തദ്ദേശ തിരഞ്ഞെടുപ്പില് മുസ്ലിം ലീഗ് സ്ഥാനാര്ത്ഥികള് വിജയിച്ചതിനെ തുടര്ന്ന് നടന്ന ആഘോഷങ്ങള്ക്കെതിരെ ലീഗ് സംസ്ഥാന സെക്രട്ടറി ഷാഫി ചാലിയം. വിജയം ആഘോഷിക്കാമെങ്കിലും അത് അതിരുവിടാതിരിക്കാന് ശ്രദ്ധിക്കണം എന്ന് അദ്ദേഹം ഫേസ്ബുക്കിലൂടെ ആവശ്യപ്പെട്ടു.
പൊതുനിരത്തില് ആണ്കുട്ടികളും പെണ്കുട്ടികളും ഇടകലര്ന്ന് ഡാന്സ് കളിക്കുന്നത് സാമൂഹിക അപചയത്തിന് കാരണമാകും എന്ന് ഷാഫി ചാലിയം ചൂണ്ടിക്കാട്ടി. വിമണ്സ് കോളേജ് വിജയാഘോഷം പോലെയായിരിക്കില്ല പൊതുവേദിയിലെ ജെന്ഡറുകള് ഇടകലര്ന്നുള്ള ഇടപെഴകല്.
'മറ്റ് പാര്ട്ടികളുടെ വേദികളില് മുസ്ലിം ആണ്കുട്ടികളും പെണ്കുട്ടികളും ഇടകലര്ന്ന് നൃത്തം ചവിട്ടിയാലും ചുംബിച്ചാലും കെട്ടിപ്പിടിച്ചാലും ഒരു മൗല്യാരും ഒന്നും പറയില്ല. എന്നാല് ലീഗ് വേദിയിലാണെങ്കില് അതിന്റെ സ്വഭാവം മാറും.' അദ്ദേഹം പറഞ്ഞു. ലീഗ് വേദിയില് ആധുനിക പാശ്ചാത്യ ഡിജെ ഡാന്സും പാട്ടുമായി ആണ്കുട്ടികളും പെണ്കുട്ടികളും ഇടകലര്ന്ന് കളിക്കുന്നത് കാണുന്നത് ദുഃഖമുണ്ടാക്കുന്ന രക്ഷാകര്തൃ സമൂഹവും ആദരണീയരായ പണ്ഡിതരും ലീഗിലുണ്ട്. അവരോടുള്ള ബഹുമാനം മറന്ന് മുന്നോട്ടുപോകാന് കഴിയില്ലെന്നും ഷാഫി ചാലിയം കൂട്ടിച്ചേര്ത്തു.
ഫേസ്ബുക്ക് പോസ്റ്റിന്റെ പൂര്ണരൂപം:
ആഘോഷം അതിര് വിടാതിരിക്കട്ടെ
വിജയം ആഘോഷിക്കേണ്ടത് തന്നെയാണ്. ഒരു വിമണ് കോളേജ് തെരഞ്ഞെടുപ്പ് വിജയം വിദ്യാര്ത്ഥിനികള് ഡാന്സ് കളിച്ചും കെട്ടിപ്പിടിച്ചും ആഘോഷിക്കുന്ന പോലെയല്ല പൊതു നിരത്തില് ജെന്ററുകള് തമ്മില് ഇടപഴുകി ചെയ്താലുണ്ടാവുക. അത് സാമൂഹിക അപചയത്തിന് ഹേതുവാകും. മറ്റ് പാര്ട്ടികളെ ഓഡിറ്റ് ചെയ്യുന്ന പോലെയല്ല മുസ്ലിംലീഗിനെ. ഇതര പാര്ട്ടി വേദികളില് മുസ്ലിം ആണ് പെണ്കൊടിമാര് ഇട കലര്ന്ന് നൃത്തം ചവിട്ടിയാലും ചുംബിച്ചാലും കെട്ടിപ്പിടിച്ചാലും ഒരു മൗല്യാരും ഒന്നും പറയില്ല. എന്നാല് ലീഗ് വേദിയിലാണെങ്കില് അതിന്റെ സ്വഭാവം മാറും. ആദ്യം അത് മനസ്സിലാക്കേണ്ടത് ലീഗുകാര് തന്നെയാണ്. നമ്മുടെ മഹത്തായ സംസ്കാരങ്ങളും പാരമ്പര്യങ്ങളും മാറ്റി വെച്ച് ആധുനിക പാശ്ചാത്യ ഡീജേ ഡാന്സുകളും അട്ടഹാസിക്കുന്ന പാട്ടുകളും ഇടകലര്ന്ന നൃത്തങ്ങളുമായി നമ്മുടെ കുട്ടികളെ കാണുന്നതില് ദുഃഖിക്കുന്ന ഒരു രക്ഷാകൃത്ത സമൂഹവും ആദരണീയരായ പണ്ഡിതരും നമ്മുടെ പാര്ട്ടിയിലുണ്ട്. അവരോടുള്ള ബഹുമാനവും അദബും മറന്ന് നമുക്ക് മുന്നോട്ട് പോവാനാവില്ല. ആഘോഷം അതിര് വിടാതിരിക്കാന് ശ്രദ്ധിക്കുക
