യുക്മ - ഫസ്റ്റ് കോള്‍ കേരളപൂരം വള്ളംകളി 2025 ലെ വനിതകളുടെ വിഭാഗത്തില്‍ 12 വനിതാ ടീമുകള്‍ മത്സരിക്കുവാനെത്തുന്നു. 2017 ല്‍ തുടങ്ങിയ യുക്മ വള്ളംകളിയുടെ ചരിത്രത്തില്‍ ആദ്യമായാണ് ഇത്രയും ടീമുകള്‍ വനിതാ വിഭാഗത്തില്‍ പങ്കെടുക്കുന്നത്. 2024 ല്‍ 9 ടീമുകള്‍ പങ്കെടുത്ത സ്ഥാനത്ത് ഇക്കുറി 12 ടീമുകളായി വര്‍ദ്ധിച്ചത് യുക്മ വള്ളംകളിയുടെ ജനപ്രീതിയുടെ തെളിവായി കാണാം. വനിതാ വിഭാഗത്തില്‍ മത്സരിക്കുന്ന നാല് ടീമുകളെ പരിചയപ്പെടാം.
ടീം ലിമ ലിവര്‍പൂള്‍
ജൂലി ഫിലിപ്പ് ക്യാപ്റ്റനായി എത്തുന്ന ടീം ലിമ ലിവര്‍പൂള്‍ തികഞ്ഞ വിജയ പ്രതീക്ഷയോടെയാണ് മത്സരത്തിനെത്തുന്നത്. കഠിനമായ പരിശീലനത്തിലൂടെ കൈവന്ന ആത്മവിശ്വാസം കൈമുതലാക്കി മത്സരത്തിനെത്തുന്ന ടീം ലിമ വിജയത്തില്‍ കുറഞ്ഞൊന്നും ലക്ഷ്യമാക്കുന്നില്ല. പ്രവര്‍ത്തന മികവിന്റെ 25 വര്‍ഷം പൂര്‍ത്തിയാക്കുന്ന ലിമയുടെ വനിതകള്‍, വിജയത്തിലൂടെ സില്‍വര്‍ ജൂബിലി ആഘോഷം കൂടുതല്‍ വര്‍ണ്ണാഭമാക്കുവാനുള്ള തയ്യാറെടുപ്പിലാണ്. ആഴ്ചകള്‍ നീണ്ട് നില്‍ക്കുന്ന പരിശീലനത്തിന് ശേഷമാണ് ടീം ലിമ മത്സരത്തിനെത്തുന്നത്.
NMCA നോട്ടിംങ്ഹാം
ഷൈനി കുര്യന്റെ നായകത്വത്തിലാണ് എന്‍.എം.സി.എ നോട്ടിംഗ്ഹാം വനിതകള്‍ ഇക്കുറിയും യുക്മ - ഫസ്റ്റ് കോള്‍ വള്ളംകളി മത്സരത്തിനെത്തുന്നത്. ചിട്ടയായ പരിശീലനം വഴി വിജയത്തിലെത്താമെന്ന പ്രതീക്ഷയിലാണ് നോട്ടിംഗ്ഹാം മലയാളി കള്‍ച്ചറല്‍ അസ്സോസ്സിയേഷനിലെ വനിതകള്‍. തങ്ങളുടെ പരിചയ സമ്പത്തിലൂടെ മത്സര സമ്മര്‍ദ്ദം മറികടക്കാമെന്ന് കരുതുന്ന ടീം നോട്ടിംഗ്ഹാം ഇക്കുറി വിജയം മാത്രമാണ് ലക്ഷ്യമിടുന്നത്.
