌ഗേജ് നിരക്കുകള്‍ക്ക് തീപിടിക്കുന്നു. അഞ്ച് വര്‍ഷത്തെ ഫിക്‌സഡ് മോര്‍ട്ട്‌ഗേജ് നിരക്കുകള്‍ മൂന്ന് വര്‍ഷത്തിനിടെ ആദ്യമായി 6 ശതമാനത്തില്‍ എത്തി. ഇതോടെ ധനവിപണിയില്‍ ലോണുകള്‍ നല്‍കുന്നത് ചെലവേറിയ കാര്യമായി മാറുകയാണ്.
മണിഫാക്‌സ് നല്‍കുന്ന റിപ്പോര്‍ട്ട് പ്രകാരം അഞ്ച് വര്‍ഷത്തെ ശരാശരി നിരക്ക് 6 ശതമാനത്തിലാണ്. 2023 സെപ്റ്റംബറിന് ശേഷമുള്ള ഏറ്റവും ഉയര്‍ന്ന നിരക്കാണ് ഇത്. രണ്ട് വര്‍ഡഷത്തെ ഫിക്‌സഡ് നിരക്കുകളും തൊട്ടുപിന്നാലെയുണ്ട്, 5.98%. ഇതാകട്ടെ 2023 ഡിസംബറിന് ശേഷമുള്ള ഉയര്‍ന്ന നിരക്കാണ്.
ബാങ്ക് ഓഫ് ഇംഗ്ലണ്ട് ബേസ് റേറ്റുകള്‍ വര്‍ദ്ധിപ്പിക്കുമെന്ന പ്രതീക്ഷയിലാണ് ബാങ്കുകളും, ബില്‍ഡിംഗ് സൊസൈറ്റികളും നിരക്കുകള്‍ വര്‍ദ്ധിപ്പിച്ച് തുടങ്ങിയത്. 5 ശതമാനത്തില്‍ താഴെ ലഭിക്കുന്ന ഫിക്‌സഡ് റേറ്റ് മോര്‍ട്ട്‌ഗേജുകളുടെ എണ്ണം കേവലം 9 ആയി ചുരുങ്ങിയെന്നതാണ് ഞെട്ടിക്കുന്ന വിഷയം. ഈ മാസം തുടങ്ങുമ്പോള്‍ 1494 ഡീലുകള്‍ ഉണ്ടായിരുന്നിടത്താണ് ഈ മാറ്റം.
കഴിഞ്ഞ വര്‍ഷം ഡിസംബര്‍ മുതല്‍ ബാങ്ക് ഓഫ് ഇംഗ്ലണ്ട് ബേസ് റേറ്റില്‍ മാറ്റം വരുത്തുന്നില്ല. എന്നാല്‍ ബോണ്ട് വിപണിയിലെ ചാഞ്ചാട്ടം ഫിക്‌സഡ് റേറ്റ് മോര്‍ട്ട്‌ഗേജുകളുടെ വില ഉയര്‍ത്തുകയാണ്. ഫിക്‌സഡ് റേറ്റ് ഡീലുകളുടെ കാലാവധി തീരുന്ന ഭവനഉടമകള്‍ക്കാണ് ഇതൊരു മോശം വാര്‍ത്തയായി മാറുന്നത്.
