പോസ്റ്റ്മോര്‍ട്ടം റൂമില്‍ മദ്യപാര്‍ട്ടി നടത്തുന്ന ദൃശ്യങ്ങള്‍ സമൂഹമാധ്യമങ്ങളില്‍ വൈറലായതിനെ തുടര്‍ന്ന് മഹാരാഷ്ട്രയിലെ മുന്‍സിപ്പല്‍ ആശുപത്രിയിലെ ഡോക്ടറെ സസ്‌പെന്‍ഡ് ചെയ്തു. പൊതുജനങ്ങളില്‍ നിന്നുണ്ടായ കടുത്ത പ്രതിഷേധത്തെത്തുടര്‍ന്ന് പിംപ്രി-ചിഞ്ച്വാഡ് മുനിസിപ്പല്‍ കോര്‍പ്പറേഷന്‍ (പി.സി.എം.സി) സംഭവത്തില്‍ വകുപ്പുതല അന്വേഷണത്തിനും ഉത്തരവിട്ടിട്ടുണ്ട്.
യശ്വന്ത്‌റാവു ചവാന്‍ മെമ്മോറിയല്‍ (വൈ.സി.എം) ആശുപത്രിയില്‍ സേവനമനുഷ്ഠിച്ചിരുന്ന ഡോ. വൈഭവ് അവിനാഷ് മ്ഹാസ്‌കെയെയാണ് വെള്ളിയാഴ്ച അടിയന്തരമായി സസ്‌പെന്‍ഡ് ചെയ്തത്. വ്യാഴാഴ്ച രാത്രി ആശുപത്രിയിലെ പോസ്റ്റ്മോര്‍ട്ടം റൂമില്‍ ഡ്യൂട്ടിയിലുണ്ടായിരുന്ന ഇദ്ദേഹം മദ്യപിച്ച നിലയിലാണെന്ന വിവരങ്ങള്‍ പുറത്തുവന്നതിനെ തുടര്‍ന്നാണ് നടപടി.
ആശുപത്രിക്ക് പുറത്ത് രാത്രി മുഴുവന്‍ കാത്തിരുന്ന ഒരാള്‍, മരണം സംബന്ധിച്ച സര്‍ട്ടിഫിക്കറ്റ് വാങ്ങാന്‍ പോസ്റ്റ്മോര്‍ട്ടം റൂമിനുള്ളിലേക്ക് നോക്കിയപ്പോഴാണ് ഡോക്ടറെ മദ്യപിച്ച നിലയില്‍ കണ്ടെത്തിയത്. തുടര്‍ന്ന് ഈ സംഭവത്തിന്റെ വീഡിയോ ദൃശ്യങ്ങള്‍ സമൂഹമാധ്യമങ്ങളില്‍ വ്യാപകമായി പ്രചരിച്ചു. ഭക്ഷണ സാധനങ്ങളും മദ്യക്കുപ്പികളും മേശപ്പുറത്ത് നിരത്തിവച്ചിരിക്കുന്ന ദൃശ്യങ്ങളാണ് വീഡിയോയിലുള്ളത്. ആശുപത്രി വളപ്പില്‍ ഇത്തരം മദ്യപാന സല്‍ക്കാരങ്ങള്‍ നടക്കുന്നത് പൊതുജനങ്ങളില്‍ വലിയ ആശങ്കയ്ക്ക് ഇടയാക്കുകയും, ഇത് ഭരണകൂടത്തിനെതിരെ കര്‍ശന നടപടി സ്വീകരിക്കാന്‍ പ്രേരിപ്പിക്കുകയും ചെയ്തു.
