കേരളത്തെ നടുക്കിയ വാല്പ്പാറ വാഹനാപകടത്തില് മരിച്ച ഒന്പതു പേരുടെയും മൃതദേഹങ്ങള് ജന്മനാട്ടിലെത്തിച്ചു. പൊള്ളാച്ചിയില് നിന്നും പുറപ്പെട്ട ആംബുലന്സുകള് രാവിലെ 9.15ഓടെ പെരിന്തല്മണ്ണ പാങ്ങ് അമ്പലപ്പറമ്പ് ഗവ. ഹയര്സെക്കന്ഡറി സ്കൂളിലെത്തി. തുടര്ന്ന് സ്കൂള് വളപ്പില് പൊതുദര്ശനം ആരംഭിച്ചു. ഒരു മണിക്കൂറായിരിക്കും സ്കൂളില് പൊതുദര്ശനം ഉണ്ടാകുക. തുടര്ന്ന് മൃതദേഹങ്ങള് വീടുകളിലേക്ക് കൊണ്ടുപോകും. നാടിന്റെ പ്രിയപ്പെട്ടവര്ക്ക് വിട നല്കാന് വിദ്യാര്ത്ഥികളും സഹപ്രവര്ത്തകരും നാട്ടുകാരും സ്കൂള് വളപ്പിലേക്ക് ഒഴുകിയെത്തുകയാണ്.
പുലര്ച്ചെ നാല് മണിയോടെ പോസ്റ്റ്മോര്ട്ടം പൂര്ത്തിയാക്കി, പൊള്ളാച്ചിയില് നിന്ന് പൊലീസ് അകമ്പടിയോടെയാണ് പെരിന്തല്മണ്ണയിലെത്തിച്ചത്. മരിച്ച എല്ലാവരുടെയും സംസ്കാരം ഉച്ചയ്ക്ക് മുന്പായി പൂര്ത്തിയാകും. മന്ത്രി വി ശിവന്കുട്ടി, പികെ കുഞ്ഞാലിക്കുട്ടി, പാണക്കാട് സാദിഖലി ശിഹാബ് തങ്ങള് തുടങ്ങിയവര് സ്കൂളിലെത്തി അന്തിമോപചാരമര്പ്പിച്ചു.
മലപ്പുറം പാങ്ങ് പള്ളിപ്പറമ്പ് ഗവ. എല്പി സ്കൂളില് നിന്നുള്ള വിനോദയാത്രാ സംഘം സഞ്ചരിച്ച വാന് ഇന്നലെ വൈകുന്നേരം 5.15 ന് ആണ് വാല്പ്പാറ ചുരം റോഡില് 500 അടി താഴ്ചയിലേക്ക് മറിഞ്ഞത്.
