മണ്ണാര്ക്കാട് വയോധികനായ അച്ഛനെ, മക്കള് ആറ് മാസത്തോളം മുറിക്കുള്ളില് പൂട്ടിയിട്ടതായി പരാതി. കിടപ്പിലായ അച്ഛന് ഭക്ഷണം പോലും കൃത്യമായി നല്കിയിരുന്നില്ലെന്നും നാട്ടുകാര് പറയുന്നു. ആരോഗ്യ വകുപ്പും, പൊലീസും സ്ഥലത്തെത്തി വയോധികനെ മോചിപ്പിച്ചു. സ്വത്ത് എഴുതി വാങ്ങിയതിനു ശേഷമായിരുന്നു മുറിയില് പൂട്ടിയിട്ടത്.
മണ്ണാര്ക്കാട് പടിഞ്ഞാറെ തറയില് പൊന്നു ചെട്ടിയാര്ക്കാണ് ഈ ദുരവസ്ഥയുണ്ടായത്. മക്കളായ ഗണേശനും, തങ്കമ്മയും ആറ് മാസത്തോളം വീട്ടില് പൂട്ടിയിട്ട് ഭക്ഷണം പോലും കൃത്യമായി നല്കാതെ പീഡിപ്പിച്ചതായാണ് അയല്വാസികള് പരാതി പറയുന്നത്. കിടപ്പിലായ അച്ഛന് ഒരു നേരം മാത്രമാണ് മക്കള് ഭക്ഷണം നല്കിയതെന്നും വാര്ഡ് കൗണ്സിലര് അരുണ് കുമാര് പറഞ്ഞു.
പൊന്നു ചെട്ടിയാരുടെ ഭാര്യ രണ്ട് വര്ഷങ്ങള്ക്ക് മുമ്പ് മരിച്ചിരുന്നു. അതിനു ശേഷമാണ് അച്ഛനോടുള്ള മക്കളുടെ ക്രൂരത. നാട്ടുകാര് വിവരം അറിയിച്ചതിനെ തുടര്ന്ന് സംഭവ സ്ഥലത്തെത്തിയ ആരോഗ്യ വകുപ്പും പൊലീസും , നഗരസഭ അധികൃതരുംചേര്ന്ന് വയോധികനെ മോചിപ്പിച്ചു. വയോധികനെ ആശുപത്രിയില് പ്രവേശിപ്പിച്ചു. പൊലീസ് സ്റ്റേഷനില് ഹാജരാകാന് മക്കള്ക്ക് നിര്ദേശം നല്കിയിട്ടുണ്ട്.