ഏഴാമത് യുക്മ - ഫസ്റ്റ് കോള്‍ കേരളപൂരം വള്ളംകളിയുടെ ഒരുക്കങ്ങള്‍ വളരെ വേഗത്തില്‍ പുരോഗമിക്കുകയാണ്. ആഗസ്റ്റ് 30 ശനിയാഴ്ച റോഥര്‍ഹാം മാന്‍വേഴ്‌സ് തടാകത്തില്‍ വെച്ച് നടക്കുന്ന വള്ളംകളിയില്‍ പൊതു വിഭാഗത്തില്‍ 32 ടീമുകള്‍ മത്സരിക്കുവാന്‍ എത്തുമ്പോള്‍ വനിതാ വിഭാഗത്തില്‍ ഇതാദ്യമായി 12 ടീമുകള്‍ മത്സരിക്കുവാന്‍ എത്തുന്നു. വനിതാ വിഭാഗത്തില്‍ മത്സരിക്കുന്ന നാല് ടീമുകളെ ഇന്ന് പരിചയപ്പെടാം.
സ്‌കന്തോര്‍പ് പെണ്‍കടുവകള്‍
ജിയ രഞ്ജിത് നയിക്കുന്ന സ്‌കന്തോര്‍പ് പെണ്‍കടുവകള്‍ 2022, 2023 വര്‍ഷങ്ങളിലെ വിജയം ആവര്‍ത്തിക്കുവാനുള്ള ചിട്ടയായ പരിശീലനം ആരംഭിച്ച് കഴിഞ്ഞു. 2024 ല്‍ കൈവിട്ട വിജയം ഇക്കുറി എങ്ങിനെയും തിരികെപ്പിടിക്കണമെന്ന ലക്ഷ്യം മാത്രമേ സ്‌കന്തോര്‍പ് പെണ്‍കടുവകള്‍ക്ക് മുന്നിലുള്ളൂ. വിജയക്കുതിപ്പിലേക്ക് അനായാസം എത്തുവാനുള്ള കഠിന പരിശ്രമത്തിലാണ് സ്‌കന്തോര്‍പ് മലയാളി അസ്സോസ്സിയേഷനിലെ പെണ്‍കടുവകള്‍. മുന്‍ വര്‍ഷങ്ങളിലെ മത്സര പരിചയവും ടീമിന്റെ ഒത്തിണക്കവും ഏത് കരുത്തരേയും നേരിടാനുള്ള ആത്മ വിശ്വാസം പെണ്‍കടുവകള്‍ക്ക് നല്‍കുന്നു.
SKCA വിമന്‍സ് ബോട്ട് ക്ളബ്ബ്, ഷെഫീല്‍ഡ്
ജോബി ആന്‍ അബ്രഹാം ക്യാപ്റ്റനായുള്ള SKCA വിമന്‍സ് ബോട്ട് ക്ളബ്ബ് യുക്മ - ഫസ്റ്റ് കോള്‍ വള്ളംകളി മത്സരത്തിനെത്തുന്നത് തികഞ്ഞ ആത്മ വിശ്വാസത്തിലാണ്. ഷെഫീല്‍ഡ് കേരള കള്‍ച്ചറല്‍ അസ്സോസ്സിയേഷന്റെ വനിതകള്‍ അണി നിരക്കുന്ന ടീം കൃത്യമായ പരിശീലനത്തിലൂടെ മത്സരത്തിന് ഒരുങ്ങുകയാണ്. യുക്മയുടെ കലാ കായികമേളകളില്‍ മുന്‍ നിരയില്‍ നില്‍ക്കുന്ന SKCA വള്ളംകളിയിലും തങ്ങളുടെ വിജയം ഉറപ്പിക്കുവാനുള്ള വാശിയിലാണ് തയ്യാറെടുപ്പുകള്‍ നടത്തുന്നത്.
