Breaking Now

വനിതാ ലോകകപ്പ്‌: ഇന്ത്യക്കു തോല്‍വി

ഏകദിന വനിതാ ലോകകപ്പില്‍ ഇന്ത്യക്കു തോല്‍വി. നിലവിലെ ജേതാക്കളായ ഇംഗ്ലണ്ടിനോട്‌ 32 റണ്‍സിന്‍റെ തോല്‍വിയാണ്‌ ഗ്രൂപ്പ്‌ എയിലെ രണ്ടാം മത്സരത്തില്‍ ആതിഥേയര്‍ വഴങ്ങിയത്‌.

ആദ്യം ബാറ്റ്‌ ചെയ്‌ത ഇംഗ്ലണ്ട്‌ 273 റണ്‍സിന്‍റെ  വിജയലക്ഷ്യമാണ്‌ ഇന്ത്യക്കു മുന്നില്‍ വച്ചത്‌. ആദ്യമത്സരത്തില്‍ ശ്രീലങ്കയോട്‌ തോല്‍വി വഴങ്ങേണ്ടിവഴങ്ങേണ്ടിവന്നതോടെ ടൂര്‍ണമെന്റിലെ നിലനില്‍പുതന്നെ തുലാസിലായ സമ്മര്‍ദത്തിലാണ്‌ ഇംഗ്ലണ്ട്‌ കളത്തിലിറങ്ങിയത്‌. ക്യാപ്‌റ്റന്‍ ഷാര്‍ലറ്റ്‌ എഡ്‌വേര്‍ഡ്‌സ്‌ സെഞ്ചുറി പ്രകടനവുമായി (109) മുന്നില്‍നിന്നു പടനയിച്ചതോടെ ഇംഗ്ലണ്ട്‌ കൂറ്റന്‍ സ്‌കോര്‍ പടുത്തുയര്‍ത്തുകയും ചെയ്‌തു.
കരിയറിലെ ഏഴാം സെഞ്ചുറി കുറിച്ച എഡ്‌വേര്‍ഡ്‌സ്‌ വനിതാ ഏകദിന ക്രിക്കറ്റിലെ റണ്‍വേട്ടക്കാരില്‍ മുന്നിലെത്തുകയും ചെയ്‌തു. വിജയലക്ഷ്യം പിന്തുടര്‍ന്ന്‌ ഇന്ത്യക്ക്‌ നിശ്‌ചിത അന്‍പതോവറില്‍ ഒന്‍പതു വിക്കറ്റ്‌ നഷ്‌ടപ്പെട്ട്‌ 240 റണ്‍സെടുക്കാനേ കഴിഞ്ഞുള്ളൂ. മധ്യനിരയില്‍ ഹര്‍മാന്‍പ്രീത്‌ കൗറിന്റെ സെഞ്ചുറി (പുറത്താകാതെ 107)യും ഇന്ത്യയെ വിജയതീരത്തെത്തിച്ചില്ല. കരുണാ വിജയകുമാര്‍ ജെയ്‌ന്‍ 56 റണ്‍സുമായി കൗറിനു മികച്ച പിന്തുണ നല്‍കിയെങ്കിലും മറ്റുള്ളവര്‍ സമ്മര്‍ദത്തിനു കീഴ്‌പ്പെട്ടതോടെ ലക്ഷ്യത്തിന്‌ 32 റണ്‍സകലെ ഇന്ത്യന്‍ ടീം കാലിടറി വീണു. കൂറ്റന്‍ സ്‌കോര്‍ പിന്തുടര്‍ന്ന ഇന്ത്യ ഒരു ഘട്ടത്തില്‍ മൂന്നു വിക്കറ്റിന്‌ 29 റണ്‍സിലേക്കു വീണതോടെ വമ്പന്‍ തോല്‍വി വഴങ്ങുമെന്നു കരുതിയതാണ്‌. എന്നാല്‍ കൗറും ജെയ്‌നുമൊത്തുള്ള കൂട്ടുകെട്ട്‌ ടീമിനെ കരകയറ്റി.
എന്നാല്‍ ജെയ്‌ന്‍ പുറത്തായശേഷം വന്ന ജുലാന്‍ ഗോസ്വാമിക്കും റീമ മല്‍ഹോത്രയ്‌ക്കും ഇംഗ്ലീഷ്‌ ബൗളിംഗിനു മുന്നില്‍ പിടിച്ചു നില്‍ക്കാന്‍ കഴിയാതെ വന്നതാണ്‌ ഇന്ത്യക്കു തിരിച്ചടിയായത്‌. വാലറ്റത്ത്‌ അമിത ശര്‍മയും നിരഞ്‌ജനയും പൂജ്യത്തിനു പുറത്തായതും വിനയായി.
ഇംഗ്ലണ്ടിനുവേണ്ടി ബ്രണ്ട്‌ നാലും െവെറ്റ്‌ രണ്ടും വിക്കറ്റുകള്‍ വീഴ്‌ത്തി. ആദ്യം ബാറ്റ്‌ ചെയ്‌ത ഇംഗ്ലണ്ടിനുവേണ്ടി എഡ്‌വേഡ്‌സിനു പുറമേ സാറാ ടെയ്‌ലര്‍ (35), ലിഡിയ ഗ്രീന്‍വേ (29), കാത്‌റീന്‍ ബ്രണ്ട്‌ (21) എന്നിവര്‍ തരക്കേടില്ലാതെ ബാറ്റ്‌ വീശിയപ്പോള്‍ ബ്രിന്‍ഡില്‍ 37 റണ്‍സുമായി പുറത്താകാതെ നിന്നു. മൂന്നു നിര്‍ണായക റണ്ണൗട്ടുകള്‍ക്കിടയിലും കൂറ്റന്‍ സ്‌കോര്‍ നേടാന്‍ കഴിഞ്ഞത്‌ ഇംഗ്ലണ്ടിനു നേട്ടമായി. ഇന്ത്യക്കുവേണ്ടി ജുലാന്‍ ഗോസ്വാമിയും നിരഞ്‌ജനയും രണ്ടു വിക്കറ്റ്‌വീതം വീഴ്‌ത്തി.




കൂടുതല്‍വാര്‍ത്തകള്‍.