ബോര്ഡ് പരീക്ഷയില് ഉത്തരമെഴുതാന് കഴിയാത്തതിനെത്തുടര്ന്ന് ജയിക്കാനായി അധ്യാപകനെ സ്വാധീനിക്കാന് ഉത്തരക്കടലാസിനൊപ്പം 1000 രൂപ വച്ച് വിദ്യാര്ത്ഥി. ജാര്ഖണ്ഡ് ബോര്ഡ് പരീക്ഷയുടെ മൂല്യനിര്ണയം നടക്കുന്നതിനിടെ പലാമു എന്ന സ്ഥലത്തെ ഒരു മൂല്യനിര്ണ്ണയ കേന്ദ്രത്തില് സംസ്കൃതം ഉത്തരക്കടലാസ് പരിശോധിക്കുന്നതിനിടെയാണ് വിചിത്രമായ സംഭവം ശ്രദ്ധയില്പ്പെട്ടത്.
ഒരു ചോദ്യത്തിന് ഉത്തരം നല്കാന് കഴിയാതിരുന്ന വിദ്യാര്ത്ഥി, ആ പേജിന് താഴെ രണ്ട് 500 രൂപ നോട്ടുകള് വെച്ചിരുന്നു. മൂല്യനിര്ണ്ണയം നടത്തുന്ന അധ്യാപകനെ സ്വാധീനിച്ച് അന്യായമായി മാര്ക്ക് നേടാനായിരുന്നു വിദ്യാര്ത്ഥിയുടെ ശ്രമം. എന്നാല്, മൂല്യനിര്ണ്ണയ ചട്ടങ്ങള് കര്ശനമായി പാലിച്ച അധ്യാപകന് ആ ചോദ്യത്തിന് പൂജ്യം മാര്ക്ക് നല്കി മൂല്യനിര്ണയത്തിലെ സുതാര്യത ഉയര്ത്തിപ്പിടിച്ചു.
ഇത്തരം ശ്രമങ്ങള് വിദ്യാര്ത്ഥിയുടെ പരീക്ഷാഫലത്തെ അപകടത്തിലാക്കുക മാത്രമല്ല, പരീക്ഷാ സംവിധാനത്തിന്റെ വിശ്വാസ്യതയെ തന്നെ ബാധിക്കുമെന്ന് വിദ്യാഭ്യാസ വിദഗ്ധര് അഭിപ്രായപ്പെട്ടു. അറിവും ധാരണയും സത്യസന്ധമായി വിലയിരുത്തേണ്ട പരീക്ഷകളില് ഇത്തരം കുറുക്കുവഴികള് തേടുന്നത് വിദ്യാര്ത്ഥിയുടെ അക്കാദമിക് റെക്കോര്ഡിനെയും വിശ്വാസ്യതയെയും ദീര്ഘകാലം പ്രതികൂലമായി ബാധിക്കുമെന്നും അവര് മുന്നറിയിപ്പ് നല്കി.
ഉത്തരക്കടലാസിനുള്ളില് പണം വെച്ചിരിക്കുന്ന ഫോട്ടോ സോഷ്യല് മീഡിയയില് അതിവേഗം പ്രചരിച്ചതോടെ വലിയ ചര്ച്ചകള്ക്കും വഴി തുറന്നു. മൂല്യനിര്ണ്ണയം പൂര്ണ്ണമായും സുതാര്യമായാണ് നടക്കുന്നതെന്നും എഴുതിയിരിക്കുന്ന ഉത്തരങ്ങള്ക്ക് മാത്രമാണ് മാര്ക്ക് നല്കുന്നതെന്നും അധ്യാപകര് ആവര്ത്തിച്ചു വ്യക്തമാക്കി.
