ലിവിങ്സ്റ്റണ്: ലോകകപ്പിന്റെ മത്സരവീര്യവും ആവേശവും പ്രാദേശിക തലത്തില് പുനരാവിഷ്കരിച്ചുകൊണ്ട്, 30 വയസിന് മുകളിലുള്ള ഇന്ത്യന് വംശജരായ ഫുട്ബോള് താരങ്ങള്ക്കായി ലിവി കോമ്പന്സ് സംഘടിപ്പിച്ച മാസ്റ്റേഴ്സ് കപ്പ് 2.0 ആവേശകരമായ മത്സരങ്ങള്ക്കൊടുവില് വിജയകരമായി സമാപിച്ചു.
30 വയസിന് മുകളിലുള്ള ഇന്ത്യന് വംശജരായ താരങ്ങള്ക്കായി, ക്ലബ്ബിന്റെ നേതൃത്വത്തില് സംഘടിപ്പിക്കപ്പെടുന്ന യുകെയിലെ ആദ്യത്തേതും നിലവില് ഏകവുമായ മാസ്റ്റേഴ്സ് ഫുട്ബോള് ടൂര്ണമെന്റ് എന്ന പ്രത്യേകതയാണ് മാസ്റ്റേഴ്സ് കപ്പിനെ മറ്റുള്ളവയില് നിന്ന് വേറിട്ടുനിര്ത്തുന്നത്. രണ്ടാം പതിപ്പിലും സ്കോട്ട്ലന്ഡിലെയും ഇംഗ്ലണ്ടിലെയും വിവിധ ഭാഗങ്ങളില് നിന്ന് ടീമുകള് ലിവിങ്സ്റ്റണിലെത്തിയത് ടൂര്ണമെന്റിന്റെ വര്ധിച്ചുവരുന്ന സ്വീകാര്യതയ്ക്കും നിലവാരത്തിനും തെളിവായി.
ഫൈനലില് മികച്ച പ്രകടനം പുറത്തെടുത്ത സ്കോട്ട്ലന്ഡിലെ Stirling FC എവര്-റോളിംഗ് ട്രോഫി സ്വന്തമാക്കി ചാമ്പ്യന്മാരായി. ഇംഗ്ലണ്ടിലെ Gloucestershire-ല് നിന്നുള്ള Adler FC ഒന്നാം റണ്ണറപ്പും, സ്കോട്ടിഷ് മലയാളി ഫുട്ബോളിലെ അതികായരായ Glasgow Tuskers രണ്ടാം റണ്ണറപ്പുമായി.
വിജയികള്ക്കപ്പുറം, ടൂര്ണമെന്റില് പങ്കെടുത്ത എല്ലാ ടീമുകളും ഉയര്ന്ന നിലവാരത്തിലുള്ള ഫുട്ബോളാണ് കാഴ്ചവെച്ചത്. ആതിഥേയരായ Livi Kombans ടീമിന്റെ പോരാട്ടവീര്യവും അവസാന വിസില് വരെ വിട്ടുകൊടുക്കാത്ത മനോഭാവവും ഏവരുടെയും പ്രശംസ നേടി. ഇംഗ്ലണ്ടില് നിന്ന് ദീര്ഘദൂരം സഞ്ചരിച്ചെത്തിയ Crewe FC, ടൂര്ണമെന്റിലെ ഏറ്റവും കരുത്തുറ്റ ടീമുകളിലൊന്നാണെന്ന് തെളിയിക്കുന്ന മികച്ച പ്രകടനമാണ് പുറത്തെടുത്തത്. അതേസമയം, നാലാം സ്ഥാനം നേടിയ LK Legends-ന്റെ മുന്നേറ്റം ടൂര്ണമെന്റിലെ ഏറ്റവും ശ്രദ്ധേയ നേട്ടങ്ങളിലൊന്നായി മാറി. പരിചയസമ്പന്നരായ താരങ്ങളുടെ ആത്മവിശ്വാസവും പോരാട്ടവീര്യവും നിറഞ്ഞ അവരുടെ പ്രകടനം കാണികളുടെയും എതിരാളികളുടെയും കൈയടി നേടി.
