പാലക്കാട് വോട്ടു ചോദിക്കാനെത്തിയ യുഡിഎഫ് സ്ഥാനാര്ത്ഥി രമേഷ് പിഷാരടിയെ തടഞ്ഞ ബിജെപി പ്രവര്ത്തകര്ക്ക് എതിരെ പൊലീസ് കേസെടുത്തു. പാലക്കാട് മുനിസിപ്പാലിറ്റിയിലെ ബിജെപി അംഗം സിന്ധു രാജനെ ഒന്നാം പ്രതിയാക്കിയാണ് പൊലീസ് കേസ് എടുത്തത്. വടക്കന്തറയില് പ്രചാരണത്തിനെയപ്പോഴാണ് കോണ്ഗ്രസ് പ്രവര്ത്തകരെയും സ്ഥാനാര്ത്ഥിയെയും ഇവര് തടഞ്ഞത്.
പാലക്കാട് ടൗണ് നോര്ത്ത് പൊലീസാണ് എഫ്ഐആര് രജിസ്റ്റര് ചെയ്തത്. സിന്ധു രാജന് അടക്കം മൂന്നുപേര്ക്കെതിരെയാണ് കേസെടുത്തിരിക്കുന്നത്. പെണ്ണുപിടിയന്മാരായ കോണ്ഗ്രസ് പ്രവര്ത്തകരെ ഒരു വീട്ടിലും കയറി വോട്ട് ചോദിക്കാന് അനുവദിക്കില്ലെന്ന് പറഞ്ഞ് ബിജെപി പ്രവര്ത്തകര് ഭീഷണിപ്പെടുത്തിയെന്ന് എഫ്ഐആറില് പറയുന്നത്.
രമേഷ് പിഷാരടിയെ ബിജെപി പ്രവര്ത്തകര് തടഞ്ഞ സംഭവത്തില് പാലക്കാട് ബ്ലോക്ക് കോണ്ഗ്രസ് കമ്മിറ്റി പ്രസിഡന്റ് സി വി സതീഷാണ് പൊലീസില് പരാതി നല്കിയത്. പാലക്കാട് ഡിവൈഎസ്പിയ്ക്കാണ് പരാതി നല്കിയത്. ബിജെപി നഗരസഭ കൗണ്സിലര് സിന്ധുവിന്റെ നേതൃത്വത്തില് തടഞ്ഞ് നിര്ത്തി ഭീഷണിപ്പെടുത്തി എന്നാണ് പരാതിയില് പറയുന്നത്. സംഭവത്തില് അന്വേഷണം വേണമെന്നും കുറ്റക്കാര്ക്കെതിരെ നടപടിയെടുക്കണമെന്നും പരാതിയില് ആവശ്യപ്പെട്ടിരുന്നു.
സ്ഥാനാര്ത്ഥിയെ തടഞ്ഞതിന് പിന്നാലെ യുഡിഎഫ് പ്രവര്ത്തകരും ബിജെപി പ്രവര്ത്തകരും തമ്മില് വാക്കേറ്റമുണ്ടായിരുന്നു. ബിജെപി ശക്തികേന്ദ്രങ്ങളില് വോട്ട് ചോദിക്കരുതെന്ന് പറഞ്ഞാണ് സ്ഥാനാര്ത്ഥിയെ തടഞ്ഞതെന്ന് യുഡിഎഫ് ക്യാമ്പ് ആരോപിച്ചിരുന്നു.
