കൊവിഡ് വാക്‌സിന്‍ സംബന്ധിച്ച് ആശങ്ക രേഖപ്പെടുത്തുകയും, ഇത് കുത്തിവെയ്ക്കാന്‍ പലരും വിസമ്മതിക്കുകയും, ഇതിന്റെ പേരില്‍ അന്താരാഷ്ട്ര കായിക താരങ്ങളെ വരെ നാട് കടത്തുകയും ചെയ്ത സംഭവങ്ങള്‍ കഴിഞ്ഞ വര്‍ഷങ്ങളില്‍ ലോകം സാക്ഷിയായി. വാക്‌സിന്‍ കുത്തിവെച്ച ശേഷം പലവിധ രോഗങ്ങള്‍ നേരിട്ടതായി അവകാശപ്പെട്ട് നിരവധി പേര്‍ തങ്ങളുടെ അനുഭവങ്ങള്‍ പങ്കുവെയ്ക്കുകയും ചെയ്തു.
ഇപ്പോള്‍ വാക്‌സിന്‍ സംബന്ധിച്ച് ലോകത്തില്‍ നടത്തിയ ഏറ്റവും വലിയ പഠനം ഒരു കാര്യം സ്ഥിരീകരിക്കുന്നു. കൊവിഡ് വാക്‌സിനുകള്‍ ചെറിയ തോതില്‍ ഹൃദയ, രക്ത, ന്യൂറോളജിക്കല്‍ പ്രശ്‌നങ്ങള്‍ക്ക് ഇടയാക്കുന്നുവെന്നാണ് പഠനത്തില്‍ കണ്ടെത്തിയിരിക്കുന്നത്. എട്ട് രാജ്യങ്ങളിലെ 99 മില്ല്യണ്‍ വാക്‌സിന്‍ സ്വീകരിച്ചവരില്‍ 13 മെഡിക്കല്‍ കണ്ടീഷനുകള്‍ സംബന്ധിച്ചാണ് അന്താരാഷ്ട്ര വാക്‌സിന്‍ വിദഗ്ധ സംഘം പരിശോധന നടത്തിയത്. കുത്തിവെയ്പ്പ് ലഭിച്ച ശേഷം ഈ സ്ഥിതിഗതികള്‍ ഉയര്‍ന്ന നിലയിലേക്ക് മാറിയിട്ടുണ്ടോയെന്നാണ് നിരീക്ഷിച്ചത്. 
ഈ പരിശോധനയില്‍ ഫൈസര്‍, മോഡേണ, ആസ്ട്രാസെനെക വാക്‌സിനുകള്‍ അഞ്ച് മെഡിക്കല്‍ അവസ്ഥകള്‍ക്ക് ഉയര്‍ന്ന സാധ്യത സൃഷ്ടിച്ചതായി ഇവര്‍ സ്ഥിരീകരിച്ചു. ഇതില്‍ ആളുകളെ നടക്കാനും, ആലോചിക്കാനും ബുദ്ധിമുട്ടിലാക്കുന്ന നാഡികളെ പാഴാക്കുന്ന അവസ്ഥയും ഉള്‍പ്പെടുന്നു. എന്നാല്‍ മറ്റ് പല അസുഖങ്ങള്‍ക്കും വാക്‌സിന്‍ കാരണമാകുന്നതായി മുന്നറിയിപ്പ് നല്‍കുന്ന പഠനം ഇത് സംബന്ധിച്ച് കൂടുതല്‍ പഠനം അനിവാര്യമാണെന്നും വ്യക്തമാക്കി. മോഡേണ വാക്‌സിനും, തലച്ചോറില്‍ മുഴ വളരുന്നതുമായ അവസ്ഥയും ഇതില്‍ പെടും.
എന്നിരുന്നാലും ഇത്തരം പ്രശ്‌നങ്ങള്‍ രൂപപ്പെടാനുള്ള സാധ്യത വളരെ ചെറുതാണെന്ന് ടീം വ്യക്തമാക്കുന്നു. 13 ബില്ല്യണ്‍ ഡോസ് വാക്‌സിനുകള്‍ നല്‍കിയതില്‍ 2000 കേസുകള്‍ മാത്രമാണ് സ്ഥിരീകരിച്ചിട്ടുള്ളത്. കൊവിഡ് വാക്‌സിനുകള്‍ ലോകത്തില്‍ 19 മില്ല്യണിലേറെ മരണങ്ങള്‍ വഴിതിരിച്ചുവിട്ടുവെന്നാണ് കണക്കാക്കുന്നത്.
