കുംഭമേളയിലെ വൈറല് പെണ്കുട്ടിയുടെ വിവാഹത്തില് വീഴ്ചയില്ലെന്ന് അറിയിക്കാന് ഡിജിപി. ദേശീയ എസ്സി/ എസ്ടി കമ്മീഷന് മുന്നില് ഡിജിപി നേരിട്ട് ഹാജരാകും. രേഖകള് പ്രകാരം 18 വയസ് പൂര്ത്തിയായെന്നും രേഖകള് വ്യാജമല്ലെന്ന് ഉറപ്പിച്ചെന്ന നിലപാടും അറിയിക്കുമെന്ന് ഡിജിപി വ്യക്തമാക്കി.
പെണ്കുട്ടിയെ കാണാതായെന്ന പ്രചാരണം തെറ്റാണെന്നും കേരളത്തിലുണ്ടെന്നും പൊലീസ് നിരീക്ഷണം തുടരുന്നുവെന്നും ഡിജിപി അറിയിക്കും. പൊലീസ് സംരക്ഷണം നല്കാന് തയ്യാറാണെന്നും അറിയിക്കാനാണ് ഡിജിപിയുടെ നീക്കം. ഡിജിപി നാളെയാണ് ഡല്ഹിയില് ഹാജരാകുന്നത്.
പ്രായപൂര്ത്തിയാകാത്ത മകളെ തെറ്റിദ്ധരിപ്പിച്ച് വിവാഹം കഴിച്ചുവെന്നാരോപിച്ച് മാതാപിതാക്കള് ഫര്മാനെതിരെ മധ്യപ്രദേശിലെ മണ്ഡലേശ്വര് ഡിഎസ്പിക്ക് പരാതി നല്കിയിരുന്നു. ഈ പരാതിയില് നേരിട്ട് ഹാജരാകണമെന്ന് പൊലീസ് അറിയിച്ചിരുന്നു. അതേസമയം പെണ്കുട്ടി ഗര്ഭിണിയാണെന്നും ഉടന് മധ്യപ്രദേശ് പൊലീസിന് മുന്നില് ഹാജരാകാനാകില്ലെന്നും ഭര്ത്താവ് ഫര്മാന് ഖാന് അറിയിച്ചിരുന്നു.
കുംഭമേളയ്ക്കിടെ വൈറലായ പെണ്കുട്ടിയും മുഹമ്മദ് ഫര്മാന് ഖാനും മാര്ച്ച് പതിനൊന്നിനാണ് വിവാഹിതരായത്. കേരളത്തിലെത്തിയ ഇരുവരും പൂവാറിനടുത്ത് അരുമാനൂര് നൈനാര് ക്ഷേത്രത്തില് വെച്ചാണ് വിവാഹിതരായത്. വിവാഹച്ചടങ്ങില് സിപിഐഎം സംസ്ഥാന സെക്രട്ടറി എം വി ഗോവിന്ദന്, മന്ത്രി വി ശിവന്കുട്ടി, ജില്ലാ സെക്രട്ടറി വി ജോയ്, എ എ റഹീം എംപി എന്നിവര് പങ്കെടുത്തിരുന്നു.