ടൂര്ണമെന്റിന്റെ പ്രധാന ആകര്ഷണമായ എവര്-റോളിംഗ് ട്രോഫി ഇത്തവണ Stirling FC സ്വന്തമാക്കിയതോടെ മാസ്റ്റേഴ്സ് കപ്പിന്റെ ചരിത്രത്തില് പുതിയൊരു അധ്യായം കൂടി ചേര്ന്നു.
ആരോഗ്യകരമായ സമൂഹത്തിലേക്ക് വ്യക്തമായ ലക്ഷ്യത്തോടെ
മത്സരവിജയങ്ങള്ക്കപ്പുറം, 30 വയസിന് മുകളിലുള്ള ഇന്ത്യന് സമൂഹത്തില് ആരോഗ്യബോധവും ശാരീരികക്ഷമതയും സാമൂഹിക കൂട്ടായ്മയും വളര്ത്തിയെടുക്കുക എന്ന വ്യക്തമായ ലക്ഷ്യത്തോടെയാണ് ലിവി കോമ്പന്സ് മാസ്റ്റേഴ്സ് കപ്പിന് തുടക്കമിട്ടത്.
തിരക്കേറിയ ജീവിതത്തിനിടയിലും കായികരംഗത്തേക്ക് തിരിച്ചെത്താന് കൂടുതല് പേരെ പ്രചോദിപ്പിക്കുക, ആരോഗ്യകരമായ ജീവിതശൈലി പ്രോത്സാഹിപ്പിക്കുക, വിവിധ നഗരങ്ങളിലെ ഇന്ത്യന് സമൂഹത്തെ ഒരുമിപ്പിക്കുക എന്നീ ലക്ഷ്യങ്ങളാണ് സംഘാടകര് മുന്നോട്ടുവെച്ചത്.
യുകെയിലെ ഇന്ത്യന് സമൂഹത്തിന്റെ കായികരംഗം പരമ്പരാഗതമായി ക്രിക്കറ്റിനും ബാഡ്മിന്റണിനും ചുറ്റുമാണ് കൂടുതലായി സജീവമായിട്ടുള്ളത്. അത്തരമൊരു സാഹചര്യത്തില്, ഇന്ത്യന് സമൂഹത്തിനിടയില് ഫുട്ബോളിനെ കൂടുതല് ജനകീയമാക്കാനും, പ്രത്യേകിച്ച് 30 വയസിന് മുകളിലുള്ളവരെ വീണ്ടും കളിക്കളത്തിലേക്ക് തിരികെ കൊണ്ടുവരാനുമുള്ള ഒരു പയനിയര് സംരംഭമായാണ് ലിവി കോമ്പന്സ് മാസ്റ്റേഴ്സ് കപ്പ് വിലയിരുത്തപ്പെടുന്നത്. ആരോഗ്യകരമായ ജീവിതശൈലിയും സാമൂഹിക കൂട്ടായ്മയും പ്രോത്സാഹിപ്പിക്കുന്ന ഈ ടൂര്ണമെന്റ്, യുകെയിലെ ഇന്ത്യന് ഫുട്ബോളിന്റെ വളര്ച്ചയ്ക്ക് പുതിയ ദിശാബോധം നല്കുമെന്ന പ്രതീക്ഷയിലാണ് സംഘാടകര്.
സംഘാടക സമിതിയുടെ അക്ഷീണ പരിശ്രമം
ടൂര്ണമെന്റിന്റെ വിജയത്തിന് പിന്നില് പ്രവര്ത്തിച്ച സംഘാടക സമിതിയുടെ കഠിനാധ്വാനം ഏവരുടെയും പ്രശംസ നേടി. Naveen Thomas, Parasuram, Anooj, Melvin, Vishnu, Geojo എന്നിവരുടെ നേതൃത്വത്തില് മാസങ്ങളോളം നടത്തിയ ആസൂത്രണവും ഏകോപനവുമാണ് ടൂര്ണമെന്റിന്റെ വിജയത്തിന് അടിത്തറയായത്.
