ഉദയ്പൂരില് പ്രവാചക നിന്ദയുടെ പേരില് കനയ്യ ലാലിനെ കൊലപ്പെടുത്തിയ കേസിലെ പ്രതികളെ കോടതി പരിസരത്ത് ജനക്കൂട്ടം വളഞ്ഞിട്ടാക്രമിച്ചു. ജയ്പൂരിലെ എന്.ഐ.എ കോടതിയില് ഹാജരാക്കിയതിന് ശേഷം പോലീസ് വാഹനത്തിലേക്ക് കൊണ്ടുപോവും വഴി രണ്ട് പ്രതികളെയും ചുറ്റും നിന്ന രോക്ഷാകുലരായ ജനക്കൂട്ടം ആക്രമിക്കുകയായിരുന്നു.
കോടതി പരിസരത്ത് തടിച്ചുകൂടിയ ജനങ്ങളും അഭിഭാഷകരും പ്രതികളെ കണ്ടതോടെ ആക്രോശിച്ച് അവര്ക്ക് നേരെ തിരിയുകയായിരുന്നു. പാകിസ്താന് മൂര്ദാബാദ്, കനയ്യ ലാലിന്റെ കൊലപാതകികള്ക്ക് വധശിക്ഷ നല്കുക തുടങ്ങിയ മുദ്രാവാക്യങ്ങളും അവര് മുഴക്കി. പോലീസ് ഏറെ പണിപ്പെട്ടാണ് പ്രതികളെ പോലീസ് വാഹനത്തിലേക്ക് കയറ്റിയത്.
ചൊവ്വാഴ്ചയാണ് ഉദയ്പൂരിലെ തയ്യല്ക്കടയുടമയായ കനയ്യ ലാലിനെ ഒരു സംഘം കഴുത്തറുത്ത് കൊലപ്പെടുത്തിയത്. പ്രവാചകനെതിരേ പരാമര്ശം നടത്തിയ ബിജെപി നേതാവ് നൂപുര് ശര്മയെ പിന്തുണച്ചതാണ് കൊലപാതകത്തിലേക്ക് നയിച്ചതെന്നാണ് പോലീസ് പറയുന്നത്. കൊലപാതകത്തിന് മണിക്കൂറുകള്ക്കുള്ളില് മുഖ്യപ്രതികളായ റിയാസ് അക്താരിയേയും ഗോസ് മുഹമ്മദിനേയും പോലീസ് അറസ്റ്റ് ചെയ്തിരുന്നു. കേസുമായി ബന്ധമുള്ള മറ്റ് രണ്ട് പേരെ കൂടി പോലീസ് പിന്നീട് പിടികൂടി. നാല് പ്രതികളേയും ഇന്ന് ജയ്പൂരിലെ എന്.ഐ.എ കോടതിയില് ഹാജരാക്കിയിരുന്നു. പ്രതികളെ കോടതി ജൂലായ് 12 വരെ എന്.ഐ.എ കസ്റ്റഡിയില് വിട്ടു.