ഭര്ത്താവിനെ കൊലപ്പെടുത്തി കാമുകനൊപ്പമുള്ള ജീവിതം ആസ്വദിക്കാന് ഗൂഢാലോചന നടത്തിയ കേസില് ഇരുവര്ക്കും 19 വര്ഷത്തെ ജയില്ശിക്ഷ. ഭര്ത്താവ് ക്രിസ്റ്റഫര് മില്സിനെ കൊലപ്പെടുത്തി, ആത്മഹത്യയായി ചിത്രീകരിക്കാന് പദ്ധതിയിട്ട മിഷേല് മില്സും, ജെറിയാന്റ് ബെറിയുമാണ് ജയിലഴിക്ക് ഉള്ളിലായത്.
സ്വാന്സി ക്രൗണ് കോടതിയില് നടന്ന വിചാരണയില് ഇരുവരും കൊലപാതകത്തിനുള്ള ഗൂഢാലോചനയില് കുറ്റക്കാരാണെന്ന് കണ്ടെത്തിയിരുന്നു. സ്റ്റീഫന് തോമസ് എന്ന വ്യക്തിയെ ഗൂഢാലോചനയില് പങ്കാളിയല്ലെന്ന് കണ്ടെത്തിയെങ്കിലും ആയുധങ്ങള് കൈമാറിയ കുറ്റം സ്ഥിരീകരിച്ചിരുന്നു. 
സെനാര്ത്തില് നിര്ത്തിയിട്ട കാരവാനില് കഴിഞ്ഞ വര്ഷം സെപ്റ്റംബറിലാണ് ക്രിസ്റ്റഫര് മില്സ് അക്രമിക്കപ്പെട്ടത്. എന്നാല് മുഖം മൂടി അണിഞ്ഞ് തോക്കുമായി എത്തിയത് ബെറിയും, തോമസുമായിരുന്നുവെന്ന് പിന്നീട് കണ്ടെത്തി. ഗുരുതരമായി മര്ദ്ദനമേറ്റെങ്കിലും മില്സിന് അക്രമികളെ പ്രതിരോധിക്കാന് സാധിച്ചു. ഇതോടെ അക്രമികള് ഇവിടെ നിന്നും രക്ഷപ്പെടുകയായിരുന്നു.
ഇതിനിടെ ഭര്ത്താവിന് തലയ്ക്ക് പരുക്കേറ്റെന്നും ആരാണ് അക്രമിച്ചതെന്ന് അറിയില്ലെന്നും 46-കാരിയായ മിഷേല് 999-ല് വിളിച്ച് അറിയിച്ചു. സായുധ പോലീസും, ഡോഗ് യൂണിറ്റും സ്ഥലത്തെത്തുകയും, പോലീസ് ഹെലികോപ്ടര് ബെറിയെയും, തോമസിനെയും കണ്ടെത്തുകയും ചെയ്തു.
പിന്നീട് പോലീസ് നടത്തിയ തെരച്ചിലിലാണ് മില്സിന്റേതായി രേഖപ്പെടുത്തിയ ആത്മഹത്യാ കുറിപ്പ് ഇവരില് നിന്നും പിടിച്ചെടുത്തത്. ഇതോടെ കാര്യങ്ങള് വ്യക്തമാകുകയും ഗൂഢാലോചന പുറത്തുവരികയുമായിരുന്നു. മിഷേലും, ബെറിയും തമ്മില് മൂന്ന് മാസത്തെ രഹസ്യബന്ധം പുലര്ത്തിയ ശേഷമാണ് മില്സിനെ കൊല്ലാന് പദ്ധതിയിട്ടത്.
