50 പേര് മരിക്കാനിടയായ കുവൈറ്റിലെ മംഗഫിലെ തൊഴിലാളി ക്യാമ്പിലുണ്ടായ തീപിടിത്തവുമായി ബന്ധപ്പെട്ട് എട്ടുപേര് കസ്റ്റഡിയില്. കസ്റ്റഡിയില് എടുത്തവരില് ഇന്ത്യക്കാരും ഉള്പ്പെടുന്നു. കോടതി നിര്ദേശ പ്രകാരമാണ് ഇവരെ കസ്റ്റഡിയില് എടുത്തത്.
കസ്റ്റഡിയിലിടുത്തവരില് മൂന്ന് ഇന്ത്യക്കാര്, ഒരു കുവൈറ്റ് സ്വദേശി, നാല് ഈജിപ്റ്റ് പൌരന്മാര് എന്നിങ്ങനെയാണുള്ളതെന്ന് വാര്ത്താ ഏജന്സി റിപ്പോര്ട്ട് ചെയ്യുന്നു. ഇവരുടെ മേല് നരഹത്യ, ഗുരുതരമായ അശ്രദ്ധ എന്നീ കുറ്റങ്ങള് കോടതി ചുമത്തി. പിടികൂടിയവരെ രണ്ടാഴ്ചത്തേക്ക് കസ്റ്റഡിയില്വെക്കാനാണ് കോടതി നിര്ദേശം.
കഴിഞ്ഞ ബുധനാഴ്ച പുലര്ച്ചെ നാലുമണിയോടെയായിരുന്നു മം?ഗഫിലെ തൊഴിലാളി ക്യാമ്പില് തീപിടിത്തം ഉണ്ടായത്. തീപിടിത്തത്തില് 50 പേര് മരിച്ചു. അപകടത്തില് മരിച്ചത് 49 ഇന്ത്യക്കാരെന്നാണ് ഔദ്യോഗിക സ്ഥിരീകരണം. ഇതില് 46 പേരെ തിരിച്ചറിഞ്ഞു. മരിച്ചവരില് ഭൂരിഭാഗവും മലയാളികളായിരുന്നു. ഷോര്ട്ട് സര്ക്യൂട്ട് കാരണമാണ് തീപിടിത്തമുണ്ടായതെന്നാണ് കുവൈറ്റ് ഫയര്ഫോഴ്സിന്റെ അന്വേഷണ റിപ്പോര്ട്ട്. ഗാര്ഡിന്റെ റൂമില് നിന്നാണ് തീപിടിത്തമുണ്ടായതെന്നും ഫയര്ഫോഴ്സ് പ്രസ്താവനയില് വ്യക്തമാക്കിയിട്ടുണ്ട്.
ജോലി കഴിഞ്ഞ് തൊഴിലാളികള് ഉറങ്ങുന്ന സമയത്താണ് തീപിടിത്തം ഉണ്ടായത്. ഇതാണ് മരണസംഖ്യ ഉയരാന് കാരണമായത്. സുരക്ഷാ വീഴ്ചയുടെ പേരില് രണ്ട് പേര് റിമാന്ഡിലായതായി കുവൈറ്റ് വാര്ത്താ ഏജന്സി അറിയിച്ചിരുന്നു. ഒരു കുവൈറ്റ് പൗരനും ഒരു വിദേശ പൗരനും ആണ് റിമാന്ഡിലായതെന്നും റിപ്പോര്ട്ടില് പറയുന്നു. എന്നാല് ഇവരുടെ പേര് വിവരങ്ങള് അധികൃതര് പുറത്തുവിട്ടിട്ടില്ല. ചട്ട ലംഘനങ്ങളുടെ പേരിലായിരുന്നു നടപടി.