എല്ലാവരും അറിഞ്ഞ് വെച്ചുകൊണ്ടുള്ള നുണകളാണ് ബജറ്റിന് മുന്‍പ് ആശങ്ക പരത്താനായി റേച്ചല്‍ റീവ്‌സ് അടിച്ചുവിട്ടതെന്ന് വ്യക്തമാകുന്നു. നികുതികള്‍ വര്‍ദ്ധിപ്പിക്കുന്ന ബജറ്റിന് മുന്നോടിയായി രാജ്യത്തിന്റെ ധനകാര്യ സ്ഥിതി മോശമാണെന്ന അഭ്യൂഹങ്ങളാണ് റീവ്‌സ് പടര്‍ത്തിയത്. രാജ്യത്തോട് നുണപറഞ്ഞ ചാന്‍സലര്‍ രാജിവെയ്ക്കണമെന്നാണ് ഇപ്പോള്‍ സര്‍വ്വെയില്‍ വോട്ടര്‍മാരും ആവശ്യപ്പെടുന്നത്.
മെയില്‍ സണ്‍ഡേ പുറത്തുവിട്ട സര്‍വ്വെയിലാണ് രണ്ടിലൊന്ന് വോട്ടര്‍മാരും ചാന്‍സലറുടെ രാജി ആവശ്യപ്പെടുന്നതായി വ്യക്തമായത്. പൊതുഖജനാവില്‍ യാതൊരു ധനക്കമ്മിയും നേരിടുന്നില്ലെന്ന് മാസങ്ങള്‍ക്ക് മുന്‍പ് തന്നെ റീവ്‌സിന് അറിയാമായിരുന്നുവെന്നാണ് ഒബിആര്‍ സ്ഥിരീകരിച്ചത്.
റീവ്‌സിന്റെ തലയുരുളണമെന്ന് ബിസിനസ്സ് മേധാവികള്‍ ആവശ്യപ്പെടുമ്പോള്‍ ചാന്‍സലറുടെ ദിനങ്ങള്‍ എണ്ണപ്പെട്ടതായി ലേബര്‍ എംപിമാരും സമ്മതിക്കുന്നു. ഇതിനിടെ പ്രധാനമന്ത്രിയും രാഷ്ട്രീയ കൊടുങ്കാറ്റില്‍ ചെന്നുചാടിയിട്ടുണ്ട്. 30 ബില്ല്യണ്‍ പൗണ്ട് ധനക്കമ്മിയുടെ പേരുപറഞ്ഞ് കടുത്ത തീരുമാനങ്ങള്‍ ഉണ്ടാകുമെന്ന് റീവ്‌സ് മുന്നറിയിപ്പ് നല്‍കുമ്പോള്‍ പ്രധാനമന്ത്രി കീര്‍ സ്റ്റാര്‍മര്‍ക്ക് യാഥാര്‍ത്ഥ്യം അറിവുണ്ടായിരുന്നുവെന്ന് ഡൗണിംഗ് സ്ട്രീറ്റ് സൂചന നല്‍കി.
4.2 ബില്ല്യണ്‍ പൗണ്ട് സര്‍പ്ലസ് ഉള്ളപ്പോഴാണ് റീവ്‌സ് നുണപറഞ്ഞ് ഭീതി വ്യാപാരം നടത്തിയത്. 68 ശതമാനം വോട്ടര്‍മാരാണ് റീവ്‌സ് രാജിവെയ്ക്കണമെന്ന് സര്‍വ്വെയില്‍ ആവശ്യപ്പെട്ടത്. 32 ശതമാനം മാത്രമാണ് ഇവര്‍ തുടരുന്നതിനെ അനുകൂലിച്ചത്.