കാസ്സില്‍ വ്യൂ ക്രിക്കറ്റ് ക്ളബ്ബ്, ചെസ്റ്റര്‍ഫീല്‍ഡ്
റോണിയ ബിബിന്‍ ക്യാപ്റ്റനായുള്ള കാസ്സില്‍ വ്യൂ ക്രിക്കറ്റ് ക്ളബ്ബ് ടീം വള്ളംകളിക്കെത്തുന്നത് കൃത്യമായ പരിശീലനം നല്‍കിയ ആത്മ വിശ്വാസത്തിലാണ്. കാസ്സില്‍ വ്യൂ ക്രിക്കറ്റ് ക്ളബ്ബ് ടീം വിജയത്തില്‍ കുറഞ്ഞതൊന്നും തങ്ങളുടെ ലക്ഷ്യത്തിലില്ലയെന്ന ഉറച്ച ബോദ്ധ്യത്തില്‍ കഠിനമായ പരിശീലനം തുടരുകയാണ്. തഴക്കവും പഴക്കവും ചെന്ന മറ്റ് ടീമുകളെ മറികടക്കുവാന്‍ തങ്ങളുടെ പരിശീലനം വഴി കഴിയുമെന്നാണ് ടീമിന്റെ പ്രതീക്ഷ.
സ്റ്റാര്‍സ് ഓഫ് ബി.സി.എം.സി, ബര്‍മിംഗ്ഹാം
BCMC ബര്‍മിംഗ്ഹാമിന്റെ സ്റ്റാര്‍സ് ഓഫ് ബി സി എം സിയെ നയിക്കുന്നത് ബീന ബെന്നിയാണ്. യുക്മ - ഫസ്റ്റ് കോള്‍ വള്ളംകളിയില്‍ വിജയം തങ്ങളുടേത് മാത്രമാണെന്ന് ഉറപ്പിച്ചാണ് ബര്‍മിംഗ്ഹാം കള്‍ച്ചറല്‍ മലയാളി കമ്യൂണിറ്റിയിലെ വനിതകള്‍ ഇക്കുറി മത്സരത്തിനെത്തുന്നത്. യുക്മ കലാ കായികമേളകളില്‍ ചാമ്പ്യന്‍ പട്ടം നേടുന്ന BCMC വള്ളംകളിയിലും വിജയം നേടാന്‍ കഴിയുമെന്ന പ്രതീക്ഷയിലാണ്. ചിട്ടയായ പരിശീലനം അതിന് ടീമിന് കരുത്തേകുമെന്ന വിശ്വാസമാണ് ടീമിനുള്ളത്.
കാണികളില്‍ ഏറെ ആവേശം ജനിപ്പിക്കുന്ന കായിക ഇനമായ വള്ളംകളിയും മലയാളികളുടെ പ്രിയപ്പെട്ട കലാരൂപങ്ങളായ തിരുവാതിര, തെയ്യം, പുലികളി തുടങ്ങിയ തനത് കലകളും ആസ്വദിക്കുവാന്‍ മുഴുവന്‍ യുകെ മലയാളികളേയും ആഗസ്റ്റ് 30 ന് മാന്‍വേഴ്‌സ് തടാകക്കരയിലേയ്ക്ക് സ്വാഗതം ചെയ്യുന്നതായി യുക്മ ദേശീയ പ്രസിഡന്റ് അഡ്വ. എബി സെബാസ്റ്റ്യന്‍, ജനറല്‍ സെക്രട്ടറി ജയകുമാര്‍ നായര്‍, ട്രഷറര്‍ ഷീജോ വര്‍ഗ്ഗീസ് എന്നിവര്‍ അറിയിച്ചു.
യുക്മ - ഫസ്റ്റ് കോള്‍ കേരളപൂരം വള്ളംകളി 2025 സ്‌പോണ്‍സര്‍ ചെയ്യുന്നതിനും കൂടുതല്‍ വിവരങ്ങള്‍ക്കുമായി താഴെ പറയുന്നവരെ ബന്ധപ്പെടേണ്ടതാണ്.
അഡ്വ. എബി സെബാസ്റ്റ്യന്‍ - 07702862186
ജയകുമാര്‍ നായര്‍ - 07403223006
ഡിക്‌സ് ജോര്‍ജ്ജ് - 07403312250
കേരളപൂരം വള്ളംകളി നടക്കുന്ന വേദിയുടെ വിലാസം:-
Manvers Lake
Station Road
Wath-Upon-Dearne
Rotherham
South Yorkshire.
S63 7DG.
കുര്യന്‍ ജോര്‍ജ്ജ്
(നാഷണല്‍ പി.ആര്‍.ഒ & മീഡിയ കോര്‍ഡിനേറ്റര്‍)
