നടിയെ ആക്രമിച്ച കേസിലെ എട്ടാം പ്രതിയായ നടന് ദിലീപിനെ കുറ്റവിമുക്തനാക്കിയ വിധിക്കെതിരെ പ്രോസിക്യൂഷന് ഹൈക്കോടതിയെ സമീപിക്കും. എറണാകുളം പ്രിന്സിപ്പള് സെഷന്സ് കോടതിയുടെ വിധി പരിശോധിച്ച് തുടര് നടപടിയെടുക്കുമെന്ന് പബ്ലിക് പ്രോസിക്യൂട്ടര് അജകുമാര് പറഞ്ഞു. കുറ്റകൃത്യത്തില് നേരിട്ട് പങ്കെടുത്ത ഒന്ന് മുതല് ആറുവരെയുള്ള പ്രതികള് മാത്രമാണെന്നാണ് കോടതി കണ്ടെത്തിയത്. കേസിലെ ഏഴ്, എട്ട്, ഒമ്പത്, പത്ത് പ്രതികളെ കോടതി വെറുതെ വിടുകയായിരുന്നു. ക്രിമിനല് ഗൂഢാലോചന തെളിയാകാന് പ്രോസിക്യൂഷനു തെളിയിക്കാന് സാധിച്ചിട്ടില്ലെന്നാണ് കോടതി വിധിയില് പറഞ്ഞത്. ശിക്ഷാ വിധിയില് 12ന് വാദം നടക്കാനിരിക്കെയാണ് ദിലീപിനെ കുറ്റവിമുക്തനാക്കിയ വിധിക്കെതിരെ ഹൈക്കോടതിയില് അപ്പീല് നല്കുമെന്ന് പബ്ലിക് പ്രോസിക്യൂട്ടര് വ്യക്തമാക്കിയത്. വിധി അന്തിമം അല്ലെന്നും മേല്കോടതികളുണ്ടെന്നും അന്ന് കേസ് അന്വേഷണത്തിന് മേല്നോട്ടം വഹിച്ച മുന് ഡിജിപി ബി സന്ധ്യ പ്രതികരിച്ചു.
കൂട്ട ബലാത്സംഗം തെളിഞ്ഞെന്നും അന്വേഷണ സംഘം മികച്ച രീതിയിലാണ് ജോലി ചെയ്തെന്നും പ്രോസിക്യൂഷനും നല്ല ജോലി ചെയ്തുവെന്നും ബി സന്ധ്യ പറഞ്ഞു. നിരവധി വെല്ലുവിളികളാണ് വിചാരണ വേളയില് നേരിട്ടത്. അതിജീവിതക്കൊപ്പം ഇനിയും അന്വേഷണ സംഘം ഉണ്ടാകും. ഈ വിധി അന്തിമ വിധിയല്ല. മേല്കോടതികളുണ്ടെന്നും ബി സന്ധ്യ പറഞ്ഞു. ഈ കേസിലൂടെ കേരളവും കേരളത്തിലെ സിനിമാ മേഖലയിലും പോസിറ്റീവായ ഒരുപാട് മാറ്റങ്ങളുണ്ടായെന്നാണ് വിശ്വസിക്കുന്നത്. അന്തിമ വിധി വരുന്നതുവരെ അതിജീവിതക്കൊപ്പം പ്രോസിക്യൂഷനും ഉണ്ടാകും. തുടര് നടപടികളുമായി മുന്നോട്ടുപോകും.