ട്രെയില്‍ ബ്ളേസ്സേഴ്സ് വിഗന്‍
സോണിയ ജോസിന്റെ നേതൃത്വത്തില്‍ വിഗന്‍ മലയാളി അസ്സോസ്സിയേഷനിലെ വനിതകള്‍ അണി നിരക്കുന്ന ട്രെയില്‍ ബ്ളേസ്സേഴ്സ് വിഗന്‍ വിജയത്തില്‍ കുറഞ്ഞൊന്നും പ്രതീക്ഷിക്കുന്നില്ല. ചിട്ടയായി നടത്തി വരുന്ന പരിശീലനവും തികഞ്ഞ അച്ചടക്കവുമാണ് ടീമിന്റെ കരുത്ത്. തുടര്‍ച്ചയായുള്ള പരിശീലനം നല്‍കുന്ന ആത്മവിശ്വാസം ഏത് കരുത്തരേയും നേരിടാമെന്നുള്ള ധൈര്യം ടീമിന് നല്‍കുന്നു.
പെണ്‍കരുത്ത് EYCO ഹള്‍
ശീതള്‍ മാര്‍ക്ക് ക്യാപ്റ്റനായുള്ള പെണ്‍കരുത്തിന്റെ കരുത്ത് ഹള്ളിലെ ഈസ്റ്റ് യോര്‍ക്ക്ഷയര്‍ കള്‍ച്ചറല്‍ അസ്സോസ്സിയേഷനിലെ വനിതകളാണ്. കൃത്യമായ പരിശീലനം നടത്തി വരുന്ന ടീം പെണ്‍കരുത്ത് ഏത് വമ്പനേയും നേരിടാനുള്ള തയ്യാറെടുപ്പിലാണ് മത്സരത്തിനെത്തുന്നത്. തഴക്കവും പഴക്കവും ചെന്ന ടീമുകളെ മറികടക്കുവാന്‍ പരിശീലനം വഴി തങ്ങള്‍ക്ക് കഴിയുമെന്ന വിശ്വാസമാണ് ടീമിന്റെ ബലം.
കായിക പ്രേമികളുടെ ഇഷ്ട ഇനമായ വള്ളംകളിയും കലാസ്വാദകരുടെ പ്രിയപ്പെട്ട കലാരൂപങ്ങളായ തിരുവാതിര, തെയ്യം, പുലികളി എന്നിവയോടൊപ്പം വിവിധ തരം നൃത്ത നൃത്യങ്ങളും സംഗീതവും ആസ്വദിക്കുവാന്‍ മുഴുവന്‍ യുകെ മലയാളികളേയും ആഗസ്റ്റ് 30 ശനിയാഴ്ച മാന്‍വേഴ്‌സ് തടാകക്കരയിലേയ്ക്ക് സ്വാഗതം ചെയ്യുന്നതായി യുക്മ ദേശീയ പ്രസിഡന്റ് അഡ്വ. എബി സെബാസ്റ്റ്യന്‍, ജനറല്‍ സെക്രട്ടറി ജയകുമാര്‍ നായര്‍, ട്രഷറര്‍ ഷീജോ വര്‍ഗ്ഗീസ് എന്നിവര്‍ അറിയിച്ചു.
യുക്മ - ഫസ്റ്റ് കോള്‍ കേരളപൂരം വള്ളംകളി 2025 സ്‌പോണ്‍സര്‍ ചെയ്യുന്നതിനും കൂടുതല്‍ വിവരങ്ങള്‍ക്കുമായി താഴെ പറയുന്നവരെ ബന്ധപ്പെടേണ്ടതാണ്.
അഡ്വ. എബി സെബാസ്റ്റ്യന്‍ - 07702862186
ജയകുമാര്‍ നായര്‍ - 07403223006
ഡിക്‌സ് ജോര്‍ജ്ജ് - 07403312250
കേരളപൂരം വള്ളംകളി നടക്കുന്ന വേദിയുടെ വിലാസം:-
Manvers Lake
Station Road
Wath-Upon-Dearne
Rotherham
South Yorkshire.
S63 7DG.
കുര്യന്‍ ജോര്‍ജ്ജ്
(നാഷണല്‍ പി.ആര്‍.ഒ & മീഡിയ കോര്‍ഡിനേറ്റര്‍)
