രാജി നല്കിയതിന് പിന്നാലെ താരസംഘടന അമ്മയുടെ എക്സിക്യൂട്ടീവ് കമ്മിറ്റിക്കെതിരെ രൂക്ഷ വിമര്ശനവുമായി നടനും തിരക്കഥാകൃത്തുമായ ജോയ് മാത്യു. ഒരു തീരുമാനമെടുക്കാന് കഴിയാത്ത സംഘത്തിനൊപ്പം തനിക്ക് തുടരാനാകില്ലെന്നും ചെയ്തുകൂട്ടിയ മണ്ടത്തരങ്ങളുടെ ഫലമാണ് അനുഭവിക്കുന്നതെന്നും ജോയ് മാത്യു പറഞ്ഞു. കോഴിക്കോട് മാധ്യമങ്ങളോട് സംസാരിക്കുകയായിരുന്നു അദ്ദേഹം.
ഞാന് രണ്ടുമാസം മുമ്പ് രാജിക്കത്ത് കൊടുത്തിരുന്നു. എന്നാല് രാജിവെക്കരുതെന്നും മാധ്യമങ്ങളില് വാര്ത്തയാകുമെന്നും അന്ന് പ്രസിഡന്റ് പറഞ്ഞു. ഒരു പ്രശ്നം വേണ്ടെന്ന് കരുതി രാജീയുമായി മുന്നോട്ടു പോയില്ല. ഇപ്പോള് പിടിപ്പുകേട്, വിവരമില്ലായ്മ, പരസ്പരം കുറ്റപ്പെടുത്തല്, പോലീസ് കേസ് തുടങ്ങിയ കാരണം സഹിക്കാന് വയ്യാത്ത അവസ്ഥയാണ്.
സംഘടനയുടെ പ്രതിച്ഛായ തകര്ന്നു. ഒരു തീരുമാനമെടുക്കാന് കഴിയാത്ത സംഘത്തിന്റെ കൂടെ തുടരാന് എനിക്ക് കഴിയില്ല. എക്സിക്യൂട്ടീവ് കമ്മിറ്റിയില് എന്നെ പിന്തുണയ്ക്കുന്ന രണ്ടോ മൂന്നോ പേരെയുള്ളൂ. വിവരമുള്ള മുതിര്ന്ന അംഗങ്ങളുണ്ട്. ഭൂരിപക്ഷ മണ്ടന്മാരും അവരുടെ അഭിപ്രായത്തെ അംഗീകരിക്കില്ല. എന്നിട്ട് മണ്ടത്തരം ചെയ്യും. ഈ മണ്ടത്തരങ്ങളുടെ ആകെ തുകയാണ് ഇപ്പോള് അനുഭവിക്കുന്നത്.
മോഹന്ലാല്, ഇന്നസെന്റ് എന്നിവരൊക്കെ പ്രസിഡന്റ് ആയിരുന്നപ്പോള് എതിര്ത്തു പറയേണ്ട ആവശ്യം പോലും വന്നിട്ടില്ല. കാര്യങ്ങള് മനസിലാക്കാന് കഴിവുള്ളവരാണ് അവര്. അവരുടെ തീരുമാനം ഉചിതമായിരുന്നു. തിലകന്റെ കാര്യത്തില് അടക്കം അഭിപ്രായവ്യത്യാസം ഉണ്ടായിരുന്നെങ്കിലും സംഘടനയുടെ മറ്റു കാര്യങ്ങളില് വിയോജിപ്പ് പ്രകടിപ്പിക്കേണ്ട സാഹചര്യം വന്നിട്ടില്ല.
