നൃത്തത്തിലും അഭിനയത്തിലും ഒരുപോലെ താല്‍പര്യമുള്ളവര്‍ക്കായി കലാഭവന്‍ ലണ്ടന്റെ ആഭിമുഖ്യത്തില്‍ 'ABHINAYA - The Art of Expression Through Dance' എന്ന പേരില്‍ പ്രത്യേക പരിശീലന വര്‍ക്ക്ഷോപ്പ് സംഘടിപ്പിക്കുന്നു.
നൃത്തത്തിലൂടെ വികാരങ്ങള്‍, ചിന്തകള്‍, ആശയങ്ങള്‍, കഥകള്‍ എന്നിവ പ്രേക്ഷകരിലേക്ക് മനോഹരമായും അര്‍ത്ഥവത്തായും ഫലപ്രദമായും എത്തിക്കുന്നതിനുള്ള വിവിധ അഭിനയ സങ്കേതങ്ങളില്‍ പരിശീലനം നല്‍കുക എന്നതാണ് ഈ വര്‍ക്ക്ഷോപ്പിന്റെ പ്രധാന ലക്ഷ്യം.
സംസ്‌കൃതത്തിലെ 'അഭിനയ' (Abhinaya) എന്ന പദത്തിന്റെ ആശയം അര്‍ത്ഥത്തെയും വികാരങ്ങളെയും പ്രേക്ഷകരിലേക്ക് എത്തിക്കുക എന്നതാണ്. മുഖഭാവങ്ങള്‍, നേത്രചലനങ്ങള്‍, ഹസ്തമുദ്രകള്‍, അംഗചലനങ്ങള്‍ എന്നിവയിലൂടെ മനസ്സിലെ വികാരങ്ങളും ഭാവങ്ങളും കലാപരമായി ആവിഷ്‌കരിക്കുന്നതാണ് അഭിനയത്തിന്റെ അടിസ്ഥാനതത്വം. നൃത്തത്തെ കേവലം ശാരീരിക ചലനങ്ങളുടെ അവതരണത്തില്‍ നിന്ന് ആഴമേറിയതും അര്‍ത്ഥവത്തുമായ കലാനുഭവമാക്കി മാറ്റുന്നതില്‍ അഭിനയത്തിന് സുപ്രധാനമായ പങ്കുണ്ട്.
നൃത്തത്തിലും അഭിനയത്തിലും അഭിരുചിയുള്ളവര്‍ക്കും തങ്ങളുടെ കലാപരമായ കഴിവുകള്‍ കൂടുതല്‍ പരിപോഷിപ്പിക്കാനും അവതരണ മികവ് മെച്ചപ്പെടുത്താനും ആഗ്രഹിക്കുന്നവര്‍ക്കും ഈ പരിശീലന പരിപാടി ഏറെ പ്രയോജനകരമായിരിക്കും. പ്രത്യേകിച്ച്, നര്‍ത്തകര്‍ക്ക് തങ്ങളുടെ അവതരണങ്ങളില്‍ ഭാവസമ്പന്നതയും വൈകാരികമായ ആഴവും ആശയവ്യക്തതയും കൂടുതല്‍ ഫലപ്രദമായി ഉള്‍പ്പെടുത്തുന്നതിനുള്ള മികച്ച അവസരമായിരിക്കും ഈ വര്‍ക്ക്ഷോപ്പ്.
യുകെയിലെ വിവിധ തിരഞ്ഞെടുക്കപ്പെട്ട കേന്ദ്രങ്ങളില്‍ ഈ മാസം മുതല്‍ പരിശീലന ക്ലാസുകള്‍ ആരംഭിക്കും. യുകെയില്‍ നിന്നുള്ള പ്രശസ്ത നര്‍ത്തകിയും നൃത്താധ്യാപികയും അഭിനേത്രിയുമായ ജിതാ രാജ്ആണ് പരിശീലനത്തിന് നേതൃത്വം നല്‍കുന്നത്.
നൃത്തകലയിലെ അഭിനയത്തിന്റെ പ്രാധാന്യം കൂടുതല്‍ ആഴത്തില്‍ മനസ്സിലാക്കുന്നതിനും, സ്വന്തം കലാപരമായ കഴിവുകള്‍ വികസിപ്പിക്കുന്നതിനും, മികച്ച അവതരണശേഷി കൈവരിക്കുന്നതിനും ആഗ്രഹിക്കുന്നവര്‍ക്ക് ഈ വര്‍ക്ക്ഷോപ്പ് ഒരു സവിശേഷ പരിശീലനാനുഭവമായിരിക്കും.
കലാപരമായ മികവിനും സര്‍ഗാത്മക വളര്‍ച്ചയ്ക്കും പ്രാധാന്യം നല്‍കിക്കൊണ്ട് പുതിയ പരിശീലനാവസരങ്ങള്‍ ഒരുക്കുന്ന കലാഭവന്‍ ലണ്ടന്റെ മറ്റൊരു ശ്രദ്ധേയമായ സംരംഭമാണിത്.
കൂടുതല്‍ വിവരങ്ങള്‍ക്കും രജിസ്ട്രേഷനും ബന്ധപ്പെടുക
KALABHAVAN LONDON
07841 613973
Kalabhavanlondon@gmail.com
www.Kalabhavanlondon.com