ടീമുകളുടെ രജിസ്ട്രേഷന് മുതല് മത്സരക്രമീകരണം, ഗ്രൗണ്ട് ഒരുക്കം, സന്നദ്ധ പ്രവര്ത്തകരുടെ ഏകോപനം, സുരക്ഷ, ആതിഥ്യം തുടങ്ങി എല്ലാ മേഖലകളിലും സംഘാടക സമിതി മികച്ച മികവ് പുലര്ത്തി. ഒരു പ്രാദേശിക ക്ലബ്ബിന്റെ നേതൃത്വത്തില് ഇത്രയും വലിയ കായികമേള വിജയകരമായി സംഘടിപ്പിച്ചതിന് നിരവധി അഭിനന്ദനങ്ങളാണ് ലഭിച്ചത്.
റഫറിമാരുടെയും പ്രാദേശിക സംരംഭകരുടെയും പിന്തുണ
മത്സരങ്ങള് മികച്ച നിലവാരത്തില് നിയന്ത്രിക്കുന്നതില് West Lothian Football Aossciation-നെ പ്രതിനിധീകരിച്ച David Donnelly, Will Mitchell എന്നിവര് നിര്ണായക പങ്കുവഹിച്ചു. മത്സരങ്ങളുടെ നിഷ്പക്ഷതയും പ്രൊഫഷണല് നിലവാരവും ഉറപ്പാക്കുന്നതില് ഇരുവരുടെയും സേവനം ടീമുകളും സംഘാടകരും പ്രത്യേകം പ്രശംസിച്ചു.
ടൂര്ണമെന്റിന്റെ വിജയത്തില് പ്രാദേശിക സംരംഭകരുടെ പിന്തുണയും നിര്ണായകമായി. Popular Finance, Alankrita Jewellery, Olivia Events എന്നീ സ്ഥാപനങ്ങളുടെ പിന്തുണയാണ് ഈ കായികമേളയ്ക്ക് കൂടുതല് കരുത്ത് പകര്ന്നത്. ലിവിങ്സ്റ്റണിലെ പ്രാദേശിക സംരംഭകരുടെ ഈ കൂട്ടായ പിന്തുണ, സമൂഹകേന്ദ്രിതമായ കായിക സംരംഭങ്ങള്ക്ക് മികച്ച മാതൃകയായി മാറുകയും ചെയ്തു.
ലിവി കോമ്പന്സ് കുടുംബം കൈകോര്ത്തപ്പോള്
ടൂര്ണമെന്റിന്റെ വിജയത്തിന് പിന്നില് ഏറ്റവും വലിയ കരുത്തായി മാറിയത് Livi Kombans കുടുംബാംഗങ്ങളുടെയും വനിതാ അംഗങ്ങളുടെയും ആത്മാര്ത്ഥമായ പിന്തുണയായിരുന്നു. മത്സരവേദിയില് അവര് ഒരുക്കിയ സ്നാക്ക് ഷോപ്പ് താരങ്ങള്ക്കും കുടുംബാംഗങ്ങള്ക്കും കാണികള്ക്കും ഒരുപോലെ മികച്ച ആതിഥ്യാനുഭവമാണ് സമ്മാനിച്ചത്. ദിവസം മുഴുവന് സജീവമായി പ്രവര്ത്തിച്ച അവരുടെ സേവനം മത്സരവേദിയെ ഒരു കുടുംബസംഗമത്തിന്റെയും സാമൂഹിക കൂട്ടായ്മയുടെയും ഉത്സവമാക്കി മാറ്റി.
ഇതിനൊപ്പം Livingston Malayali Community (LMC) അംഗങ്ങളും വിവിധ മേഖലകളില് നല്കിയ സഹകരണവും ടൂര്ണമെന്റിന്റെ വിജയത്തിന് കൂടുതല് കരുത്തേകി. ഒരു ക്ലബ്ബും കുടുംബങ്ങളും പ്രാദേശിക സമൂഹവും കൈകോര്ത്തപ്പോള്, ഒരു ഫുട്ബോള് ടൂര്ണമെന്റ് എങ്ങനെ വലിയ സാമൂഹിക ആഘോഷമായി മാറാമെന്ന് മാസ്റ്റേഴ്സ് കപ്പ് 2.0 തെളിയിച്ചു.
