ഇറാനുമായി ഒരു കരാര് സാധ്യമാണോ എന്നത് അടുത്ത 10 ദിവസത്തിനുള്ളില് ലോകം അറിയുമെന്ന് അമേരിക്കന് പ്രസിഡന്റ് ഡൊണാള്ഡ് ട്രംപ്. കരാര് ഉണ്ടായില്ലെങ്കില് മോശം കാര്യങ്ങള് സംഭവിക്കുമെന്നും അദ്ദേഹം മുന്നറിയിപ്പ് നല്കി. മിഡില് ഈസ്റ്റില് അമേരിക്കന് സൈനിക സാന്നിധ്യം ശക്തമായി തുടരുന്ന സാഹചര്യത്തില്, അര്ത്ഥവത്തായ ഒരു കരാറില് ഏര്പ്പെടാന് അദ്ദേഹം ഇറാനോട് ആവശ്യപ്പെട്ടു. ഇറാനുമായി അര്ത്ഥവത്തായ ഒരു കരാറിലെത്തുക എന്നത് വര്ഷങ്ങളായി എളുപ്പമുള്ള കാര്യമല്ലെന്ന് തെളിയിക്കപ്പെട്ടതാണെന്നും, അത് സാധ്യമായില്ലെങ്കില് വലിയ പ്രത്യാഘാതങ്ങള് ഉണ്ടാകുമെന്നും അദ്ദേഹം പറഞ്ഞു. കരാര് ഉണ്ടായില്ലെങ്കില് അമേരിക്കയ്ക്ക് കൂടുതല് കടുത്ത നടപടികളിലേക്ക് കടക്കേണ്ടി വരുമെന്നും ഇതിനെക്കുറിച്ചുള്ള വിവരങ്ങള് അടുത്ത 10 ദിവസത്തിനുള്ളില് പുറത്തുവരുമെന്നും എഎഫ്പി റിപ്പോര്ട്ട് ചെയ്യുന്നു.
ഇറാന് പ്രതിസന്ധിയെക്കുറിച്ച് ചര്ച്ച ചെയ്യാന് ട്രംപ് തന്റെ ഉന്നത ഉപദേശകരുമായി സുപ്രധാന കൂടിക്കാഴ്ച നടത്തി. ആണവ തര്ക്കം രൂക്ഷമാകുന്ന പശ്ചാത്തലത്തില്, മണിക്കൂറുകള്ക്കുള്ളില് ട്രംപ് ടെഹ്റാനെതിരെ ആക്രമണം നടത്തിയേക്കുമെന്ന് അമേരിക്കയുടെ ഒരു പ്രധാന സഖ്യകക്ഷി മുന്നറിയിപ്പ് നല്കിയ സാഹചര്യത്തിലായിരുന്നു ഈ കൂടിക്കാഴ്ച. ഈ ആഴ്ച ആദ്യം ജനീവയില് നടന്ന ആണവ ചര്ച്ചകളെക്കുറിച്ച് ട്രംപിന് വിശദീകരണം നല്കുകയും അടുത്ത ഘട്ടങ്ങളെക്കുറിച്ച് സംഘം ചര്ച്ച ചെയ്യുകയും ചെയ്തു.
ശനിയാഴ്ചയോടെ ഇറാനുമായി ഒരു യുദ്ധത്തിന് അമേരിക്ക സന്നദ്ധമാകുമെന്ന് ട്രംപിനെ അറിയിച്ചതായി ദ ടെലിഗ്രാഫ് റിപ്പോര്ട്ട് ചെയ്യുന്നു. ഇതിന്റെ ഭാഗമായി ഇറാനിയന് അതിര്ത്തിക്ക് സമീപം അമേരിക്കന് വിമാനങ്ങളും കപ്പലുകളും വിന്യസിച്ചിട്ടുണ്ട്. കുറഞ്ഞത് 50 അധിക യുദ്ധവിമാനങ്ങളും ഇന്ധനം നിറയ്ക്കുന്നതിനുള്ള ടാങ്കറുകളും മറ്റ് വിമാനങ്ങളും ഈ ആഴ്ച മിഡില് ഈസ്റ്റില് എത്തിച്ചിട്ടുണ്ട്. രണ്ടാമത്തെ വിമാനവാഹിനിക്കപ്പലായ യുഎസ്എസ് ജെറാള്ഡ് ആര്. ഫോര്ഡും ദിവസങ്ങള്ക്കുള്ളില് കിഴക്കന് മെഡിറ്ററേനിയനില് എത്തുമെന്നാണ് പ്രതീക്ഷിക്കുന്നത്.
