ഭാര്യയുടെ രഹസ്യ കാമുകനെ വെടിവെച്ച് കൊന്നതിന് ശേഷം വീട്ടില് നടത്തിയ റെയ്ഡില് ഭര്ത്താവിന്റെ പക്കല് നിന്ന് എട്ട് തോക്കുകള് കണ്ടെത്തിയതായി കോടതിയില് വ്യക്തമാക്കി. ഭാര്യയുമായുള്ള ബന്ധത്തിന്റെ പേരിലാണ് 55-കാരനായ മൈക്കിള് ഒ'ലിയറിയെ ഹണിട്രാപ്പില് കുടുക്കി 53-കാരനായ ആന്ഡ്രൂ ജോണ്സ് കൊലപ്പെടുത്തിയത്.
കാമുകന് സന്ദേശങ്ങള് അയയ്ക്കാന് ഉപയോഗിച്ച ഭാര്യയുടെ രഹസ്യ ഫോണ് കണ്ടെത്തിയതോടെയാണ് താന് അസ്വസ്ഥനായതെന്ന് ജോണ്സ് പോലീസിനോട് വെളിപ്പെടുത്തി. കാമുകനുമൊപ്പമുള്ള ലൈംഗിക ബന്ധം ഭര്ത്താവിനേക്കാള് ആസ്വാദ്യകരമാണെന്ന് പറഞ്ഞ് 51-കാരി റിയാനോണ് ജോണ്സിനെ പ്രകോപിതനാക്കിയെന്നും സ്വാന്സി ക്രൗണ് കോടതിയില് വാദം ഉന്നയിച്ചു.
ബന്ധത്തിന്റെ പേരിലുള്ള തര്ക്കത്തിനിടെയാണ് റിയാനോണിന്റെ ഭര്ത്താവ് മൈക്കിളിനെ അബദ്ധത്തില് വെടിവെച്ചത്. ഇദ്ദേഹത്തിന്റെ മൃതദേഹം ഫോര്ക്ക്ലിഫ്റ്റ് ട്രക്ക് ഉപയോഗിച്ചാണ് ഫാമില് നിന്നും ജോണ്സ് നീക്കിയത്. ഇവിടെ നിന്ന് ബുള്ളറ്റ് കേസിംഗ്സും കണ്ടെത്തി.
റിയാനോണിനെ കാണാന് മൈക്കിള് എത്തിയപ്പോഴാണ് ജോണ്സ് ഇയാളെ നേരിട്ടത്. ശക്തമായ റൈഫിള് ഉപയോഗിച്ചാണ് കൊല നടത്തിയതെന്ന് പ്രോസിക്യൂഷന് വ്യക്തമാക്കി. കുറ്റകൃത്യം മറച്ചുവെയ്ക്കാനും ശ്രമം നടന്നു. കൃത്യമായി പദ്ധതിയിട്ടാണ് കൊല നടത്തിയതെന്നാണ് പ്രോസിക്യൂഷന് വാദിക്കുന്നത്.