പശ്ചിമേഷ്യന് സംഘര്ഷം കോവിഡ് മഹാമാരിക്ക് സമാനമായ ആഗോള പ്രത്യാഘാതങ്ങള് ഉണ്ടാക്കുമെന്ന് റഷ്യന് പ്രസിഡന്റ് വ്ളാഡിമിര് പുടിന് മുന്നറിയിപ്പ് നല്കി. പ്രധാനമന്ത്രി നരേന്ദ്ര മോദി ഇതേ വിഷയത്തില് നേരത്തെ ആശങ്ക പ്രകടിപ്പിച്ചതിന് പിന്നാലെയാണ് പുടിന്റെ ഈ പ്രസ്താവന. നിലവിലെ പ്രതിസന്ധി ലോകമെമ്പാടുമുള്ള വിതരണ ശൃംഖലകളെയും വ്യവസായങ്ങളെയും സാരമായി ബാധിക്കുമെന്ന് അദ്ദേഹം ചൂണ്ടിക്കാട്ടി. ഈ സംഘര്ഷം ഉയര്ത്തുന്ന ആഗോള പ്രത്യാഘാതങ്ങള് എത്രത്തോളമുണ്ടാകുമെന്ന് പ്രവചിക്കാന് കഴിയില്ലെന്ന് പുടിന് പറഞ്ഞു. യുദ്ധത്തില് നേരിട്ട് ഏര്പ്പെട്ടിരിക്കുന്നവര്ക്ക് പോലും ഇതിന്റെ ആഴം മുന്കൂട്ടി കാണാന് സാധിക്കില്ല. ഹൈഡ്രോ കാര്ബണുകള് (എണ്ണ, വാതകം), ലോഹങ്ങള്, വളം തുടങ്ങിയ മേഖലകളെ ഈ പ്രതിസന്ധി നേരിട്ട് ബാധിച്ചു കഴിഞ്ഞതായും അദ്ദേഹം വ്യക്തമാക്കി.
കോവിഡ് കാലഘട്ടത്തില് ലോകത്തെ എല്ലാ ഭൂഖണ്ഡങ്ങളുടെയും വികസനം എങ്ങനെയാണോ തടസ്സപ്പെട്ടത്, അതിന് സമാനമായ സാമ്പത്തിക ആഘാതമാണ് ഇപ്പോള് നേരിടുന്നത്. ഊര്ജ്ജത്തെ അമിതമായി ആശ്രയിക്കുന്ന രാജ്യങ്ങള്ക്ക് ഈ സാഹചര്യം വലിയ വെല്ലുവിളിയാകും. ഇത്തരം ഒരു പുതിയ യാഥാര്ത്ഥ്യത്തെ നേരിടാന് സജ്ജമാകണമെന്നും ദേശീയ ഐക്യം നിലനിര്ത്തണമെന്നും അദ്ദേഹം റഷ്യയിലെ ജനങ്ങളോട് ആഹ്വാനം ചെയ്തു. അന്താരാഷ്ട്ര വിപണിയില് എണ്ണവില വര്ധിക്കുന്നതും ചരക്ക് നീക്കം തടസ്സപ്പെടുന്നതും ആഗോള സമ്പദ്വ്യവസ്ഥയെ വലിയൊരു തകര്ച്ചയിലേക്ക് നയിക്കുമെന്ന ഭീതി ഇതോടെ ശക്തമായിരിക്കുകയാണ്.
