വാട്ടര്‍ ബില്ലുകള്‍ കുത്തനെ ഉയരുമെന്ന് പ്രഖ്യാപിച്ച് വാട്ടര്‍ യുകെ. ലക്ഷക്കണക്കിന് കുടുംബങ്ങളുടെ കുടുംബ ബജറ്റ് അട്ടിമറിക്കുന്ന തീരുമാനമാണ് റെഗുലേറ്റര്‍ കൈക്കൊണ്ടിരിക്കുന്നത്. ഇതോടെ ഏപ്രില്‍ മാസത്തില്‍ 47% വരെ നിരക്ക് വര്‍ദ്ധനവാണ് കുടുംബങ്ങള്‍ നേരിടേണ്ടി വരുന്നത്.
ശരാശരി വാര്‍ഷിക വാട്ടര്‍, വേസ്റ്റ് വാട്ടര്‍ ബില്ലുകള്‍ 123 പൗണ്ടാണ് വര്‍ദ്ധിക്കുക. ഇതോടെ ശരാശരി ബില്ലുകള്‍ 480 പൗണ്ടില്‍ നിന്നും 603 പൗണ്ടിലേക്കാണ് ഉയരുക. പ്രതിമാസം ഏകദേശം 10 പൗണ്ടാണ് കുതിച്ചുചാട്ടം. അതേസമയം രാജ്യത്തിന്റെ വിവിധ ഭാഗങ്ങളില്‍ വ്യത്യസ്തമായ നിരക്ക് വര്‍ദ്ധനവുകളാണ് അനുഭവപ്പെടുക.
സതേണ്‍ വാട്ടര്‍ ഉപഭോക്താക്കള്‍ക്കാണ് ഏറ്റവും ഉയര്‍ന്ന വര്‍ദ്ധന അനുഭവിക്കേണ്ടി വരിക. ഇവരുടെ സേവനങ്ങള്‍ ഉപയോഗിക്കുന്ന ജനങ്ങള്‍ക്ക് 224 പൗണ്ടാണ് ബില്‍ ഉയരുന്നത്. ഇതോടെ ശരാശരി വാര്‍ഷിക ചെലവ് 703 പൗണ്ടിലെത്തും. 
അധികം പിന്നിലല്ലാതെ ഹാഫ്രെന്‍ ഡിഫര്‍ഡ്വി ബില്ലുകള്‍ നിലയുറപ്പിക്കുന്നു. 32% നിരക്ക് വര്‍ദ്ധനയുള്ളതിനാല്‍ പ്രതിവര്‍ഷം 447 പൗണ്ടില്‍ നിന്നും 590 പൗണ്ടിലേക്കാണ് നിരക്ക് ഉയരുക. സൗത്ത് വെസ്റ്റ് വാട്ടര്‍ ബില്ലുകള്‍ 520 പൗണ്ടില്‍ നിന്നും 686 പൗണ്ടിലേക്കും വര്‍ദ്ധിക്കും.
തെയിംസ് വാട്ടര്‍ ഉപഭോക്താക്കള്‍ക്ക് 31% വര്‍ദ്ധനവാണ് വഹിക്കേണ്ടി വരിക. യോര്‍ക്ക്ഷയര്‍ വാട്ടര്‍ 29% വര്‍ദ്ധനവിനും പദ്ധതിയിടുന്നു. അതേസമയം എസ്ഇഎസ് വാട്ടര്‍ സപ്ലൈ ചെയ്യുന്ന കുടുംബങ്ങള്‍ക്ക് ഇതിനിടയില്‍ നിരക്കില്‍ ആശ്വാസം ലഭിക്കും. ഇവരുടെ നിരക്ക് 5 പൗണ്ട് കുറഞ്ഞ് 254 പൗണ്ടില്‍ നിന്നും 249 പൗണ്ടിലേക്കാണ് കുറയുക. വാട്ടര്‍ മീറ്ററും, എത്ര വെള്ളം ഉപയോഗിക്കുന്നു എന്നതും അനുസരിച്ചാണ് നിരക്ക് വര്‍ദ്ധന നിശ്ചയിക്കുക.
