നോര്വിച്ച്: യു കെ യില് മക്കളെ സന്ദര്ശിക്കുവാനെത്തിയ പിതാവ് നോര്വിച്ചില് നിര്യാതനായി. നോര്വിച്ചില് താമസിക്കുന്ന അനിത ജെറീഷ് , അമല സഞ്ജു , അനൂപ് സേവ്യര് എന്നിവരുടെ പിതാവാണ് നിര്യാതനായ സേവ്യര് ഫിലിപ്പോസ് മരങ്ങാട്ട് ( അപ്പച്ചന്കുട്ടി 73 ). കോട്ടയം തുരുത്തി സ്വദേശിയായ പരേതന് ചങ്ങനാശ്ശേരി അതിരൂപതയുടെ കീഴില് മര്ത്ത മറിയം ഫൊറോനാ പള്ളി ഇടവകാംഗമാണ്. പരേതന്റെ അന്ത്യോപചാര കര്മ്മങ്ങളും, സംസ്ക്കാരവും പിന്നീട് നോര്വിച്ചില് വെച്ച് നടത്തുവാനാണ് കുടുംബാംഗങ്ങള് ആഗ്രഹിക്കുന്നത്.
പരേതന്റെ മകന് അനൂപിന്റെ കുട്ടികളുടെ പ്രഥമ ദിവ്യകാരുണ്യ സ്വീകരണത്തിലും, മാമ്മോദീസയിലും പങ്കുചേരുവാനുള്ള അദമ്യമായ ആഗ്രഹത്തിലാണ് സേവ്യര് നോര്വിച്ചില് എത്തുന്നത്. യു കെ യില് എത്തി കുറച്ചു ദിവസങ്ങള്ക്കുള്ളില് ഹൃദയ സംബന്ധമായ അസുഖത്തെ തുടര്ന്ന്
സേവ്യറിനെ ഹോസ്പിറ്റലില് പ്രവേശിപ്പിച്ചിരുന്നു. പിന്നീട് ഹോസ്പിറ്റല് നിന്നും ഡിസ്ചാര്ജ് ആയെങ്കിലും ആരോഗ്യം പൂര്ണ്ണമായി തിരിച്ചു പിടിക്കുവാനായില്ല. സേവ്യറിന്റെ ആഗ്രഹ പ്രകാരം കൂദാശകള് മുന് നിശ്ചയ പ്രകാരമല്ലാതെ മറ്റൊരു ദിവസം ലളിതമായി നടത്തുവാനും അതില് പങ്കെടുക്കുവാനും അനുഗ്രഹങ്ങള് നേരുവാനും സേവ്യറിന് സാധിച്ചിരുന്നു.
ആരോഗ്യ നില വീണ്ടും വഷളായതിനെ തുടര്ന്ന് ഹോസ്പിറ്റലില് പ്രവേശിപ്പിച്ച് വിദഗ്ധ ചികിത്സകള് നല്കിയെങ്കിലും സേവ്യര് മരണത്തിനു കീഴടങ്ങുകയായിരുന്നു
നോര്വിച്ച് സെന്റ് തോമസ് സീറോമലബാര് മിഷന് പ്രീസ്റ്റ്, ഫാ. ജിനു മുണ്ടുനടക്കല് അന്ത്യകൂദാശ നല്കുകയും, വിവിധ ദിവസനാളില് സന്ദര്ശിച്ചു പ്രാര്ത്ഥിക്കുകയും കുടുംബാംഗങ്ങളെ ആശ്വസിപ്പിക്കുകയും ചെയ്തിരുന്നു. ക്നാനായ സുറിയാനി പള്ളി വികാരി ഫാ. ജോമോന് പുന്നൂസും രോഗിയെയും, കുടുംബാംഗങ്ങളെയും സന്ദര്ശിച്ചു പ്രാര്ത്ഥനകള് നേര്ന്നിരുന്നു.
മികച്ച ഫുട്ബോള് കളിക്കാരനായിരുന്ന സേവ്യര് ഫിലിപ്പോസ്, മുന് സന്തോഷ് ട്രോഫി താരം എം പി പാപ്പച്ചന്റെ പുത്രനാണ്. കോട്ടയം ജില്ലാ ഫുട്ബോള് ടീമിന്റെ ക്യാപ്റ്റനായും സേവ്യര് കളിച്ചിട്ടുണ്ട്.
ഭാര്യ കരിങ്ങട കുടുംബാംഗം, പരേതയായ ലിസമ്മ സേവ്യര് തുരുത്തി. അന്സ് ജിന്റ്റാ (കുവൈറ്റ്), നോര്വിച്ചില് താമസിക്കുന്ന അനിത, അമല, അനൂപ് എന്നിവര് മക്കളും, ജിന്റ്റാ മാലത്തുശ്ശേരി (ഇഞ്ചിത്താനം), നോര്വിച്ചില് താമസിക്കുന്ന ജെറീഷ് പീടികപറമ്പില് (കുറിച്ചി), സഞ്ജു കൈനിക്കര (വലിയകുളം), സോണിയ നെല്ലിപ്പള്ളി (ളായിക്കാട്) എന്നിവര് മരുമക്കളുമാണ്. പരേതനായ തങ്കച്ചന് മരങ്ങാട്ട്, ആന്റണി ഫിലിപ്പ് (തുരുത്തി) എന്നിവര് സഹോദരങ്ങളാണ്.
യു കെ യില് എത്തി മക്കളെ സന്ദര്ശിക്കുവാനും, കൊച്ചു മക്കളോടൊപ്പം സന്തോഷം പങ്കിടുവാനും, അവരുടെ കൂദാശകര്മ്മങ്ങളിലും പങ്കുചേരുവാനെത്തിയ വാത്സല്യ പിതാവിന്റെ അകാലത്തിലുള്ള മരണം കുടുംബാംഗങ്ങളെ ഒന്നാകെ തളര്ത്തിയിരിക്കുകയാണ്. നോര്വിച്ച് സീറോ മലബാര് മിഷനും, നോര്വിച്ച് മലയാളി അസ്സോസ്സിയേഷനും സന്തപ്തരായ കുടുംബങ്ങളോടൊപ്പം ആശ്വാസമായി സദാ കൂടെയുണ്ട്.
നോര്വിച്ച് സെന്റ് തോമസ് സീറോമലബാര് മിഷന്, നോര്വിച്ച് മലയാളി അസ്സോസ്സിയേഷന്, യുക്മ റീജണല്, നാഷണല് കമ്മിറ്റി എന്നിവര് കുടുംബാംഗങ്ങളെ നേരില്ക്കണ്ട് അനുശോചനവും പ്രാര്ത്ഥനകളും അറിയിച്ചു.
അപ്പച്ചന് കണ്ണന്ച്ചിറ