നടന് ടിനി ടോമിനെതിരായ അന്സിബ ഹസന്റെ പരാതിയില് അമ്മ പ്രസിഡന്റ് ശ്വേത മേനോന്റെ മൊഴിയെടുത്ത് കടവന്ത്ര പൊലീസ്. ടിനി ടോം വര്ഗീയ അധിക്ഷേപം നടത്തിയതിനെക്കുറിച്ച് അറിയില്ലെന്നാണ് ശ്വേതയുടെ മൊഴി. അന്സിബ മതം മാറ്റാന് ശ്രമിച്ചെന്ന് ടിനി പറഞ്ഞത് ശ്രദ്ധയില്പ്പെട്ടിട്ടില്ലെന്നും ശ്വേത മൊഴി നല്കി. ടിനി ടോമിന്റെ മൊഴി ഉടന് രേഖപ്പെടുത്തും. കഴിഞ്ഞ ദിവസം നീനാ കുറുപ്പിന്റെ മൊഴിയെടുത്തിരുന്നു. അന്വേഷണ റിപ്പോര്ട്ട് ഈയാഴ്ച സമര്പ്പിക്കും.
അതിനിടെ നടി ലക്ഷ്മി പ്രിയയ്ക്കെതിരെ കോടതിയില് സ്വകാര്യ അന്യായം ഫയല് ചെയ്തിരിക്കുകയാണ് അന്സിബ. നടി ലക്ഷ്മി പ്രിയ, ഭര്ത്താവ് ജയേഷ് തൃപ്പൂണിത്തുറ, വനിതാ സെല് എസ് ഐ എന്നിവര്ക്കെതിരെ കേസ് എടുക്കണമെന്നാണ് ആവശ്യം. തൃപ്പൂണിത്തുറ കോടതിയെയാണ് സമീപിച്ചത്. പൊലീസ് എഫ്ഐആര് രജിസ്റ്റര് ചെയ്യാത്തതിനെ തുടര്ന്നാണ് അന്സിബ കോടതിയെ സമീപിച്ചത്.
പൊലീസ് സ്റ്റേഷനില് വിളിച്ച് വരുത്തി മാനസിക പീഡനത്തിന് ഇരയാക്കിയെന്ന അന്സിബ ഹസന്റെ പരാതിയില് കഴമ്പില്ലെന്ന് പൊലീസ് വ്യക്തമാക്കിയിരുന്നു. തൃപ്പൂണിതുറ പൊലീസ് സ്റ്റേഷനിലെ വനിതാ എസ് ഐക്കെതിരെയും നടി ലക്ഷ്മി പ്രിയക്കെതിരെയും അന്സിബ നല്കിയ പരാതിയില് കേസെടുക്കാന് സാധിക്കില്ലെന്ന് ചൂണ്ടിക്കാട്ടി തൃക്കാക്കര എ സി പി കൊച്ചി കമ്മിഷണര്ക്ക് റിപ്പോര്ട്ട് നല്കി. അതേസമയം ടിനി ടോമിനെതിരെ അന്സിബ നല്കിയ പരാതിയില് ഉന്നത ഉദ്യോഗസ്ഥരുമായി കൂടിയാലോചിച്ച് തുടര് നടപടി എടുക്കുമെന്നും പൊലീസ് അറിയിച്ചു.