''യുകെയിലെ 30+ ഇന്ത്യന് ഫുട്ബോളിന് മാതൃകാപരമായ വേദി'' - അഡ്ലര് എഫ്സി ക്യാപ്റ്റന് കുര്യന്
ടൂര്ണമെന്റില് ഒന്നാം റണ്ണറപ്പായ Adler FC-യുടെ ക്യാപ്റ്റന് കുര്യന്, മാസ്റ്റേഴ്സ് കപ്പിന്റെ സംഘാടന നിലവാരത്തെയും ആതിഥ്യത്തെയും പ്രത്യേകം പ്രശംസിച്ചു.
''യുകെയില് 30 വയസിന് മുകളിലുള്ള ഇന്ത്യന് ഫുട്ബോള് താരങ്ങള്ക്കായി ഇത്രയും മികച്ച രീതിയില് സംഘടിപ്പിക്കപ്പെടുന്ന ടൂര്ണമെന്റ് കാണുന്നത് അഭിമാനകരമാണ്. മത്സരങ്ങളുടെ നിലവാരവും, ടീമുകളുടെ നിലവാരവും, സംഘാടന മികവും, ആതിഥ്യവും എല്ലാം തന്നെ മികച്ച അനുഭവമായി. വരും വര്ഷങ്ങളില് യുകെയുടെ വിവിധ ഭാഗങ്ങളില് നിന്നുള്ള കൂടുതല് ടീമുകളെ ആകര്ഷിക്കുന്ന ദേശീയതല മാസ്റ്റേഴ്സ് ഫുട്ബോള് മേളയായി ഇത് വളരുമെന്നതില് സംശയമില്ല,'' എന്ന് അദ്ദേഹം പറഞ്ഞു.
ലോകകപ്പിന്റെ മത്സരവീര്യവും ആവേശവും, യുകെയുടെ വിവിധ ഭാഗങ്ങളില് നിന്നുള്ള ടീമുകളുടെ പങ്കാളിത്തവും, പ്രാദേശിക സംരംഭകരുടെയും സന്നദ്ധപ്രവര്ത്തകരുടെയും പിന്തുണയും, ലിവി കോമ്പന്സ് കുടുംബാംഗങ്ങളുടെ അര്പ്പണബോധവും, ആരോഗ്യകരമായ ജീവിതശൈലി പ്രോത്സാഹിപ്പിക്കുന്ന സന്ദേശവും ഒരുമിച്ചപ്പോള് ലിവി കോമ്പന്സ് മാസ്റ്റേഴ്സ് കപ്പ് 2.0, യുകെയിലെ ഇന്ത്യന് സമൂഹത്തിന്റെ കലണ്ടറില് വേറിട്ട സ്ഥാനമുള്ള ഒരു കായികോത്സവമായി വീണ്ടും ശ്രദ്ധ നേടി.
ക്രിക്കറ്റും ബാഡ്മിന്റണും കേന്ദ്രീകരിച്ചിരുന്ന യുകെയിലെ ഇന്ത്യന് കായികസംസ്കാരത്തിലേക്ക് ഫുട്ബോളിനും ശക്തമായ ഇടം സൃഷ്ടിച്ച ഈ സംരംഭം, 30+ ഇന്ത്യന് സമൂഹത്തിനിടയില് ആരോഗ്യകരമായ ജീവിതശൈലി, കായിക സംസ്കാരം, സാമൂഹിക ഐക്യം എന്നിവ വളര്ത്തിയെടുക്കുന്ന ഒരു പുതിയ അധ്യായത്തിന് തുടക്കമിട്ടിരിക്കുകയാണെന്ന് കായികലോകം വിലയിരുത്തുന്നു
