ഇന്ത്യയുടെ എഐ കിഡ് ; കൊച്ചി സ്വദേശിയായ പ്ലസ്ടുക്കാരന്‍ സ്വന്തം പിതാവിനേയും ജോലിക്കെടുത്തു, ശമ്പളം രണ്ടു ലക്ഷം !

'ഇന്ത്യയുടെ എഐ കിഡ്' എന്നറിയപ്പെടുന്ന റൗള്‍ എഐ ടൂളുകള്‍ വികസിപ്പിക്കുന്നതിനൊപ്പം ആയിരക്കണക്കിന് പേര്‍ക്ക് സാങ്കേതിക പരിശീലനവും നല്‍കുന്നു.

കേരളത്തിന്റെ എഐ ലോകത്ത് ശ്രദ്ധേയനായി മാറുകയാണ് 16കാരനായ റൗള്‍ ജോണ്‍ അജു. കൊച്ചിയിലെ കുന്നുംപുറം നോര്‍ത്ത് എടപ്പള്ളി ഗവ. ഹയര്‍ സെക്കന്‍ഡറി സ്‌കൂളില്‍ കൊമേഴ്‌സ് വിഭാഗത്തില്‍ പ്ലസ് ടു പഠിക്കുന്ന റൗള്‍ ഇതിനോടകം സ്വന്തം എഐ കമ്പനിക്ക് നേതൃത്വം നല്‍കുകയാണ്. 'ഇന്ത്യയുടെ എഐ കിഡ്' എന്നറിയപ്പെടുന്ന റൗള്‍ എഐ ടൂളുകള്‍ വികസിപ്പിക്കുന്നതിനൊപ്പം ആയിരക്കണക്കിന് പേര്‍ക്ക് സാങ്കേതിക പരിശീലനവും നല്‍കുന്നു.

ഏറ്റവും ശ്രദ്ധേയമായത്, ഈ പ്രായത്തില്‍ പല കൗമാരക്കാരും മാതാപിതാക്കളോട് പോക്കറ്റ് മണി ചോദിക്കുമ്പോള്‍ റൗളിന്റെ പിതാവ് മകന്റെ കമ്പനിയില്‍ ജോലി ചെയ്യുകയും പ്രതിമാസം രണ്ട് ലക്ഷം രൂപ ശമ്പളം വാങ്ങുകയും ചെയ്യുന്നു എന്നതാണ്.

റൗളിന്റെ എഐ   യാത്ര ആരംഭിച്ചത് ഒന്‍പതാം വയസ്സിലാണ്. പിതാവ് അജു ജോസഫിന് അഡോബിയില്‍ ജോലി ലഭിച്ചതോടെ പ്രീമിയം സാങ്കേതിക ഉപകരണങ്ങള്‍ ഉപയോഗിക്കാനുള്ള അവസരം റൗളിന് ലഭിച്ചു. വീഡിയോ എഡിറ്റിങ്ങിലൂടെയാണ് സാങ്കേതികവിദ്യയിലേക്ക് എത്തിയതെന്നും പിന്നീട് എഐ  യെക്കുറിച്ച് സ്വയം പഠിക്കാന്‍ തുടങ്ങിയെന്നും റൗള്‍ പറയുന്നു.

12-ാം വയസ്സില്‍ സ്‌കൂള്‍ സയന്‍സ് പ്രോജക്ടിനായി 'MeBot' എന്ന റോബോട്ട് നിര്‍മിച്ചു. സാങ്കേതികവിദ്യ ഉപയോഗിക്കുന്നതില്‍ മാത്രം ഒതുങ്ങാതെ, സ്വന്തം ആശയങ്ങള്‍ പ്രാവര്‍ത്തികമാക്കാനുള്ള താല്‍പര്യമാണ് പിന്നീട്  എഐ   സംരംഭകനാക്കി മാറ്റിയത്.

ഇതിനോടകം 15 എഐ   ടൂളുകള്‍ റൗള്‍ വികസിപ്പിച്ചിട്ടുണ്ട്. RESQ AI, MeBot, ZapGap, Investo AI, FeedFye തുടങ്ങിയവ ഇതില്‍ ഉള്‍പ്പെടുന്നു. യഥാര്‍ഥ ജീവിതത്തിലെ പ്രശ്‌നങ്ങള്‍ക്ക് പരിഹാരം കണ്ടെത്തുക എന്ന ലക്ഷ്യത്തോടെയാണ് ടൂളുകള്‍ വികസിപ്പിച്ചിരിക്കുന്നത്.

Amazon, Adobe, Wipro, IBM തുടങ്ങിയ പ്രമുഖ കമ്പനികളില്‍ പ്രവര്‍ത്തിച്ചിട്ടുള്ള റൗളിന്റെ പിതാവ് അജു ജോസഫിന് വര്‍ഷങ്ങളുടെ സാങ്കേതികവിദ്യാ-കോര്‍പ്പറേറ്റ് പരിചയമുണ്ട്. ഫോണിലൂടെയും ഇന്റര്‍നെറ്റിലൂടെയും എത്ര അറിവ് നേടിയാലും പിതാവിന്റെ അനുഭവപരിചയം സ്വന്തമാക്കാന്‍ കഴിയില്ലെന്നാണ് റൗള്‍ പറയുന്നത്.

റൗളിന്റെ സ്റ്റാര്‍ട്ടപ്പായ AI Technologies-ന്റെ കീഴിലാണ് ThinkCraft Academy പ്രവര്‍ത്തിക്കുന്നത്. IIT, IIM, വിദേശ സര്‍വകലാശാലകള്‍, വിവിധ കോര്‍പ്പറേറ്റ് സ്ഥാപനങ്ങള്‍ എന്നിവയുമായി ബന്ധപ്പെട്ട വിദ്യാര്‍ഥികള്‍ക്കും പ്രൊഫഷണലുകള്‍ക്കും ഇവിടെ AI പരിശീലനം നല്‍കുന്നു.

ലോകത്തിന്റെ വിവിധ ഭാഗങ്ങളിലായി ഏകദേശം അഞ്ച് ലക്ഷം വിദ്യാര്‍ഥികള്‍ക്ക് പരിശീലനം നല്‍കിയതായി റൗള്‍ പറയുന്നു

2026ലെ ഇന്ത്യ AI ഇംപാക്ട് സമ്മിറ്റില്‍ യുഎന്‍ സംഘടിപ്പിച്ച സെഷനില്‍ പങ്കെടുക്കുകയും ഉദ്ഘാടന പ്രസംഗം നടത്തുകയും ചെയ്തു. യുഎന്‍ സ്‌പെഷ്യല്‍ എന്‍വോയ് അമന്‍ദീപ് ഗില്ലുമായും യുഎന്‍ സെക്രട്ടറി ജനറല്‍ അന്റോണിയോ ഗുട്ടറസുമായും കൂടിക്കാഴ്ച നടത്താനുള്ള അവസരവും അദ്ദേഹത്തിന് ലഭിച്ചു.